ကရုဏာတော်အစီအစဉ်

အသင်းတော်က ကာ့တ်လန်းဘုရားကျောင်းကို ဝယ်ယူခဲ့ကြောင်း ဝမ်းမြောက်စရာသတင်းပြီးနောက်မကြာမီ၊ ပြီးခဲ့တဲ့ဧပြီလမှာ၊ ဥက္ကဋ္ဌ ရပ်ဆဲလ် အမ်၊ နယ်လ်ဆင်က ဩဝါဒနှင့်ပဋိညာဉ်များကျမ်းရဲ့ အပိုဒ်ငယ် ၁၀၉ မှာမှတ်တမ်းတင်ထားတဲ့ ကာ့တ်လန်းဗိမာန်တော်ရဲ့ ဆက်ကပ်ရာဆုတောင်းချက်ကိုလေ့လာဖို့ ကျွန်တော်တို့ကိုဖိတ်ခေါ်ခဲ့ပါတယ်။ ဆက်ကပ်ရာဆုတောင်းချက်ဆိုတာ၊ “ကျွန်တော်တို့ဒီနောက်ဆုံးသောရက်တွေမှာ ကြုံတွေ့ရမယ့် အခက်အခဲတွေကိုဝိညာဥ်ရေးရာအရ ဗိမာန်တော်က ဘယ်လိုခွန်အားပေးနိုင်လဲဆိုတာ သင်ကြားပေးတဲ့အရာတစ်ခုဖြစ်ပါတယ်”လို့ ဥက္ကဋ္ဌ နယ်လ်ဆင်ကပြောကြားခဲ့ပါတယ်။

အပိုဒ်ငယ် ၁၀၉ ကို သင်ရဲ့လေ့လာခြင်းဟာ သင့်အတွက်ကောင်းချီးဖြစ်တဲ့ ထိုးထွင်းဉာဏ်ကို ဖြစ်ပေါ်စေခဲ့မယ်ဆိုတာကို ကျွန်တော်သေချာပေါက်ပြောနိုင်ပါတယ်။ ကျွန်တော်တို့ပရောဖက်ရဲ့ဖိတ်ကြားချက်ကို ကျွန်တော်လိုက်နာခဲ့တဲ့အခါ၊ သင်ယူခဲ့ရတဲ့ အရာနှစ်ခုကို ဒီညနေခင်းမှာ ဝေမျှပါမယ်။ ကျွန်တော်ရဲ့လေ့လာမှုကနေ ပို့ဆောင်ခဲ့တဲ့ ငြိမ်သက်ခြင်းပံ့ပိုးရာလမ်းကြောင်းဟာဆိုရင် ကိုယ်တော်ရှင်က ကရုဏာကြီးပြီး ကျွန်တော်တို့ရဲ့ ကောင်းကင်ဘုံရှင်အဘရဲ့ ကယ်တင်ခြင်းအစီအစဉ်ဟာ အမှန်ပင်ကရုဏာတော်အစီအစဉ်ဖြစ်တယ်ဆိုတာကို သတိပေးခဲ့ပါတယ်။

“ခေါ်သွင်းခံရပြီးခါစ သာသနာပြုတို့အား ဗိမာန်တော်ဝိညာဉ်ပကတိအပ်နှင်းခြင်းကို တတ်နိုင်သမျှ မြန်မြန်ရယူရန်နှင့် အခြေအနေများခွင့်ပြုသလောက်ဗိမာန်တော်သို့ မကြာခဏတက်ရောက်ရန် တိုက်တွန်းထား”တာကို သင်သတိထားမိပါလိမ့်မယ်။ ဝိညာဉ်ပကတိအပ်နှင်းပြီးတာနဲ့၊ သူတို့တွေဟာ “သာသနာပြုအမှုတော်ဆောင်ခြင်းမစမီ ဗိမာန်တော်လုပ်သားများအဖြစ်လည်း အမှုတော်ဆောင်နိုင်ပါတယ်။”

