Hool’áágóó Bi’ayóó’adaat’éego Aa deetʼáanii: Jesus Christ Bąąhági’ Át’éii Yik’é Niná’ílyáhígíí, Náá’iiná Náádidoojah, Háádidoolnííł

Díkwííshį́į́ nááhaiyę́ę́dą́ą́’, abíínígo yá’átééhii hane’é yaa ólta’di njídjah Diyin God Bizaad bee béé dahahiilniih do biniiyé ła’ deiníílta’. T’áá bínééshdingo saad dah naazjaa’ adaałts’íísíígíí bik’á asht’í łeh. Díí bił ólta’go John 11:35—ts’ídí aláádi saad ts’íísíígíí God bizaad nda’asdzo’ígíí biyi’di éí naakiigo saad—“Jesus atídineesdlı̨́ı̨́ʼ.”

K’ad shí shízį́į́’go, jó Jesus yiichah yínííł dóó ił hózhǫ́ biyi’di éí álílee k’ehgo tʼáá aaníí dahólǫ́ t’áá’aaníí yaa yááłti’: diyingo bee ájítʼéii Diyin God biye’ ats’íís k’ehgo atsʼíísk’eh anoonééł nííyá dóó atsʼíísk’ehgo óóhooł’ą́ą́’ t’áá áłáhjį’ nihił hólǫ́ dóó nihiik’įjidoodlįįł.

Yínííł éí dooda ił hózhǫ́ bee hadadidiilwoshgo, Jesus Christ hadíłt’éego nihik’idiitįįh. Ajooba, bee óhóólnííh, dóó bee adiil biłgo, hool’áágóó bi’ayóó’adaat’éego aa deetʼáanii bídin daniidlı̨́ı̨́ʼgo nihita’ naagháá doo—Jesus Christ Bibąąhági’ Át’éii Yik’é Niná’ílyáhígíí, Náá’iiná Náádidoojah, Háádidoolnííł.

Mary dóó Martha halah Lazarus yinaa atínídiniidlı̨́, daaztsánígíí. Ajooba’ bił hodeesnáá’go, Jesus atínídiniidlı̨́. Lazarus daaztsą́ą́dę́ę́ʼ náábidiisá.

Atis’adeezdzá gone’é i’íí’ą́ą́’go Jesus Jerusalem haasíid. Jesus atínídiniidlı̨́, Bidine’é doo áłah iidoodl’ííł da naaʼahóóhai biyázhí átʼéego. Dííshjı̨́ı̨́di haat’ííshı̨́ı̨́ łahgóó ahódahoot’éego dooleeł nt’ę́ę́ʼígíí bik’ee yínííł danidlı̨́įgo Bibąąhági’ Át’éii Yik’é Niná’ílyáhígíí bee laanaa niidzinígíí nihaandít’ááh.

Ch’il na’atł’o’ii k’idoolyáhígíí biBóhónííhii atínídiniidlı̨́ łeh bá ndaal’á’í yina’adiłkidgo, nihí éí ak’isóó dóó alah diyin k’ehgo áká’análwo’í daníídlı̨́ı̨́go bił óólta’go, “Shich’il na’atł’o’ii k’idoolyáhígíí hait’éego bá anáádeeshdlı̨́ı̨́ł?”

Mary jishchááʼdi sizı̨́ haʼátʼííshı̨́ı̨́ yídin nilı̨́ı̨́’go. Jesus hazhó’ó’go na’ídééłkid, “Haʼátʼíishąʼ baa nicha?” “Tł’éé’ bííghah jicha ndi, abííndą́ą́’ hoł hózhǫ́ǫgo nizhdii’nah.” Náá’iiná Náádidoojah éí hayoołkááł nihich’į’ kól’ı̨́.

Naaltsoos Mormon Wolyéhígíí kéyahgóó biyi’di, da’oodlání diné doo jóołtaʼ ánéelą́ą́ʼ Yich’į’ náádidjahgo, Jesus bi’ił hózhǫ́ éí háádíbı̨́ı̨́h. Atínídiniidlı̨́ łeh.

“Dóó baʼáłchíní, tʼááłáʼí nízinígo, yikʼijisdliʼ, dóó aTaaʼ yichʼįʼ yá sodoolzin.”

“Dóó díí ałtso áyiilaago hanáánácha.”

