Kateimatoaan te Katangitang bwa Mwakoron te Nebonebo ae Kakawaki
Te katangitang e riki n taainako—ao e na bon teimatoa n riki—bwa mwakoron te nebonebo ae kakawaki, n tain te taromauri ao inanon te mweenga.
Tabeua te wiiki imwiin katean te Ekaretia, te Uea e tuanga Emma Smith bwa e na “rinei kuuna n taromauri aika tabu, … are e kakukureiai, bwa e na kamenaaki n au ekaretia” (Reirei ao Berita aika Tabu 25:11). Aomata aika Itiaki a kainnanoi kawai n reiakin koaua n te euangkerio aika boou aika a kaokaki ao n bootaki n neboa te Atua. Ao kuuna n taromauri a na riki bwa mwakoron te nebonebo ao te reirei.
Ririki aika a nako, ngke a kaaina te Ekaretia au utu, a kaungaira ara karo bwa ti na reiakina te katangitang ibukin ara aro ae boou. Iai tabeua au ururing ae otara ibukin te tai anne:
-
Kamatenanoa “Prayer Is the Soul’s Sincere Desire” (Anene n Taromauri, nambwa. 145) ma au utu.
-
N ongoraau “O My Father” (Anene n Taromauri, nambwa. 292) ao n reiakinna bwa iai Tamau are i Karawa ao Tinau are N na kona ni manga nooriia n te bong teuana.
-
I namakina ana tangira te Atua inanon aneneakin “My Heavenly Father Loves Me” (Aia Boki n Anene Ataei, 228–29)—e ngae ngke I maeka n te rereua ao tuai man noora te aroka ae te lilac ae bwabwau ueena!
Tia kabaitiia n nakon te bootaki n toa ni kabanean Beberuare 2020. Tabeman kaain ara uoote a taonaki n te aoraki ae te kaentia, ao I namakina te raunnano ngke kaain te kuaea n ara uoote a anenea “Ai Matoara Nanoia Aika Raraoi” (Anene n Taromauri, nambwa. 85). Tabeua te wiiki imwiina, iai rinanin bwaai aika aki karaunano aika a riki: te tiku ni kaokoroaki ibukin te aoraki, kainan taabo n taromauri, ao rinanin maeiein te aba ao mwiina aika a riki. Ao te anene anne e a moanna n aneneaki n au iango:
Tai maaku, Ngai raom; oo, tai bwarannano,
Bwa Ngai Atuam ao N na buokiko.
Ko na korakora man tei iaon waem,
Bwa Ko na teimatoa n te raoiroi, ao baim ana korakora.
N tabetai e taraa n ae te kangaanga e rootiiaaomata ni kabuta ao aika onoti a kuri n rikirake ni katoa bong. Iaon riki anne, ti kainnanoa kanuaakin tamneira man taian anene n taromauri, anene n te Moarinan, ao tabeua anene aika tabu.
Akea Bitakin te Kantaninga ke Kakawakina
E ngae n anne, ngkai ti bitaki nakon te tai ae baireaki ae uoua-te aoa taina ibukin ana bootaki te Ekaretia, tabeman a miimi ngkana tibangante anene e a tia ni kauarerekeaki inanon ara nebonebo. Te kaeka bon tiaki.
-
Anene n taromauri aika tabu bon mwakoron te bootaki n toa n tatabeua nako, n raonaki ma buokan katauraoan nanora ibukin te otenanti ae te toa. Te kuaea ao taan taromauri ake a anene ao tabeua anene aika tabu a kona n teimatoa ni baireaki ibukin kanakoraon te bootaki, n aron are mai imwaaina. N tain butin te aoraki ae te COVID-19 te anene ae tabu e bon teimatoa n riki bwa mwakoron bootaki n toa aika uarereke, e ngae ngke bon tii tangin bwaai ni katangitang.
-
Natira ngkai a kabanea iteran aia tai n te Moanrinan n reiakina te euangkerio rinanon te anene.
-
N te kauoua n aoa, akea te anene ni kaukuuki ke ni kainiin ibukiia ikawai ao taian kiraati ibukiia kairake. Ma te katangitang e bon teimatoa ni kabonganaaki inanon tain te kiraati n reirei ao ni kaunganano.
-
E bon bebete nakon are mai mwaaina n ongora n anene aika tabu iaon bwaai ni mwakuri aika maiu man te iti, man kabonganaan te Church’s Sacred Music app.
Kauarerekea Kanakoan Iaong Ibukin Karaoakin Bwaai, Kakorakora te Nano ni Karaoakina
Ma, bon iai tabeua te aki mataata raoi. Tabatin te Itita teuana, e kabwarabure te tia reirei nakoia kaain ana kiraati ae Reirei n Te Euangkerio: “I ataia bwa ti aki riai n anene n te Reirei n Tabati, ma I rang kan anenea ‘I Ataia Bwa E Maiu Iesu Te tia reirei anne e aki maroaa n tain te aki mataata anne.
Ni koauana, te katangitang e teimatoa kakawakina inanon ara nebonebo n aron are e riki mai imwaaina. Kakoauan kabouan te bwai ae kakawaki ae e a wakinaki ngkai n ara boki n anene n taromauri ao aia anene ataei aika a karauaki n ikotaki. N riki bwa mwakoron te kekeiaki anne, membwa n te Ekaretia ni kabuta te aonaaba a kanakoi 16,000 anene n taromauri aika boou, taian kuna, ao ai taian tekiti aika moan te kamiimi.