သာသနာပြုအသစ်များဟာ ဗိမာန်တော်ပဋိညာဥ်များရဲ့ကောင်းချီးမင်္ဂလာတွေကို လောကမှာမမျှဝေခင်မှာ ဒီပဋိညာဥ်တွေအကြောင်းပိုမိုလေ့လာဖို့အတွက်၊ သာသနာပြုလေ့ကျင့်ရေးဌာန (MTC) မဝင်ရောက်ခင် ဗိမာန်တော်မှာ အချိန်သုံးတာဟာ သူတို့အတွက် အလွန်ကောင်းမွန်တဲ့ကောင်းချီးမင်္ဂလာ ဖြစ်နိုင်ပါတယ်။

ဒါပေမယ့် အခန်းငယ် ၁၀၉ ကိုလေ့လာရာမှာ၊ ဗိမာန်တော်တွင်၊ ဘုရားသခင်ကသာသနာပြုအသစ်တွေကို—တကယ်တော့၊ ကျွန်တော်တို့အားလုံးကို—ထပ်လောင်းပြီး၊ မြင့်မြတ်တဲ့နည်းလမ်းဖြင့် အခွင့်လွှဲအပ်တယ်ဆိုတာကို ကျွန်တော်လေ့လာခဲ့ရပါတယ်။ ဗျာဒိတ်တော်အားဖြင့်ပေးခဲ့တဲ့၊ ဆက်ကပ်ရာဆုတောင်းချက်မှာ၊ ပရောဖက် ဂျိုးဇက်စမစ်က၊ “ကိုယ်တော်၏ ကျွန်တို့သည် … ကိုယ်တော်၏ နာမတော်ကို သက်သေခံရန် ကိုယ်တော်၏ အိမ်မှ ထွက်ကြသည့်အခါ၊” “ကြီးမြတ်သောသူများ” နှင့် “ခပ်သိမ်းသောဆင်းရဲသားများ၊ ချို့တဲ့သောသူများ၊ ထို့အတူ ဒုက္ခရောက်သောသူများ” … နှစ်မျိုးစလုံးအပါအဝင် “ခပ်သိမ်းသောလူများ”၏—”စိတ်နှလုံးများ”ကို “ပျော့ပျောင်း”စေပါ လို့ဆုတောင်းခဲ့ပါတယ်။ “သူတို့အပေါ် အားဘက်လိုက်ခြင်းသည် သမ္မာတရားရှေ့မှ နောက်ဆုတ်ပေးနိုင်စေခြင်းငှာ၊ ထို့အတူ ကိုယ်တော်၏ လူမျိုးတို့သည် ခပ်သိမ်းသောသူတို့၏ စိတ်၌ မျက်နှာရနိုင်ကြစေခြင်းငှာ ဖြစ်ပါ၏။ မြေကြီးစွန်းသား ခပ်သိမ်းတို့သည် ကျွန်ုပ်တို့၊ ကိုယ်တော်၏ ကျွန်များ ကိုယ်တော်၏ အသံကို ကြားကြကြောင်း၊ ထို့အတူ ကျွန်ုပ်တို့ကို ကိုယ်တော် စေလွှတ်တော်မူကြောင်း သိနိုင်ကြစေခြင်းငှာဖြစ်ပါ၏”လို့လည်း သူဆုတောင်းခဲ့ပါတယ်။