Díí éí Jesus Christ Daaztsą́ą́dę́ę́ʼ Náádiidzáhígíí Bééhániih éí Jesus Christ biyi’: nihijéí haat’ííshı̨́ı̨́ bídin niidlı̨́ı̨́’go dóó nihiyi’di bee aníít’éhígíí bina’ádíkid nihił náhálni. Nihineeshto’ nahgóó ayiiłdééh ákondi ił hózhǫ́ bits’ą́ą́dę́ę́ʼ nihineeshto’ éí ndaga’.

Nihineeshto’ ndaazlı̨́ı̨́’go, łahda łahgóó ánínéílnééh, baa yá jinídzin łeh. Ndi nihí bik’idiyiitįįhgo Jesus Christ bił bééhózin iiná bi’dadinįįh dóó ił dahazhǫ́ éí adziil biláádi doo bíniil’ą́ą́ daígíí nihaa dadoolyééł dadich’íí’ dóó łikani bii’ tádidááh.

Kéyah Dah Si’ánígíí Shádi’ááhjį’go, azhé’é yichah. Bi’iiná bi’ats’ádinílíídi, bits’i yázhi, bee iina’ náádiilyá. “T’áá haat’íhí da na’ná’dideesh’ááł bik’éhgo náá deests’ééł nisin,” yichahgo ałhéésii’nii’. Shí ałdó’ yiishcha.

Puebla Naakai Bikéyahdi Diyin Bighan Ntsaa Bii’ Sodizin Dóó Bee’ó’ool’įįł bik’i sohodizingi, alah bił k’e hidishnínígíí bineeshto’ binii’ náástłéé’. Yee ánoolninígíí bits’ą́ą́dóó oo’dlą’ dóó niná’ádeet’ą́ągo adeezdíín. Aníí lá, “Todos mis hijos están aquí en el templo hoy” —“Shee’ałchíní t’áá’at’é ahǫ́ǫ́h dííjı̨́ Diyin bighan ntsaa bii’ sodizin dóó bee’ó’ool’įįłdi naakai.” Bóhónííhii bighan biyi’di ałkéé’nda’iizhchį́ ałah nilı̨́ı̨́go éí ił hózhǫ́ dóó baah ahééhwinidzin náhádleeh.

Dabikéyahgi ahééhda’ats’i ałk’inéíjahgo, ahił dabighanígíí dóó dabik’éí ałk’idjį’ daazlı̨́ı̨́’go ałch’į’ yádaałti’. Neeshto’ dich’íí’go éí k’é nda’ahídoodleełígíí t’áá hazhó’ógo yits’ą́ą́’jį’ íílı̨́. Binee’ bitahidiitłidgo, asdzáá ałch’íídígo kin nazhjaa’dę́ę́’ naagháágo aní, “Nił kééhóshtʼíinii, t’ahdoo yóó’ shi’dilneehdą́ą́’, bił danighan bóhosínísa’yéé bik’ídiníítaał nił bééhódoozįįł.”

Báʼiigehii adiʼníłdíingo dóó iiyehii yá’át’ééhii nil’ı̨́ı̨́’go éí Bóhónííhii bighan gone’é ahí’diiljeeh. Asdzání éí tsosts’idiin binááhai, hastiin éí ałdó. Báʼiigehii nizhǫ́nígo, dííjı̨́ yiiba’ ajitíí nt’ę́ę́ʼ. Yee hadiidzaa báʼiigehii hadiil’éé’ yaa yánízingo yooshoł, áádóó łahjį’go náaná. Nihił dahazhǫ́ǫgo nihi neeshto’ ndahazlı̨́. Diyin God adííniidígíí éí bohodoolnííł. Bibee ahaʼdeetʼáanii bee nihik’idajidoodlįįł.

Ła’ alah asdzání bąąh áhásdįįdii bighandi neinitingo, Boyd K. Packer na’nitiní díílt’odgo yóhooł’ą́ą́’. Baa hastiin doo yił aha’deetʼą́ą da bikéédóó, alah asdzání saad bik’e’esch’íí’í yénáálniihgo yee haadzı̨́ı̨́’. T’áh kóne’é jíígo t’áá hooyání atídzaa binahjį’ bee iina’ náádiilyá. “Ashdla’diin nááhai,” asdzání bąąh áhásdįįdii yik’ee jicha, “Bik’ee ti’hwiséénii’ saad diłhashii’, ak’ee diniihí akéédi bee haasdzı̨́ı̨́’ígíí yidiizts’ą́ą́’.”

