“Díí Binahjį’ T’áá Ałtso Bił Béédahózin Dooleeł Shikéé’ Naazíinii Nílinígíí”
Diyin God dóó Ba’áłchíní ayóó’ííníininígíí bee t’áá aníínii bidziilgo nihił béédahózin díí Yisda’iiníiłii Bi Sodizin Báhooghan át’éhígí.
Lą’í nááhai yę́ędą́ą́’ shich’ooní Sister Uchtdorf Germanydi shádi’ááhjigo bił ni’áázh. K’adę́ę Easter aleehgo, nihik’is ła’ Damóogo sodizin báhooghango nihił díí kah bidii’niid, bí éí doo nihił yah anájahda. Díí nihik’is ayóó’ííníiní, doo ha’át’ao da baa nitsáhákesgo Bóhólníihii Bisodizin Báhooganjí bee na’nitinígí bee bił hwiil’ne’ dóó nhaadíínááł dóó ákǫ́ǫ́ diikah bidii’niid! Aoo’ nihaaadiishááł nihidííniid áádóó nihaaníyá sodizin báhooganídi.
Łahda shį́į́ nihi k’is ła’ sodizin báhooghandi inda áłtséhígí bił noo’áázhgo, íinohsinígí át’ao shí ałdo’ ákót’ao łah Damóo abínígo ákwíísdzaa. T’áá ałsojį’ yá’át’ééhdoo nisin nt’éé’. Nihik’is éí t’áá íyisí ííłta’, ayóo diyink’ehjí ntsékees. Díí áłah az’lį́į́’ígí bił yá’át’éehgo yaa ntsékees doo yą́ą nisin dóó Diyin Bisodizin Báhooghan biyi’ bił yá’áhoot’éeh doo yą́ą nisin.
Naalyéhé báhooghan ch’iyáán ndahaniihígóne’ bikáá’di náánákin bik’eh azláago biyi’di áłahnéidleeh. Kin biyi’ áłah néidleehígí, bine’dę́ę́’go hááda’aldah, t’áádoo le’é daastł’inígí nizhóní halchingo bííghahgo ch’íjíghááh.
Bááh dóó tó básohodizin bee hahoolzhiizhgo, shik’is lá díí hait’ao yaa ntsékees nisin, naashałgo t’óó bá sisti’. Da hwiitaałígí, ndi, doo nizhónígo Tabernacle Choir dahataałígí átao dahwiitaał da. Doo hazhó’ó naazdáágo, áłchiníyázhí ayóó’íitsa’go hahóół’á áłahsiidlíí’ yę́ęgi. Yádááłti’ yę́ę yá’át’éehgo hadahaasdzíí’ ndi, doo éí hasłą́ą́go yádaałti’ígi át’ao hadahaasdzíí’ da. Doo hazhó’ó dahsídáada nt’éé’ ałtso áłah azlį́į’jį’, Sunday School daats’í t’áá yá’át’éehdo nsingo.
Doo ákót’éeda lá.
Éí abíinígí baa shíni’ shik’is da shą’ hainízin díí sodizin báhooghango bił nsiikaigí nisin.
Ííłtso dóó bikéé’doo, hooghangóó nihił na’oolwołgo, shik’is bich’į’ haasdzíí’. Díí bee bił hodeeshnih nisinít’éé’ áłah siidlį’ígí éí t’áádíkwíí áłahnéidleeh dóó Diyin Bisodizin Báhooghan nahalingo áłts’íísígo benáłt’é. Nt’éé’ t’áadoo hasdziihí, bí haadzíí’.
“ Nizhóní yee’go áłah az’lį́į́’,” níílá.
T’áadoo bee haosdziihígóó áshiilaa.
Áadoo áníílá, “Ayóo shił yá’át’ééh sodizin báhooghandi ałnáán dáhágó diné ayóo ałhaadajooba. Ayóó’áda’ahó’ní be’iina’ ałaan ádaat’éindi, dóó ałaan ándzáá dę́ę́’ ndaakaindi. Christ Bisodizin Báhooghan t’áá ákót’ao yinízin nisin.”