အဲဒီ—“သမ္မာတရားရှေ့မှ နောက်ဆုတ်ပေးနိုင်စေခြင်းငှာ” ဘက်လိုက်ခြင်းရှိစေဖို့၊ “ခပ်သိမ်းသောသူတို့၏ စိတ်၌ မျက်နှာရနိုင်ကြစေ”ဖို့ နဲ့ သူတို့ဟာ ကိုယ်တော်ရှင်ထံမှ စေလွှတ်ခံရတယ်ဆိုတာကို လောကအားသိစေဖို့က ခေါ်သွင်းခံရပြီးခါစ သာသနာပြုတစ်ဦးအတွက်တော့ လှပတဲ့ကတိတော်တစ်ခုပဲဖြစ်ပါတယ်။ ကျွန်တော်တို့အယောက်စီတိုင်း ဒီအလားတူကောင်းချီးတွေကို အမှန်ပင်လိုအပ်ကြပါတယ်။ အိမ်နီးချင်းစပ်ဆိုင်သူတွေနဲ့ လုပ်ဖော်ကိုင်ဖက်တွေနဲ့ ဆက်ဆံတဲ့အခါ စိတ်နှလုံးတွေကို ပျော့ပျောင်းလာစေဖို့ဟာ ကောင်းချီးတစ်ခုပဲမဟုတ်လားခင်ဗျာ။ ဗိမာန်တော်ထဲရှိ ကျွန်တော်တို့ရဲ့ အချိန်တွေဟာ တစ်ပါးသူတွေရဲ့စိတ်နှလုံးတွေကို ဘယ်လိုပျော့ပျောင်းစေမယ်ဆိုတာကို ဆက်ကပ်ရာဆုတောင်းချက်မှာ တိတိကျကျမဖော်ပြထားပေမယ့်၊ ကိုယ်တော်ရှင်ရဲ့အိမ်တော်မှာ အချိန်တွေဟာ ယေရှုခရစ်တော်နဲ့ သူ့ရဲ့ကရုဏာတော်ကို ဗဟိုပြုခြင်းအားဖြင့် ကျွန်တော်တို့ရဲ့ကိုယ်ပိုင်စိတ်နှလုံးတွေကို ပျော့ပျောင်းစေတာနဲ့ ဆက်စပ်နေတာကိုတော့ ကျွန်တော်အခိုင်အမာယုံကြည်ပါတယ်။

ကာ့တ်လန်းဆက်ကပ်ရာဆုတောင်းချက်ကို ကျွန်တော်လေ့လာခဲ့စဉ်—အသင်းတော်ရဲ့အသင်းသားတွေအတွက်၊ အသင်းတော်ရဲ့ရန်သူတွေအတွက်၊တိုင်းပြည်ရဲ့ခေါင်းဆောင်တွေအတွက်၊ ကမ္ဘာပေါ်ရှိတိုင်းပြည်တွေအတွက် ကရုဏာသက်ရောက်ပေးဖို့ ဂျိုးဇက် အကြိမ်ကြိမ် အသနားခံခဲ့တာကိုလည်း ကျွန်တော်အံ့အားသင့်ခဲ့ပါတယ်။ ပြီးတော့၊ ပုဂ္ဂိုလ်ရေးအလွန်ဆန်စွာ၊ သူ့ကို သတိရဖို့နဲ့ သူချစ်မြတ်နိုးရတဲ့ အီမာနဲ့ သူတို့ရဲ့သားသမီးတွေအပေါ် ကရုဏာသက်ရောက်ပေးဖို့ ကိုယ်တော်ထံ အသနားခံခဲ့ပါသေးတယ်။

တစ်ပါတ်အကြာ၊ အီစတာ၊ ၁၈၃၆ခုနှစ်၊ ဧပြီ ၃ ရက်နေ့မှာ၊ ကာ့တ်လန်းဗိမာန်တော်မှာ ကယ်တင်ရှင်က သူနဲ့ အော်လီဗာကောင်ဒရီတို့ထံ ထင်ရှားစွာပြတော်မူခဲ့တဲ့အခါ ဂျိုးဇက်ဘယ်လိုတောင်များခံစားခဲ့ရမလဲခင်ဗျာ၊ အဲဒီအကြောင်းကို ဩဝါဒနှင့် ပဋိညာဉ်များ အပိုဒ်ငယ် ၁၁၀ မှာ မှတ်တမ်းတင်ထားတာက၊ “ငါသည် ဤအိမ်တော်ကို လက်ခံတော်မူလေပြီ၊ ငါ၏နာမတော်သည်လည်း ဤနေရာ၌ ရှိလိမ့်မည်။ ထို့အတူ ငါသည် ငါ၏လူမျိုးတို့ကို ဤအိမ်တော်ထဲ၌ ကရုဏာဖြင့် ငါကိုယ်တိုင်ထင်ရှားစွာပြတော်မူမည်။” ကရုဏာဆိုတဲ့ ဒီကတိတော်ဟာ ဂျိုးဇက်အတွက် အထူးအဓိပ္ပာယ် ရှိခဲ့မှာပါ။ ပြီးခဲ့တဲ့ ဧပြီလက ဥက္ကဋ္ဌနယ်လ်ဆင် သင်ကြားပေးခဲ့သလိုပါပဲ၊ ဒီကတိတော်ဟာ “ယနေ့ခေတ် ဆက်ကပ်ထားတဲ့ ဗိမာန်တော်တိုင်းအတွက်လည်း သက်ရောက်မူရှိပါတယ်။”