Jesus Christ Daaztsą́ą́dę́ę́ʼ Náádiidzáhígíí Bééhániih éí Jesus Christ biyi’di bee nihikáá’ análwo’ ałch’enáhiidááh, ahił kʼénáʼahididooʼniił, hazhó’ó tʼáá ákogi ádoolnííl bee k’e nááhidoodleeł, ach’ą́ą́h nibaal t’áá’ ałch’ijí bíighahgi bikáági kééhat’ínígíí. Jesus éí bikʼee yínííł áníítʼéii anéídoołdzih; Aa aʼááh nízin yee íídoolííłgo at’é. Ch’íníhidoo’nił dóó ła’ náaná diné ałdó’ t’áádoole’é nihí bee éí dooda bí yee hadaasdzı̨́ı̨́’ígíí éí dooda yída’iilaaígíí binahjį’ ahííyiiltł’óóh bee ąąshiijéé’ do nt’ę́ę́ʼ.

Jesus Christ Daaztsą́ą́dę́ę́ʼ Náádiidzáhígíí Bééhániih éí Jesus Christ biyi’di bee Diyin God nihichʼįʼ hwee lą́ asłı̨́įʼgo yii’niih doo. Díí nahasdzáan éí ayóó aniilnééz, ayóó aniilts’ísí, ayóó aniitéél—doo ntsííkees da, doo niidzǫ́ní da, éí dooda iisizı̨́ k’ehjí doo yiichįįh da nihiłní. Jesus Christ binahjį’ ats’íís k’ehgo łahgóó áhoonííł, tʼáá ałtsoní hadaałtʼéego hadaníít’ı̨́ı̨́ʼgo binahjį’ ni’iiłchxǫǫhí bits’ą́ą́jį’go diikah.

Jesus Christ Daaztsą́ą́dę́ę́ʼ Náádiidzáhígíí Bééhániih ił hózhǫ́ biłgo, dahwiitaał, “Anoonééł éí yikʼedeesdlı̨́ı̨́’, hastiin éí ch’ínádzá. Christ yee akʼeh deesdlı̨́ı̨́ʼ éí yoosbá.” Christ Bináá’iiná Náádiidzáhígíí anoonééł bits’ą́ą́jį’go nihíí’eezh, da’iikeedígíí bits’ą́ą́’ dasáni daaleehgo dóó ats’íís k’ehgo tʼáá ałtsoní doo hadaałtʼéego bits’ą́ą́jį’go. Jesus Christ Bibąąhági’ Át’éii Yik’é Niná’ílyáhígíí iisizı̨́ k’ehgo háádidii’nííł ałdó’. Bitásiildę́ę́ʼ dił hadahaaznaʼ, jichago dił binééshto’ nahalingo náálı̨́, bąąhági dóó ats’á’aldééh bits’ą́ą́jį’go diikah éí nihaa daasya’. T’áá łáʼí niidlı̨́ı̨́’go, hadíłt’éego dóó diyingo, diné dóó Diyin God bił anéíyoo’dlííł. T’áá ałtso yá’át’ééhígíí bitahgóó, Jesus Christ éí la’ígoo háádidoolnííł—doo éí ałtséédą́ą́’ ádahoot’éhéé ndi náásgóó ádahoot’éé dooleełígíí.

Jesus bee iina’ dóó bee adinídíín éí Diyin God bee ałchíní ayóó’ó’ó’ni’ t’áá aníí at’é. Biniinaaígíí Nihizhé’é Diyin God bee ałchíní t’áá ałtso béédááhaiígíí dóó t’áá ałtsogóó kéhat’íígi ayóó’ayó’níígo’, ayóó’áníhóó’níígo niháhooł’aah baadiikahgo hozyéél dóó ił hózhǫ́ Binahjį’ bik’íniitááh t’óó ayóí diné bee da’al’į’ dóó bee da’iiná bita’góó. Háádishı̨́ı̨́, háágóne’éshı̨́ı̨́, haidishı̨́ı̨́ niidlı̨́, t’áá éí Áyilaií bee ałchíní daniidlı̨́ı̨́go bee nihééhwidílzin. T’áá ałheełt’éégo iisizı̨́ k’ehgo, Islam yikéé’ naakaiígíí, Judaism, dóó Christ dayoodlánígíí Azhe’e Abraham binahjį’ bee da’oodlą’ yik’eh dahiináyéé t’áá éí ałheedaałt’é dóó ałk’idą́ą́’ Egypt biyi’di ádahóót’iidígíí ałha’deet’ą́ą́go bił dááltą’.

