E na Tauaki Am Taeka

Ara Tia Kamaiu Iesu Kristo bon ara banna ni katooto ni kariaia bwa nanon te Tama e na boboto inanon maiuna. N te onaroka are Ketetemwane, ngke e tataro Kristo nakon Tamana, ngke e katokaa Iaona buren, rawawatan ao aorakin te aonaaba, I aki kona ni iangoa aron korakoran te maraki ao te rawawata n nano are e rootaki iai ngke e kangai, “Tamau, ngkana tao e konaki ao e na nako mai Rou te mwangko aei,” ao e ngae n anne korakorara ana tangira ao ana ongotaeka are E kaotia n ikeikena naba anne ngke e kangai, “ma akea au taeka, ma bon ane i Roum.”¹

Rinanon nako koroboki aika a tabu ti wareka rongorongoia tabeman reirei ake a kakaonimaki ake a tibwa te aekaki n namakin anne n aron te Tia Kamaiu ni kariaia bwa nanon te Tama e na boboto inanon maiuia. Imwaain are e kabaea ana koaua te burabeti Abinataai n anga maiuna e ninikoria n tibwa rongorongon te euangkerio ao ni katanoataa, “I kabanea au ronorongo; . . . ngkanne e aki kakawaki bwa I nakea, ngkana tao I kamaiuaki.”²

Ti te arona ma, Tateraka, Metiaka ao Abetenoko a taetae nakon te Uea ae Nebukaneta, “Ngkana tao arona, ao E kona Atuara ae ti toro I Rouna ni kamaiuira man te nenikanaiai ae ura mwaka te ai iai, ao e na kamaiuira mai inanomi baim, te Uea. Ma ngkana tao E aki, ao ke e ataki aei i roum, te uea, ba tina aki toro irouia antim, ao ti na aki taromauria te boua are te kora are ko kateia.”³

Ao Amon, natin te Uea are Motiaea, ni korakoran ana nanoanga bwa e na “taekina ana taeka te Atua nakoia aomata aika a moaanti ma ni matoatoa man iowawa,”⁴ korakoran nanona e kakimototoaki n ana kaeka nakon te Uea are Ramonaai: “Eng, I tangiria ni maeka i buakoia te botanaomata aio; eng tao ni karokoa te bong are I mate iai.”⁵

Ana reirei te Uea aika a ninikoria aikai a bon aki nanokokoraki n aia koaua ao n aron te Tia Kamaiu, ngaiia n tatabemaniia a kariaia nanon te Atua bwa e na tautaekani maiuia ni kaitara ma oin mweeraoia.

I uringnga ngke I uarereke, I ongongora ni karakinan tamau ngke e rairaki N rokon ana euangkerio Iesu Kristo iaon Samoa, e aki rang butimwaeaki raoi. Angiina a namakina te kakamaakaki n rokon te aro ae boou aei ao a kaitara ao ni bwainikiriniia naake a kainna. Angiina ake a rairaki a kabaneaki man mweengaia n aia kaawa ao a mwaiti ake a birinako nakon taabo ni kamanomano. Tamau, ngkai e bon ataei ao te mwaane ni kan atatai, e ukeuke ni kan kunea bwa tera ae reireia te aro ae boou aei. Inanon te tai ao ea bwabetitoaki bwa kaain Ana Ekaretia Iesu Kristo Ibukiia Aika Itiaki ni Boong aika Kaitira.

Ni butanakon taekan Tamau n te kawa bwa e a kaaina te Ekaretia, temanna raoraona man ana kawa e raraoma e kauringnga bwa iai te maningongo ibukina ae e na kamwaaki n te tabo n umuumu (te ai ni umuumu ieta n atibuun te warekono aika a koro kabuebueia), ngaia are e a birinako tamau ao e a kunea ana tabo ni katanna irouia Malietoa Talavou Pe’a Fitisemanu ao Alisa Fitisemanu. E boni ngae ngke e kakamaakaki inanon maiuna e a tia ni motika nanona nakon ana aro ae boou aei. N aron ae taku te Tia Kamaiu “bwa ane kam na kinaia uakekei n uaia.”⁶ Taian kakabwaia man ana Euangkerio Iesu Kristo ae e Kaokaki inanon maiu ma buu ao natira, ao ni maiuia aia utu natira, bon man uan ana onimaki tamau.

E reirei Beretitenti Russell M. Nelson, “Te titiraki ibukira n tatabemanira nako, n aki tabe ma te reeti, bon titebo. Ko tauraoi ngkoe ni kariaia te Atua bwa botom am iango inanon maium? Ko tauraoi ngkoe ni kariaia te Atua bwa temanna ae te kabanea ni kakawaki n anaa nanom inanon maium? Ko kariaia Ana taeka, Ana tua, ao Ana berita bwa e na anainanomi ni baike kam karaoi ni katoa bong? Ko kona ni kariaia bwanaana bwa te moanibwai iaon bwaai riki tabeua? Ko tauraoi ni kariaia baike E kainnanoi bwa ko na karaoi bwa a kakawaki riki nakon iango riki tabeua? Ko tauraoi ni karaoa am kantaninga bwa e na anaaki nako nanon Ana kantaninga?”⁷

I rangi ni kakaitau ibukin ana katooto tamau, ana toro te Uea aika kakaonimaki aikai ae a koreaki taekaia ao aika mwaiti riki aika kakaonimaki naba aika ana reirei ao taan iriira Kristo. I rangi ni karabwarabwa n aki toki ibukin ana katooto ae kororaoi ara Tia Kamaiu, are n taainako e anga Ngaia nakon Ana kantaninga Tamana.

Ngkai ti mwanea ana kakao Beretitenti Nelson n “kariaia te Atua bwa boton ara iango inanon maiura”,⁸ ti na bon namakinna i bon ibukira bwa te Atua bon “Atuan te kakai.”⁹ I kakoaua bwa ngkanne ti na kona n taekinna ma nanora ae tauraoi ao n nanorinano, O te Atua, “ma akea au taeka, ma e na tauaki am taeka.”¹⁰