ကိုယ်တော်ရှင်ရဲ့ အိမ်တော်မှာ ကျွန်တော်တို့ အယောက်စီတိုင်း ကရုဏာကိုရှာဖွေနိုင်တဲ့ နည်းလမ်းများစွာရှိပါတယ်။ အဲတာဟာ ဣသရေလလူမျိုးကို တဲတော်ဆောက်ပြီး ၎င်းရဲ့အလယ်မှာ “ကရုဏာပလ္လင်” ကိုနေရာချဖို့ ကိုယ်တော်ရှင်က ပထမဆုံးမိန့်တော်မူခဲ့တဲ့အချိန်ကစ မှန်ကန်ခဲ့တာပါ။ ဗိမာန်တော်မှာ၊ ကျွန်တော်တို့ပြုလုပ်တဲ့ ပဋိညာဉ်တွေကနေ ကရုဏာကို ရှာတွေ့ကြပါတယ်။ ဗတ္တိဇံပဋိညာဉ်အပြင်၊ အဲဒီပဋိညာဉ်တွေက ကျွန်တော်တို့ကို အဘနဲ့ သားတော်ထံစည်းနှောင်စေပြီး၊ သင်ကြားပေးခဲ့တဲ့ “ဟီဘရူးဘာသာစကားဖြင့် ဟက်ဇက် လို့ခေါ်တဲ့ အထူး ချစ်ခြင်းနဲ့ ကရုဏာ … တစ်မျိုး”ကို တိုးစွာလက်ခံရရှိဖို့ အခွင့်ပေးပါတယ်။

ကျွန်တော်တို့ရဲ့မိသားစုတွေထံထာဝရအတွက် တံဆိပ်ခတ်ခံရဖို့ အခွင့်အရေးမှာ ကရုဏာကို တွေ့ရှိရပါတယ်။ ဗိမာန်တော်ထဲမှာ၊ ကျွန်တော်တို့ပိုမိုရှင်းလင်းစွာနားလည်လာခဲ့ရတာကတော့၊ ဖန်ဆင်းခြင်း၊ လဲကျခြင်း၊ ကယ်တင်ရှင်ရဲ့ အပြစ်ဖြေရာယဇ်နဲ့ ကောင်းကင်ဘုံရှင်အဘရဲ့မျက်မှောက်တော်သို့ တဖန်ပြန်ဝင်ရောက်နိုင်ဖို့ ကျွန်တော်တို့ရဲ့စွမ်းရည်တွေဖြစ်တဲ့—ကယ်တင်ခြင်းအစီအစဉ်ရဲ့ ကဏ္ဍတိုင်း—ဟာ ကရုဏာကိုပြသခြင်းဖြစ်တယ်ဆိုတာပါပဲ။ ကယ်တင်ခြင်းအစီအစဉ်ဟာ “ကရုဏာတော်အစီအစဉ်”ဖြစ်တာကြောင့် ပျော်ရွှင်ခြင်းအစီအစဉ်တစ်ခုဖြစ်တယ်လို့လဲ အတိအကျဆိုနိုင်ပါတယ်။

