Te Mwananga ni Kawaekoa nakon te Bootaki n Toa

Tamnei iroun Getty Images

Ngke ti mwaing man te United States nako Vietnam, kainnabau ao ngai ti kataia n aki katuanakoa te taromauri. Imwiin teuana te ririki, ti tuai man katuanakoa teuana te bootaki n te Tabati, ma ti ririmwi n tainako ao n tabetai ti katuanakoa te toa. Ara bootaki n toa e waaki n 8:30 te moaningabong. Ngaira ma natira teniman, ti katauraoi nakon te taromauri iaon te tai n tabetai e tara ni kangaanga.

Ngkai ti baireia n ara utu bwa ti riai n roko n tainako iaon te tai ibukin te taromauri ao ni butimwaea te toa. Bon te kangaanga, ma ti kona n roko n te taromauri iaon te tai inanon aua te Tabati. I noora te bitaki n te mwakuri are ti karaoia. Ti a namakina riki te maiu n tamnei ae raka inanon te wiiki.

Te Tabati are imwiina, ni kaitaraana, tia waeremwe n uti. E a tia ni boo 7:30 n te moaningabong. E tuanga kainnabau bwa e bon kabwaranano, ma imwiina I iangoia bwa tina kona ni kakabwaiaki ngkana ti karaoa ara kabanea n tamaroa e ngae ngke ti rimwi. Ngaia are, ti a waaki nako!

N te tai are tia roko iai n te taromauri, ti a rimwi 20 te miniti. I namakinna bwa ti a tia ni kabwaka. Ti ongo te anene ngke ti rianna n rin, ao ngke I kauka te mataroa, temanna e a nakon te tabo n tei bwa e na tataro.

“Te anene ni kaukuuki anne?” I wirikiriki nakon te mitinare are e tei irarikin te mataroa.

“Eng!” e taku. “Ti rimwi ni waaki n te bong aei.”

I rangi n mimi. I taku bwa tia manga rimwi naba, ma ngaia ti roko raoi iaon te tai n te taromauri! Rannimata a waanako ngke I namakina ana tangira Tamara are i Karawa ibukiia ara utu ae uarereke ao ngai.

Imwiina ti a ataia bwa ngke a roko mitinare n te taromauri n te Tabati anne, a tibwa ataia ae akea temanna ae e uota te kariki ibukin te toa. Akea te titoa ae uakaan, ao te kariki e kangaanga rekena i Vietnam. Imwiin te nakonnano n te tai ae uarereke, elders a uringnga are iai te kariki ae I katauraoia ibukiia ni mweengau.

Tabeua te bong mai imwaina, elders a tia n roko ni mweengau ibukin te katairiki. N te tairiki anne, Ia tia ni katauraoa te kariki are I kamwaia ni mweengau ibukiia. E a tibwa waaki te taromauri n ingabongin te Tabati ibukina bwa mitinare a okirikaaki n ana te kariki are I karaoia ibukiia!

Te Atua e noori ara mwakuri ngkai ti kataia ni kawakin Ana tua. E ngae ngke ti kabwaka n tabetai, E tangiriira ao e na katauraoi kawai ibukira bwa tina tokanikai—e ngae ngke bon ti te nako n taromauri iaon te tai.