Áko, t’áá áko ádaaná iisiskan aanásht’į́įgo ntséskees yą́ą. Shik’is bá t’áá íyisí-haałt’éigo áłah adooleeł bá nisin nt’éé’. Nt’éé’ áko díí kwe’é sodizin báhooghandi áłah nádleehígíí bijéí-hadíłt’éego yee ayóó’áda’óní, dóó ayóo dajooba’, dóó doo tsį́į́ł danilį́įda, dóó ayóo ahíłká anájah.
Nahasdzáán Bikáá’go Oodlą’ Ntsaago Dínóosééł
Shik’isóó dóó shilahkéí ayóó íínish’níinii, dóó t’áá ánółtso ayóó íínish’níinii shik’is nołíinii, Jesus Christ Bisodizin Báhooghan yá Naazinígíí ayóó’íínísh’ní. Díí Yisda’iiníiłii Bi Sodizin Báhooghan t’áá aaníínii át’é, dóó Jesus Christ bina’nitin bee yisda’iildeíhii ninályáhígíí biyi’dóó bee na’nitin. Diyin God bibee adziilíígíí dóó bibee óhólníihii biyi’ hólǫ́. Jesus Christ t’áá bí Bisodizin Báhooghan yilą́ąjį’ yá sizį́, ndaalnishii yik’i dadiil’nii’ dóó bee óhólníihii bá bee lą́ da’azlį́į’go Bíká andaajah, dóó Diyin yá yáłti’íí k’ad hináníígí bá yáłti’, éí t’áá aníí President Russell M. Nelson. Yisdá’iiníiłii Dííshjį́įdi Bá Naazínígíí naanish doo benáłt’éhígí yeidini’ą́ Diyin God ba’áłchíní áłah ándeidoodlííł dóó nahasdzáán bikáá’go hasht’ehootéego Yisdá’iiníiłii Nidoodááłígíí yiba’ hasht’e’ ádadidoolnííł. Díí shił bééhózin bá oo’íinii nishłį́įgo t’áá ałtso t’áá aníí át’é.
Áko bénéilniihdo t’áá haida Jesus Christ Bisodizin Báhooghan át’éhígí áłtsé bił bééhoozįįhígí, éí díí doo áłtsé da Diyin God bibee’adziilii éí doodai’ bibee’o’ool’įįł éí doodai’ Israel dine’é áłahánálnééhígíí doo yaa ntsídaakees da. Hadanihisíídgo bił béédahoozįįh, alááhgo bee’ígí, éí hait’ao ádabósin nihił yáh andaakahgo dóó hait’ao ałch’į’ ádaniit’éhígí.
“Ałhidiniłnáo ayóó’áda’ahíínóhní,” ní Jesus. “Díí éí bee t’áá ałtso bił béé dahózindo Shikéé’ nisoozínígíí.” T’áá áko, éí ła’ nidaakahígíí t’áá aníinii bił bééhoozįįh Jesus Christ t’áá aníinii át’éhígíí bee áhwe’é ayóó’óó’ní hólǫ́ǫgo bikéé’ naazíinii Jesus Christ beed yit’į́įgo.
Yisda’iiníiłii kóníigo haadzíí’ éí Bisodizin Báhooghan ałkidą́ą́’ át’éhą́ągi át’ao ninéédlá áko “éí oodlą’ … nahasdzáán bikáá’go k’ee’aan dínóosééł” Ákohgo, éí diné Jesus Christ Sodizin Bighandi bił áłahnéidleehgo, bidziilgo Yisdá’iiníiłii daYoodlą́ągo anáhákáadoo éí Yisdá’iiníiłii bá yinízin! Nihik’is binááł ayóó áda’ahííníi’níigo yinahjį’ Jesus Christ yich’į’ dahidikááhdoo! Kót’ao éí t’óó báházínígo baa ndailnish t’áá áłahnéidleeh bik’eh.
T’áá hashį́į́h t’áá íyisí Christ yinishdlą́ądoo nízinígíí éí doodago NihiTaa’ Yá’ąąshdi Hólóonii t’áá áhxango bił dahólǫ́ǫdo danízinígí díí sodizin báhooghan Jesus Christ Bisodizin yá Naazinígíí biyi’di yah andaakahgo bił yá’ádaat’éehdo. Áłah nideidleehgo hágo nihaahohkááh dabidii’níigo t’áadoo bá nantł’aaí dóó t’áá doo baa yáhásiní t’áá nihí danihighanídi nihaadíínááł dabididii’niiłígi át’ao.