ကိုယ်တော်ရှင်က သူရဲ့ဗိမာန်တော်တွေမှာ ကရုဏာဖြင့် သူကိုယ်တိုင် ထင်ရှားစွာပြမယ်ဆိုထားတဲ့ အပိုဒ်ငယ် ၁၁၀ ပါ လှပသောကတိတော်အတွက် ကျွန်တော် ကျေးဇူးတင်မိပါတယ်။ ဂျိုးဇက်လိုပဲ၊ ကျွန်တော်တို့ ကရုဏာရဖို့ အသနားခံတဲ့အခါတိုင်း၊ ကိုယ်တော်ရှင်က သူကိုယ်တိုင် ကရုဏာအားဖြင့် ဘယ်လိုထင်ရှားစွာပြမယ်ဆိုတာကို ဖော်ပြထားတာအတွက်လည်း ကျေးဇူးတင်မိပါတယ်။

အပိုဒ်ငယ် ၁၀၉ ရှိ ဂျိုးဇက်စမစ်ရဲ့ကရုဏာအသနားခံချက်ဟာ လှုံ့ဆော်ရာဗျာဒိတ်တော်ခံ ကရုဏာအတွက် သူ့ရဲ့ပထမအကြိမ် အသနားခံချက်မဟုတ်ပါဘူး။ မြင့်မြတ်တဲ့တောအုပ်ထဲမှာ၊ လူငယ်လေးဂျိုးဇက်ဟာ ဘယ်အသင်းတော် စစ်မှန်တယ်ဆိုတာကို သိလိုရုံသာမက၊ “ကရုဏာရရှိရန် ကျွန်တော်သွား၍ တောင်းခံနိုင်သူမရှိတာကြောင့် ကိုယ်တော်ရှင်ထံ ကရုဏာအတွက် တောင်းလျှောက်ပါ၏” ဟုလည်း ဆုတောင်းခဲ့တာပါ။ ကိုယ်တော်ရှင်တစ်ပါးတည်းသာ ပေးနိုင်တဲ့ ကရုဏာလိုအပ်ကြောင်း သူရဲ့အသိအမှတ်ပြုခြင်းက တစ်နည်းနည်းဖြင့်၊ ကောင်းကင်ပြတင်းပေါက်တွေကို ပွင့်စေခဲ့ပါတယ်။ သုံးနှစ်အကြာ၊ ဂျိုးဇက်ရဲ့ “ကျွန်ုပ်၏ ခပ်သိမ်းသောအပြစ်များနှင့် မိုက်မဲခြင်းတို့အဖို့ ခွင့်လွှတ်ခြင်းအတွက် အနန္တတန်ခိုးရှင် ဘုရားသခင်ထံသို့ ဆုတောင်းခြင်းနှင့် ပတ္ထနာပြုခြင်း”ပြီးနောက် ကောင်းကင်တမန်မော်ရော်နိုင်း ပေါ်ထွက်လာခဲ့ပါတယ်။

ကရုဏာအတွက် အသနားခံပြီးနောက် ဖော်ပြခံရတဲ့ ဒီဗျာဒိတ်တော်ပုံစံကို ကျမ်းစာတွေမှာ အကျွမ်းတဝင်ဖော်ပြထားပြီးသားပါ။ ဧနုတ်က ခွင့်လွှတ်မှုရဖို့ ဆုတောင်းပြီးမှသာ ကိုယ်တော်ရှင်ရဲ့အသံကို ကြားခဲ့ရပါတယ်။ လာမောနိမင်းကြီးရဲ့ ဘာသာပြောင်းလဲလာမှုဟာ၊ “ကိုယ်တော်ကိုသိရန် အကျွန်ုပ်၏ခပ်သိမ်းသောအပြစ်တို့ကို စွန့်လွှတ်ပါမည်” ဆိုတဲ့ သူရဲ့ဆုတောင်းချက်ဖြင့် စတင်လာတာပါ။ ကျွန်တော်တို့ဟာ ဒီတူညီတဲ့အံ့ဖွယ်အတွေ့အကြုံများနဲ့ ကောင်းချီးခံစားရမှာမဟုတ်သော်လည်း၊ တစ်ခါတစ်ရံ ဆုတောင်းချက်ရဲ့အဖြေကို ခံစားရဖို့ ရုန်းကန်နေသူတွေအတွက်ကတော့၊ ကိုယ်တော်ရှင်ရဲ့ကရုဏာကို ရှာဖွေခြင်းဟာ သန့်ရှင်းသောဝိညာဉ်တော်ရဲ့သက်သေခံချက်ကို ခံစားရဖို့ အစွမ်းထက်ဆုံးနည်းလမ်းတစ်ခုပဲဖြစ်ပါတယ်။