Azhe’e Abraham Egyptdi jiniyá dóó bik’ijideesdlı̨́ı̨́’.

Joseph, Egyptdi bichʼįʼ naho’diizniiʼ binaalte’ jizlı̨́ı̨́’go, Pharaoh njizyeelígíí bił bééhoozįįdgo t’áá yiłnínígíí éí tsostsʼid nídoohah tʼáá íiyisí nidaʼntʼąʼ doo áádóó bikéédóó hodichingo tsostsʼid nídoohah. Joseph bił dabighanígíí dóó bidine’é yisdáyíínil. Joseph Diyin God binahat’a ayóó at’éégo jiiłtsáágo jíícha, t’áá ałtso danizhǫ́nígíí Diyin God yił ahada’deest’ánígíí bá ahił ndaalnish.

Moses, Egyptdi Pharaoh bighan gone’é biyaa hoo’a’go, éí Diyin God bee ałchíní ahąą íidoolííł bee’ąąnídítį́hí t’ah índa háádiilyaago bailyá.

Diyin God bá ha’odzíí’éé bi’dadoolnííłgo, Joseph, Mary, dóó awéé’ Jesus Egyptdi bineʼ ahinichéehii hadaneeztą́ą́’. Cairodi, Muslim íiyisíí yoodlání hodísingo ání: “Quran bizaad na’nitingo éídígíí Joseph, Mary, dóó awéé’ Jesus hasih hazʼą́ dóó diyingo hazʼą́ągo shikéyah biyi’di yik’ídaneeztą́ą́’. Shikéyah biyi’di, Jesus ashkii nooséełgo nihich’iiyą’ ayííyą́ą́’, ałtséédi nikidiiltáál, ałtséédi haadzı̨́ı̨́’. Kodi shikéyah biyi’di, tsin wóyahdi dadiigeezgo Bí dóó yił dabighanígíí tsin bineest’ą́ ndayiizláá’go deiniidlą́. Shikéyahdi nihita naagháágo nihidiné dóó nihikéyah bik’idadeesdlį́į́’.

Diyin God binahat’á tʼáá ákogi áániiłii dóó doo tʼáá ákogi áániiłii áádóó ats’íís k’ehgo bee óhólnííhí éí baa áhwiniidzįįh bits’ą́ą́dóó bóhwiil’aah doo nihá hooł’aah. Ła’ nihe’iiná na’nitiní danitsaago éí t’áádoole’é doo bee íida’íít’į́į́’góó bits’ą́ą́dę́ę́ʼ nihee dahazlį́į́’. Ayóó’ó’ó’ni’ biyi’di, Jesus Christ ayaadi dóó wódahdi t’áá ałtso tádííyá. Yaa bił hózhǫ́ łeh bída’iil’įįłii dóó baa nihił hózhǫ́ diyingo bee áníítʼéii, ajoobaʼ niidlį́į́’go bits’ąą’ nihich’įʼ niná’doolyééł doo laanaa niidzingóó, iina’ łahgo ánálnééh dóó aa aʼááh hasin éí oodlą’ bee bich’įʼ náás dooleeł. Áádóó atínídiniidlı̨́ yik’ee yinííł łeh ayóó ’adahoot’éégo diné tidahoonííh, bidiltłish, doo tʼáá ákogi ádahootʼée da bininaa—łahda diné áát’įįłii bits’ą́ą́dóó—ałdó’ yádaa’ąąshdi dóó yá’ąąsh Bidiyin God bił.

