Tera ae e Reireinai te Iaaki ibukin te Nakoanikaro

Kamataata n te tamnei iroun David Green

I uti n te ingabong teuana n namakina te rawawata. Tibwanga ae te karo I namakina te rawawata, ao I rang n ata au kabwaka. E tara n rang ni bubura te marena imarena arou n iangoia n riki bwa te karo ao n arou are I a riki iai ngkai.

I katorobubua n tataro ao I tuanga Tamara are i Karawa aron mwaitin Tangirana. I tuangnga mwaitin tangiraia natiu are e a tia ni kakabwaia iai ara utu. Ao I a waaki n tuangnga arou ni kataia n riki bwa te karo ae raoiroi, ma I namakinna ae kaanga e aki bati n nakoraoi. Ngke I tataro, I iangoa mwaitin raoiroia riki natiu ngkana e bon kaikawaiia te Atua.

Imwiina e kaoti te tamnei n au iango. I katamneia natiu ni kaitiaka aontano n te umwanikuuka. Aio teuana man au mwakuri aika mwaiti ake katabeaki bwa a na karoia ni buoka ara utu. N tabetai taratarakiia e karikai bwa Nna kui ibukina bwa a bon reirei naba ao a ewekii ni katikui tabo aika a mwaiti. Ma I anganiia bwa a na karaoia, n aron naba mwakuri ake tabeua, ibukina bwa iai au taratara ae bubura riki ibukiia. I ataia bwa rinanon ni kabane kataneiai aika aki kororaoi, a na reiakinaki ao a na rikirake. N tokina, a na bon kona ni karaoia ni waekoa ao n nakoraoi n aron are I kakaraoia. Taratarakiia anne n ataa tibwangaia ao inaomataia e anga riki te kakukurei nakon are ngkana N na karaoi bwaai ni kabane ibon irou. I aki karikirakeia ataei ibukin te tokanikai ae uarereke taina—I kataia ni buokiia bwa a na nakoraoi n abwakin te tai.

Ao I titiraki ngkana tao aekakin aei e koaua ibukiia ara karo naba ake i karawa. Tamara are i Karawa e ataia ti aki kona ni kororaoi n tibwangara ni karo. Bwaai tabeua aika ti karaoi tao e karikia bwa E na kui, ma E kariaia ibukina bwa E ataia ti reireiniira ao ti rikirake. Iai te taratara irouna ae abwabwaki mwiina. E tarataraira bwa n te bong teuana ti na riki bwa ngaira karo n ai Arona, ni kona ni tangira n ae bwanin, n reirei n ae nakoraoi, ao n riki bwa te banna ni katoto ae kororaoi. Ngkai ti bebei nako, E ataia ti tabe ni karikirakei anua n aron te taotaonakinnano ao te tangira ae itiaki. Ngaia are, n Wanawanana, E kamwakurira ao ni bwaka ao ni manga kataia riki.

I rang kan riki bwa te karo ae e tia n kororaoi! N aron are e koreia Iotebwa Timiti, N tabetai I kunea bwa I kabwaka “ni karaoi kairua aika a nanobaba n angin te tai” (Iotebwa Tiiti—Rongorongo 1:28). Ma I karekea te raunnano n atakina bwa te Atua e ata nanou, are nanona bwa E ataia ae I kataia n riki bwa te tia reireinaki. I namakina te kimwareirei ngkana a titiraki natiu, “N na kanga ni katamaroa riki aei?” ao n tara n tangiria ni katamaroa. Tao N na kona n riki n te aro anne ibukin Tamara are i Karawa.

Ngkai iango aikai ni kabane a mwakuri n au iango, I a karekea teutana riki te tai ni bwarannano. “Ma tera ngkana au kairi ni karo a kairua ao e kammarakiia natiu?” I titiraki. “I aki tangiria n tauiia, riki ngkana I a riki n rang n tamaroa inanon te waaki.”

Riki, tamneia natiu ni kaitiaki e roko n au iango. Imwiin ana kakorakora natiu te aine ni kataia ni kaitiaka te timanti ao imwiina e kawaekoa ni birinako n takakaro ke ni katia te mwakuri riki teuana, n angiin te tai I kaitiaki tabo ake a tiku n nimnim. Ao I iangoa ana nanoanga ao mwaakan Iesu Kristo ae akea tokina, are ana Mwakuri ni Kamaiu e rabuni ni kabane aro aika aki itiaki ni maiuia aomata nako. Ana nanoanga e kaboi mwiin au kabwaka n arou ni karo, n aron are Ana nanoanga e kaboimwiin marakiia natiu ni korakai ibukin au kabwaka. N te kawai are akea mai ibuakora ae kona ni iangoia, Ana mwakuri ni kamaiu e kona ni kamaoi ni kabane taian kabwaka.

I karekei raunano aika korakora inanon kaotioti aika onoti ake I karekei n te bong anne. I namakina te Tamnei n reireinai bwa au mwakuri ae te kabanea n tamaroa, n reitaki ma te Uea, a tau. I ataia bwa Tamara are i Karawa e na reitinako ni mwakuri inanon maiuia natiu, teutana imwiin teutana, ni kakororaoi baike I karaoi aika aki kororaoi. Man Ana ibuobuoki, natiu a kona n ota nako n te bong teuana n oin inaomataia, n rangi n otamwaaka kaanga ai aron are e a tia ni kaikawaiia Tamara are i Karawa n te moan tai. Ma ngkana e aki Ana baire e a tia naba ni bitai ni karaoana—kaitiakai ao ni karikai bwa N na riki riki n ai Arona. O ai korakorara wanawanan Atuara!