အလားတူအခြေခံသဘောတရားကို မော်ရော်နိုင်း ၁၀:၃-၅မှာ လှပစွာ သင်ကြားပေးထားပါသေးတယ်။ စိတ်ရင်းမှန်ဖြင့်ဆုတောင်းခြင်းအားဖြင့်၊ ဒီကျမ်းစာအခန်းငယ်တွေကနေ မော်မုန်ကျမ်း မှန်၊ မမှန်ကို ကျွန်တော်တို့လေ့လာနိုင်ဖို့ သင်ကြားပေးရန် မကြာခဏ အတိုချုံးရှင်းလင်းဖွင့်ဟကြပါတယ်။ ဒါပေမဲ့ အဲအတိုချုံးရှင်းလင်းဖွင့်ဟတာက ကရုဏာရဲ့ အရေးကြီးတဲ့အခန်းကဏ္ဍကို လျစ်လျူရှုသလို ဖြစ်သွားနိုင်ပါတယ်။ မော်ရော်နိုင်းက သူရဲ့တိုက်တွန်းနှိုးဆော်ချက်ကို ဘယ်လိုစတင်ခဲ့သလဲဆိုတာ နားထောင်ကြည့်ပါ၊ “သင်တို့ကို ငါတိုက်တွန်းလိုသည်မှာ၊ သင်တို့သည် ဤအရာတို့ကို ဖတ်သောအခါ၊ … သင်တို့ဖတ်ရမည့်အကြောင်းနှင့်၊ အာဒံကို ဖန်ဆင်းတော်မူခြင်းကတည်းက လူသားတို့ဤအရာတို့ကို လက်ခံရရှိချိန်အထိတိုင်အောင်၊ သူတို့အပေါ်၌ ကိုယ်တော်ရှင် အဘယ်မျှကရုဏာ ကြီးတော်မူလေကြောင်းကို သင်တို့သတိရ၍၊ သင်တို့၏စိတ်နှလုံး၌ မှတ်ကျုံး၍၊ စဉ်းစားဆင်ခြင်ရမည့်အကြောင်းတို့ပေတည်း။”

မော်ရော်နိုင်းက—သူတံဆိပ်ခတ်တော့မယ့်—ဒီမှတ်တမ်းတွေကို ဖတ်ရှုရုံသာမက “လူသားတို့အပေါ်၌ ကိုယ်တော်ရှင် အဘယ်မျှကရုဏာ ကြီးတော်မူကြောင်း” နဲ့ပတ်သက်ပြီး မော်မုန်ကျမ်းက ဖော်ပြထားတဲ့အရာကို နှလုံးသွင်း စဉ်းစားဆင်ခြင်ကြဖို့လည်း တိုက်တွန်းထားပါတယ်။ အဲ့တာက “ဤအရာတို့ မှန်၊ မမှန် ဘုရားသခင်၊ ထာဝရအဘအား ခရစ်တော်၏နာမတော်အားဖြင့် မေးလျှောက်” ဖို့ ကျွန်တော်တို့ကို ပြင်ဆင်ပေးတဲ့ ကိုယ်တော်ရှင်ရဲ့ကရုဏာအပေါ် စဉ်းစားဆင်ခြင်ခြင်းပဲ ဖြစ်ပါတယ်။”