Aláadi Yá’ádaat’éhígí dóó T’áá Aníiniihígí
K’ad, aláadi yá’ádaat’éhígíí baa yáshti’. Áko díí iiná biyidi, doo t’áá áłahjį’ aláadi yá’ádaat’éhígíí ádeil’į́įda. Áádóó “aláadi yá’ádaat’éhígíí beiníłką́ągo inda,” t’áá áłahjį’ aláadi yá’ádaat’éhígíí dóó t’áá aníiniígí bita’gi haz’ą́ą doo. Ákoshą’, Sodizin Báhoogandi áłah néidleehídi doo bííghahgo aláahdi yá’ádaat’éhígí bąąh ádingo? Ákohgo, t’áá ha’át’ííshį́į́h biniina, sodizinjí áłah néedleehígíí doo bííghahgo t’ahdoo hazhó’ó yee nda’nitindagóó oodlą’ haałtei éí doodago ayóó’ó’nínígíí? Éí doodago éí yahanéidáahgo doo bídíníilnáago?
T’áá ła’í haz’ą́ągi éí doo i’diilnííł da éí yá’ádaat’éhígíí doo nahjį’ ndidiit’áałda!
Mormon Binaaltsoos áłtsé alą́ąbika’ígíí díí ba’ákonosin nihiłní: “Łahgo nda’iisdzíí’,” ní, “jó éíí éí diné nda’iisíí’ígí át’é; éí biniinaa, Diyin God bidéét’i’ígíí t’áadoo deiyínóhdziihí.”
Da’ naaltsoos wólta’ígíí daats’í biyi’doo—éí doodago sodizin báhooghan biyi’doo da doodai’ ła’ jizį́ daats’í bee holǫ́—bee “doo ákót’éégo í’doolníł’ígíí” dóó “nda’iisíihgo” áádoo ákót’éindi daats’í Diyin God binaanish át’éedo?
T’áá íyisì ayóó’iitsʼa’go ádishní aoo’!
Áko, Bóhólníihii aláadi yá’át’éehgo bee hinii’nánígíí binahjį’, t’áá ałtso ałdó’ bá bidiilkaal doo. T’áá łá’í niidzínígo náás yiikah, dóó Yisdá’iiníiłii ba’ííníidlí t’áá ałtso bee náás yiikahígí bee. T’áá łá’í niidzínígíí bá t’áá aníí ákót’é, dóó t’áá aníí Diyin God bił haz’ą́ą́di ákót’é.
Bóhólníihii éí doo t’óó Shił haz’ą́ądi shich’į’ nohohkááh nihiłníida áko bídanoohdlį́įgo bindaołnish bee náás yit’ih doo. Diyin God éí nihá yoo’į́ “nihijéi biyi’doo t’áá ła’í niidlį́įgo dóó t’áá ła’íigí bee nstíikeesgo.” Áádóó nihijéi bee t’ááł’á’í niidlíidoogo éí, nihijéi niłtólígo ííníilzingo, dóó t’áá íyisí binéilnishgo nihijéi niłtólí dooleeł.
Shijéi łahgo ííshłaago doo ní ntsiníkeesígí bik’ehgo da doo. Doodago éí nijéi łahgo íinilaago doo shí ntsiskeesígí bik’ehgo da doo. Bik’ehgoígí éí Yisda’iiníiłii ntsékeesígí bik’ehgo t’áá áníiltso nihijéi łahgo ádadiilnííł.
T’ahdoo bíniil kááhgo éí, bénéilniih doo: Bóhólníihii éí nihíka’adoolwoł, doo tsistł’aagháahgo t’áá ałtsooí doo bánantł’ada.
Bídíníilná dóó Bídíníit’i’
Áádóó łahda shį́į́h doo bídínóołnáada łeh, t’áá shǫǫdí doo éí t’áásáhí ákwíinohsin da. T’áá áníiltso éí łahda háadida yiidáahgo doo nihéé dahósinígo doo bídíníilnáada łeh ya? Shí éí díí doo t’áá łahídi ákwíísdzaada. Ła’ts’áadah shinááhai yę́ędą́ą́’, shighaan haz’ą́ą́doo ch’inihi’dinoolkaad dóó doo éédahoniilzinda léí’di nii’ná. T’áá ałtsoní łahgo ádaat’é doo ádaat’éhą́ągi ádaat’éeda. Dóó yáshti’ígíí ndi łahgo át’éego áłchíní deidiits’a’go bee shí łahgo ánisht’éhígíí bí éí doo ádaat’éeda. Íídą́ą́’ bik’is nishłį́įdoo bił dahonishłǫ́ǫdo nt’éé’, t’áásáhí sélį́į́’ dóó doo shiłhats’íida nt’éé’.