Jesus Christ Daaztsą́ą́dę́ę́ʼ Náádiidzáhígíí Dimóó Bééhániih daan gone’é anáháháágo t’áá aníí aníígo iisizí k’ehgo ałkéé’ ahóót’įįł dóó ahiih ádahoot’įįł éí t’áá ałah atah diyingo bik’ehgo ’al’ini Jesus Christ biyi’góó bąąhági’ át’éii yik’é niná’ílyáhígíí, náá’iiná náádidoojah, dóó háádidoolnííł. Díí hodiyingo dóó tʼáá ákótʼéego ahiih ádahoot’įįł éí doo t’áá ahoyání ádahoodzaa da éí dooda doo t’áá bini’dii ádahoodzaa da. Tsin Palm Dimóógo, Dimóó dóó Náádimóójį’ Yoołkááłígíí, dóó Jesus Christ Daaztsą́ą́dę́ę́ʼ Náádiidzáhígíí Bééhániih éí Christ Bibąąhági’ Át’éii Yik’é Niná’ílyáhígíí dóó Bináá’iiná Náádiidzáhígíí bił dahoneeni. K’ad dííjį́, T’ą́ą́chil hastą́ą́ gone’é yoołkááłgo, éí Jesus Christ Binahagha’ Akée’di Dayoołkáałgo Yá Naazínígíí binahoot’ą́ dóó hadiilyaa bee bééhaniih. Díí háádidoolnííł T’ą́ą́chil gone’é nádíziłgo ałtséhígíí Dimóo nohoozhíízhgo ntsaago áłah aleehgo áłah ná’ádleeh.

Jesus Christ, Moses, Elias, dóó Elijah náádahiináágo náádadiidzáígíí éí háádidoolnííł ałdó’ bił yiltą’go Diyin bibe’adziilii bee ’ąą’nída’nídítį́hí nádayiitą́ dóó bee óhólnííhíí Kirtland Diyin bighandi ntsaa bii’ sodizin dóó bee ó’óó’įįł aníídí bik’ih sohodóózingo Jesus Christ Daaztsą́ą́dę́ę́ʼ Náádiidzáhígíí Dimóó Bééhániih gone’é, t’áá áłá’í dimííl yázhí dóó bí’aan tseebíí neeznádiin dóó bí’aan tádiin hastáá nááhaiyę́ę́dą́ą́’. T’áá ahódahoot’é nahaz’ą́ą́’go t’áá akóne’é jı̨́ yoołkááłgo Jesus Christ bisodizin bá hoghan háádiidzaago Diyin God bibee óhólnííhíí dóó bee ak’idajidoodlįįłii Bee ałchíní ahąą íidoolííł, Bee ałchíní Bich’į’ náhiidookah yá ałch’e íílééh, dóó ahił dabighanígíí hool’ą́ą́góó t’áá łáʼí danilı̨́ı̨́ dooleeł. T’áá akóne’é jı̨́ yoołkáałgo háádidoolnííł éí Diyin yá yádaałti’í yaa hadaasdzı̨́ı̨́’ Jesus Christ Daaztsą́ą́dę́ę́ʼ Náádiidzáhígíí Bééhániih dóó Biʼatisʼadeesdzáii Bee Bééhániihii gone’é ádahóót’įįdgo.

Kirtland Diyin Bighan Ntsaa Bii’ Sodizin Dóó Bee’ó’ool’įįł bił yiltą’go, aníídíyę́ę́dą́ą́ hodiyingo Ohidi ła’ nahaz’ą́ą́góó tádííyá éí áádi Diyin Yá Yáłti’í Joseph Smith dóó diné ła’ ił ííshją́ą́ e’el’į́ biyi’déé’ Diyin God Nihizhe’é dóó Biye’, Jesus Christ dayiiłtsá. Diyin Yá Yáłti’í Joseph Smith éí yá’ąąsh nahaz’ą́ą́di ahoołtsą́. Yá’ąąshdi, Yá’ąąshdi Nihitaa’ God, Jesus Christ binahjį’,“bílaʼ yee yinashnishii t’áá at’é yisdánéí’doonił” ła’ Diyin God bee bóhólníihgo bił hazʼáanii bee ayóó átʼéii biyi’ gone’é. T’áá dikwííhí bídahólníihgo doo bá adahóót’i’ da doo “NihiTaa’ God Biye’bich’į’ ííshją́ą́ ííyíilaago Biye’ yits’ą́ąjį’ nídaazyiz.”