မော်မုန်ကျမ်းကို ကျွန်တော်တို့ စဉ်းစားဆင်ခြင်ကြည့်တဲ့အခါ၊ ဒီလိုတွေ မေးကောင်းမေးနိုင်ပါတယ်၊ အယ်လမာသင်ကြားခဲ့တဲ့အတိုင်း၊ ဒီကမ္ဘာပေါ်အသက်ရှင်ခဲ့သူတိုင်းဟာ ရှင်ပြန်ထမြောက်ကြမယ် စုံလင်သောကိုယ်သို့သာ ပြန်လည်ပေါင်းစည်းခံရလိမ့်မယ်ဆိုတာကို ဘုရားသခင်ရဲ့ကရုဏာတော်အစီအစဉ်က အခိုင်အမာပြောတာ အမှန်ဟုတ်ပါ့မလား။ကယ်တင်ရှင်ရဲ့ကရုဏာတော်က ခါးခါးသီးသီး အပြစ်ပေးခြင်းရဲ့လိုအပ်ချက်တွေ အားလုံးကို ပြီးပြည့်စုံစေပြီး၊ ကျွန်တော်တို့ ပေးဆပ်ဖို့ တာဝန်ရှိတာတွေအစား ကျွန်တော်တို့ကို ဘေးလွတ်ရာလက်ဖြင့် “[ပွေ့ထားတော်မူ]နိုင်တယ်လို့—သင်ကြားခဲ့တဲ့ အာမြူးလက် မှန်ပါသလား။

အယ်လမာသက်သေခံခဲ့သလို၊ ခရစ်တော်ဟာ ကျွန်တော်တို့ရဲ့အပြစ်တွေအတွက်သာမက ကျွန်တော်တို့ရဲ့ “နာကျင်မှုများနှင့် ဆင်းရဲဒုက္ခများ” ကို “သူတို့၏အနာရောဂါဝေဒနာများအလျောက် အဘယ်သို့အားဖြင့် မစရမည်ကိုသိနိုင်” ဖို့အတွက် သူခံစားခဲ့ရတယ်ဆိုတာ ဟုတ်ပါ့မလား။ဗင်္ယာမိန်မင်းကြီးသင်ကြားခဲ့သလို၊ ကိုယ်တော်ရှင်ဟာ “မိမိတို့နှင့်စပ်လျဉ်းသည့် ဘုရားသခင်၏အလိုတော်ကို မသိဘဲသေသူများ၊ သို့မဟုတ် မသိဘဲနှင့် ပြစ်မှားသောသူတို့၏အပြစ်တို့အတွက်” အခမဲ့လက်ဆောင်အဖြစ်၊ အပြစ်ဖြေတော်မူတဲ့အထိ အမှန်ပင် ကရုဏာကြီးပါသလား။

လေဟိပြောခဲ့သလို၊ “အာဒံသည် လူသားတို့ဖြစ်တည်နိုင်ကြစေခြင်းငှာ လဲကျ၏။ လူသားတို့သည် ဝမ်းမြောက်ခြင်းရှိနိုင်ကြစေကြောင်း ဖြစ်တည်ကြ၏” ဆိုတာ ဟုတ်ပါ့မလား။ဟေရှာယရဲ့စကားကို ကိုးကားပြီး အဘိနဒိသက်သေခံခဲ့သလို၊ “ငါတို့၏လွန်ကျူးခြင်းတို့ကြောင့်၊ ယေရှုခရစ်တော်သည် နာခဲ့၏။ ငါတို့၏ဒုစရိုက်တို့ကြောင့်၊ သူဒဏ်ရာရခဲ့၏။ ငါတို့၏ငြိမ်းချမ်းခြင်းချမ်းသာကိုဖြစ်စေသောဆုံးမခြင်းသည် သူ့အပေါ်သို့ရောက်၍၊ သူခံရသောဒဏ်ချက်အားဖြင့် ငါတို့သည် အနာပျောက်လျက်ရှိကြ၏” ဆိုတာ အမှန်ဟုတ်ပါ့မလား။

အတိုးချုံအနေနဲ့၊ မော်မုန်ကျမ်းမှာ သင်ကြားထားတဲ့အဘရဲ့အစီအစဉ်ဟာ အမှန်ပင် ဤမျှတောင်ကရုဏာကြီးမားလှပါသလား။ မော်မုန်ကျမ်းမှာပါတဲ့ ငြိမ်သက်ခြင်းပံ့ပိုးပေးပြီး မျှော်လင့်ချက်ရှိစေတဲ့ ကရုဏာရဲ့ သင်ကြားချက်တွေဟာ မှန်ကန်တယ်ဆိုတာ ကျွန်တော်သက်သေခံပါတယ်ခင်ဗျာ။