Díí nahasdzáán bikáá’go, ał’áán ádaat’éhígí ayóo baa ákodaniidzin—ła’ nisiidzį́ éí łahgo ániit’éhígíí bee ał’ąąn nahaz’ą́ągo bá ádeilne’—nahasdzáán bikáá’ hólónígíí bee: bikáa’jį’ yit’inígíí bee, dóó dine’é niidlinígíí bee, dóó nihidine’é bizaad bee, dóó yéilti’ígíí bee, dóó ééhsiitinígíí bee, dóó nihidine’é bee í’ool’įįł bee, dóó niwohjį’ ła’ nááná. Ákót’éendi “Divin God éí doo t’áadoole’é diné yiníł’ínígí át’ao yiníł’į́įda. Diné éí bikáa’jį yit’ínígí yiníł’į́į łeh, ákondi Bóhólníihii éí nihijéí biyi’di át’éhígíí yiníł’į́į łeh.”
Bí éí bił bééhózin, éí t’ááła’ígo haz’áníígíí aláahdi át’é: éí Diyin God be’awéé’ niidlį́. Áádóó éí t’áá áníiltso ákóne’ nihá bíhóghah.
Diné bitah needáago t’áá nihí ádaniit’éhígí át’ao ádaat’éedo daniidzin łeh, dóó yádeilti’ígí át’ao, dóó ída’iil’ínígí át’ao, dóó ntsídeikeesígi át’ao ntsídaakeesgo niidzin łeh. Éí ła’ ákót’éhígí bá haz’ą́.
Jó áko Yisda’iiníiłii Bisodizin Báhooghan góne’, éí Diyin God Ba’áłchíní ałhindeit’ish t’áá haishį́į́h ádeinízinígíí dóó t’áá aaníinii hadeintahígíí. Éí dóó nihits’íís bikáájį’ hadíníit’éhígíí bee da, ndahat’áájí bik’ehgo da, nihee í’ool’įįłjí da, éí doodái’ dine’é niidlínígíí doo bik’ehgo áłah neidleehda. Doo éí hait’ao nihe’iina’ íilyaahígíí bik’ehgo ałhínéikah da. Ałheełt’ao ntsíikeesígíí bik’ehgo, Diyin God ayóó’ííníi’ní dóó bił kééhwiit’ínígíí ayóó’ííníi’ní, dóó Jesus Christ bich’į’ ádaadiniit’ą́ dóó Bina’nitin ninéídláhígíí bee t’ááła’í niidlį́. “Christ t’ááła’í bił niidlį́.”
T’ááła’í bee niidlínígíí éí doo t’áá áníiltso t’ááła’í haz’ánígí nisiidzį́įgo da; jó t’ááła’í niidzínígo t’áá aheełt’ao t’áá łá’íjigo díníit’į́į́’go—Jesus Christ bich’į’go. Doo nisiikai dę́ę́’ biniinaa t’ááł’í niidlį́įda jó diikaigo yéego binailnishígíí bee, doo éí ániit’ínígíí bee da t’áá hazhó’ó be’iil’ínígíí be niilt’ée doógí bíká ádeit’į́.
Díí éí Jesus Christ Bisodizin Báhooghan t’áá aníinii bee ályaa.
T’ááła’í Niidlį́
Diyin God ayóó’ííníníigo, yéego béé honisingo Biye’ bikéé’ yishááłdoo nínízingo, áko éí kodi nihił honílǫ́ǫdoo. T’áá aníí ádíníigo Yisda’iiníiłii bibeehaz’áanii bik’eh honishį́įdoo nínízingo—azhą́ t’ahdoo t’áá ałtsojį’ hadíłt’éego bee í’íléehda ndi—ako éí Jesus Christ Bisodizin Báhooghan Dííshjį́įdí yá Naazinígíí anítahgo bííníghah.