Ats’íís k’ehgo na’diníítą́ą́’go, Jesus binaanish yee ha’oodzíí’ nihí t’ááłá’í nitínígo t’áá at’é t’áá nihí íiníídzingo bee nihik’idajidóódlįįł —t’áá ałtso biyi’ hoolzhizhgo, t’áá ałtso nihookáá’gi, t’áá ałtso ádahoonííłígíí. Doo iiyáágóó dízdiin yiiská bikéédóó, Jesus kin biiʼ áłah náʼádleehí biyiʼ góneʼ yaah ííyá dóó ayííłta’, “Diyin Bóhólníihii Bi Ii’sizíínii shiłhólǫ́, háálá shee’yílyáago badahojoobá’ígíí nidinííht’į́į́ł shidooniid; bijéí baańdahookaadígíí nidadiisdzí biniyédaasnáahígíí béédahididoochił na’nitin bee, dóó doo da’oo’ínígíí da’oo’į́ nídadoodleeł, at’́i’dadzaago dastłishígíí bee da’deeshnih.”

Badahojoobáʼíígíí, bijéí daneezgaígíí, daasnáanii, doo daʼooʼíinii, tídiilyaaígíí— éí nihí t’ááłá’í nitínígo daniidlı̨́.

Isaiah binaaltsoos náá bikáágo k’é nda’ahídoodleeł, ch’ínáhídiikah, tʼáá aaníí ákóhodooníiłgo Messiah bits’ą́ą́dę́ę́ʼ bee ha’oodzı̨́ı̨́’ “Dził Záíyangi yínííł danilíinii łeeshchʼiih bitsáskʼehgi nizhóníii áádóó yínííł bitsáskʼehgi akʼah bee ił hózhóonii índa ąąh nahóókaadii bitsáskʼehgi aa haʼniih yée hadadítʼéego baa dideeshʼááł, áko tsin naazkaadii tʼáá ákogi átʼéii Bóhólníihii kʼiidííláhígíí dabidiʼníi doo; éí baa dahojiniih doo biniyé ádeeshłííł.”

Akohgo, deichah, “Bóhólníihii tʼáá íiyisí baa shił nihoozhǫǫh doo; shiiʼ sizíinii éí shiDiyin God bił hóshǫ́ǫ doo, yisdáʼiildééhééʼ yee hashidiilaa índa tʼáá ákogi átʼéii ééʼ shikʼíístiʼ.

Jesus Christ Daaztsą́ą́dę́ę́ʼ Náádiidzáhígíí Dimóó Bééhániih gone’é anáháháágo, nihił dahoneeni, tʼáá ákótʼé hadíłt’éego, Jesus Christ binahjį’ hool’ą́ą́góó ayóó at’éégo aa deetʼáanii: Bibąąhági’ Át’éii Yik’é Niná’ílyáhígíí, Náá’hiináágo Náádiidzáhígíí (dóó nihídó’ bee ha’oodzį́į́’go)’ Bisodizin Bá Hoghan akée’di yoołkááł Háádiilyaago Diyin bibe’adziilii bee ’ąą’nída’nídítį́hí dóó bee óhólnííhíí bił yiltą’go t’áá at’é Diyin bee ałchíní bik’idajidoodlįįł. Yisdáʼiildééh ééʼ dóó tʼáá ákogi átʼéii ééʼ baa nihił dahazhǫ́. Nihí dadidiilwosh, “Hosanna Diyin God bich’į́ dóó Diyin God Be’awéé’!”

“Haalá Diyin God nihokáá’ ayóó’ayó’níígoo, bí eíí biYe’ t’ááłá’í há yizhchíi baazhníłtį́, áko t’áá háiida boodlánii doo ádoodįįł da, ndi iiná íít’i’ii bee hólǫ́.”

Jesus Christ Bibąąhági’ át’éii yik’é niná’ílyáhígíí, bináá’iiná náádiidzáhígíí, náá’iiná náádidoojah, dóó háádidoolnííł éí t’áá anííltso Jesus Christ biyi’ hadaniitáá doo—kʼé hodooleeł, diidleełgo, atah honiidlǫ́go— ha’óólníigo t’áá aníínii dóó baa hózhǫ́ǫgo, ił dahazhǫ́ dóó doo nohonít’i’ da, éí Jesus Christ hodiyiní bizhi’ binahjį’ bá sodisdzin do, amen.