Ma ibukin karakon te tai ae baireaki ibukin te anene inanon tabeua ara bootaki n te Tabati, ti aki kainnanoa ae ti na iangoia raoi ao ni karaoia n iai bukina inanon tain bairean ao kabonganaan te katangitang.
Uoua oin tuua ake a na kona ni buokiira ni kateimatoa te katangitang bwa mwakoron ara nebonebo:
1. Te bwai ae rangi ni kakawaki n te Angareirei
Ti na bae n iangoi taian taetae ao marooro bwa bon moan kawai ni kanakoa taekan te euangkerio ake a nako man te mweenga ao n te taromauri. Ao ti na bae ni kabanea angiin ara tai iaon bwaai akanne. Ma te katangitang tiaki te bwai ni katamaroa. Bon te mwakoro n te angareirei ma te mwaaka ao ma te tamnei.
N aron ana reirei te Abotoro are Bauro nakoia Aika Itiaki ake ngkoa, “E na kabatiaki maekan ana taeka Kristo i nanomi; ao kam na i reirei ao kam na i tuatua n te rabakau ni kabanea, n taian areru ma anene ma kuna aika bwain te tamnei, n anene ma te akoi i nanom, nakon te Atua” (I-Korote 3:16).
Te katangitang e kona ni uota te Tamnei nakon te reirei ke te bootaki. Rinean te kuna ae e na aneneaki n tain te kiraati n te Reirei n Tabati ke Nakomai, Iriirai te marooro e tangira te iango raoi n te aro anne, iangoana ma te tataromwaaka n aron rinean koroboki aika tabu ake ti rinei bwa ti na wareki ke mwakoron te reirei are ti rineia bwa ti na tibwauaia. Te katangitang are e a tia n tataroakinaki ibukin rineana e kona n riingi naano, ni katuka te namakin n tamnei are e na reitinako inanon te maiu.
2. “Te Tataro Nakoiu”
Iaon botoniango tabeua, ti bane n tia n rinanon taai are ngke ti namakina te uruaki n nano, taai are ngke te kawai are imoara e aki mataata raoi. N tabetai e taraa n ae ti teimatoa n tataroakin kainnano ae ti te arona aika a katawe, n akea te kaeka ke mwakuriana. N aron taai akanne, e na bae ni kaririaki te nano ni motikia bwa te Atua e aki tabe iai ke ti aki tau ibukin Ana mamanano. N tabetai kanga ti namakinna ae kanga a nang bwara nanora n te tataro.
Ibukin taai ngkana ti namakinna bwa e karako reitakira n tamnei ma karawa, aio te koaua ae karekea te karaunano: Katangitangi aika tabu a kona n riki bwa mwakoron te tataro. Te Uea boni Ngaia e kabwarabwara aio ngke E mwiokoa Emma bwa e na karaoi moan kunara n taromauri: “Bwa e kimwareirei tamneiu n te anene man te nano; eng, aia anene naake a raoiroi bon te tataro nakoiu” (Reirei ao Berita aika Tabu 25:12; e kairaki ma katuruturuana).
Ao ngkana ti anga ara anene Nakoina ae nako mai nanora, e berita te Uea bwa n taainako ao e na kaeka n irianna ma te kakabwaia: “Ao e na kaekaaki ma te kakabwaia i aon atuia. Mangaia ae, tabekarake nanom ao kukurei” (Reirei ao Berita aika Tabu 25:12–13).
Te kangaanga teuana ae riki inanon maiu, I aki kona ni kinai kaeka nakon au tataro aika nako mai nanou inanon te tai ae rangi ni maan. Raoraou ae tangiraki irou e rinanon tabeua ana kangaanga ibon irouna. Ma ngke ti kaai n takakaro ao n anenei anene n taromauri ao anenen te euangkerio, angiin te tai ti namakina rootakira n namakin aika anganiira te karaunano ao ara koaua. I ataia ngkai bwa te Uea e kakoroa nanon Ana berita. E bon kaekai au anene mai nanou, n te tai ae mwaiti. Ao anne raoi e bon buokai n tabekarake nanou ao ni waaki nako.
Photograph by Robert Casey
E Riiriki ni Katoa Tabati
E riiriki ni katoa Tabati, ti kona ni kakoaua bwa tabeman irouia kaain ara taromauri, tabeman inanon ara kiraati, ao tabeman inanon ara utu a bon rootaki man katakiia inanon karawawata aika a onoti. Tabeman aomata a mena inanon aroaroia n rau ma kakabwaia aika a rangaanako. Tabeman a teimatoa n reiakin aan ana koaua aika bebete te euangkerio.
Ngkana ti kateimatoa te katangitang ni nnena ae bon riai n riki bwa mwakoron ara nebonebo, ti kona ni buokiia ni kabane ni kakaei aia tai n namakina te Tamnei, n reiakina koauan te euangkerio, ao ni kamoamoa te Uea ibukin raoiroina. Ao ti kona ni buokiia ni kabane bwa a na reke kaekaan kunaia ae nako mai nanoia ni kawai are bon tii Tamara ae akea tokina, ae kona ni karaoia.