Diné Ninjago ndaakaígíí doo ádaat’éhígi ánt’éego shą́? T’áá íyisí náhaz’ą́—Jesus Christ t’áá łá’í bił nílį́įdo. T’áá áníiltso éí Jesus Christ t’áá łá’í bił nílį́įdogo nihánidzin. Ajaa’ éí t’áádoole’é yidiits’a’ígíí anáá’ doo yíyóóghahda. Akee’ t’áádoole’é ííł’ínígí éí ála’ yee iidoolíiłgo doo ła’yidoolíił da.
Ninaanish éí doo t’áá áłtso nih ánt’éhígi ádaat’éedoogo ádadííliił biyé da. Ákót’éendi áká anánílwo’ígíí ílį́—dóó t’áá ákónéehii bits’ą́ą́doo íhodííłááł!
Azhí T’áá Łá’í
T’áá ałtsoh ntsaago áłah ná’ádleehígí bek’eh, dadiyinígíí dahataałígíí sin yee inhik’idajidlí. Yíísiníłts’ą́ą’go, daats’í nił bééhózin éí dahataałígíí doo t’áá łá’ígí át’ao bizhí dadiits’a’ da. Łahda dahataałígíí sin yee dahataałígí dahnaazhjaa’go bizhí t’áá áhedaałt’éego yee dahataał leh, éí doodagó éí bizhí náánáłahgo át’ao. Akó t’áá ałtso éí dahataałgo nizhónígo íits’a’ łeh, dóó t’áá ałhiijį’ t’áá łá’í danlį́įgo. Dahataałígíí t’áá ła’í nízínígo t’áá aheełt’éego ła’ deidoolíłígíí yíká ádaat’į́: Diyin God yaa dahaniihgo dóó binahjį’ nihijéí biyi’doo Diyin baa ntsíikees do. T’áá ła’í niidzínígo éí nihíni’ bee dóó nihijéí bee t’áá aheełt’éego dadiyinígíí binyé ádeit’į́įdo. Áádóó ákótįįhgo, t’áá aaníigo t’áá łá’ígí binyé ádeit’į́į dooleeł.
T’ahdoo Jesus Christ Bisodizin Báhooghan Dííshjį́įdí yá Naazinígíí bidiinááhgo, éí ádandii’ní nihił yahanááh baa nihił dahózhǫ́ǫgo Yisda’iiníiłii biyiin bee dahwiitaałdo éí “ayóó’ánhó’níigo yisdánihíínilígíí sin.” Níká dadíníit’į́į́’go daniniidzin. Ayóó ádanihííníí’ní. Diyin God Bisodizin Báhooghan ayóo yá’át’ééh biyi’doo Bóhólníihii bíká anánílwo’go dóó ba’áłchíní ałdo’ biká ánánílwo’go.
T’áá íídą́ą́ bee í’iinilaago, tó bee ni’doolzį́į’go Diyin God bił aha’díínt’ą́ągo, t’áá áájí t’éiyá ninizį́į’go “Diyin God bikéé’ níínyáago, áádóó bidine’é bee atay ni’dójíigo,” ahéhee’ atahnílínígíí díí aláahgo dóó diyingo naanish bee álínígíí dóó Jesus Christ Bisodizin Báhooghan biká’anánílwo’ Yisda’iiníiłii yinízinígi átao.
Shik’is Germanydę́ę́’ bits’ą́ą́dóó óhooł’ą́ą́’, Diyin God ayóó’ííníi’nínígíí dóó Ba’áłchíní ayóó’ííníi’ninígíí binahjį’ nahasdzáán bikáá’go t’áá aníínii bił béédahózin doo díí t’áá aníí Yisda’iiníiłii Bi Sodizin Báhooghan át’éhígíí.
Diyin God nihik’ijidlíidoo t’áadoo tsį́ł niidlíní yéego iit’į́įgo nihi Yisda’iiníiłii bina’nitin bee hinii’náadoo, Nihá Nina’nídláhígíí, dóó Bóhólníihii nihá neiníláhígíí at’ao—áko t’áá áníiltsoh nihił béé dahózindo Bikéé’sizíinii daniidlínígíí. Jesus Christ bízhi’ dilzinígíí binahjį́’ ádishní, amen.