ဒါပေမဲ့၊ ကောင်းကင်ဘုံရှင်အဘက “အရာ၏အမှန်တရားကို သန့်ရှင်းသောဝိညာဉ်တော်၏ တန်ခိုးအားဖြင့် သင်တို့ထံသို့ ထင်ရှားစွာပြတော်မူလိမ့်မယ်” ဆိုတဲ့ မော်ရော်နိုင်းရဲ့ကတိတော်ကို နားလည်သဘောပေါက်ဖို့၊ သင်တို့ ယုံကြည်မှုအပြည့်နဲ့ဖတ်ရှုပြီး ဆုတောင်းနေသော်လည်း တချို့တွေ ရုန်းကန်ကောင်း ရုန်းကန်နေရအုံးမယ်ဆိုတာကို ကျွန်တော် မှန်းဆမိပါတယ်ခင်ဗျာ။ လွန်ခဲ့တဲ့နှစ်ပေါင်းများစွာက၊ မော်မုန်ကျမ်းကို ပထမတစ်ကြိမ် နှစ်ကြိမ်ဖတ်တဲ့အခါ ကျွန်တော့်ဆုတောင်းချက်တွေကို ချက်ချင်း ရှင်းရှင်းလင်းလင်း မဖြေကြားနိုင်ခဲ့သလိုမျိုး၊ ကျွန်တော်လည်းခံစားခဲ့ဖူးတာကြောင့် ဒီရုန်းကန်မှုကို ကျွန်တော်နားလည်ပါတယ်။

သင်ရုန်းကန်နေရတယ်ဆိုရင်၊ “ကိုယ်တော်ရှင်သည် လူသားတို့အပေါ် အဘယ်မျှကရုဏာ ကြီးတော်မူလေကြောင်း” မော်မုန်ကျမ်းက သင်ကြားထားတဲ့ နည်းအမျိုးမျိုးကို စဉ်းစားဆင်ခြင်ဖို့ မော်ရော်နိုင်းရဲ့အကြံပေးချက်ကို လိုက်လျှောက်ရန် သင့်ကို ကျွန်တော်ဖိတ်ခေါ်ပါရစေ။ကျွန်တော့်အတွေ့အကြုံကိုအခြေခံပြီး၊ အဲဒီလိုသင်လုပ်တဲ့အခါ၊ သန့်ရှင်းသောဝိညာဉ်တော်ရဲ့ ငြိမ်သက်မှုက သင့်စိတ်နှလုံးထဲဝင်လာပြီး၊ မော်မုန်ကျမ်းနဲ့ ၎င်းကသွန်သင်တဲ့ကရုဏာတော်အစီအစဉ်ဟာ မှန်ကန်တယ်ဆိုတာ သင်သိ၍ ယုံကြည်ပြီး ခံစားနိုင်မယ်လို့ ကျွန်တော်မျှော်လင့်ပါတယ်။

အဘရဲ့ ကြီးမြတ်တဲ့ကရုဏာတော်အစီအစဉ်နဲ့ အဲဒါကို ပြီးပြည့်စုံစေဖို့ ကယ်တင်ရှင်ရဲ့ လိုလိုလားလားရှိမှုအတွက် ကျွန်တော်ရဲ့ ကျေးဇူးတင်မှုကို ဖော်ပြပါတယ်။ ကျွန်တော်တို့ ကိုယ်တော့်ကိုရှာဖွေမယ်ဆိုရင် ကိုယ်တော်ရဲ့သန့်ရှင်းသောဗိမာန်တော်နဲ့ ကျွန်တော်တို့အသက်တာတွေရဲ့ကဏ္ဍတိုင်းမှာ ကိုယ်တော်ရဲ့ကရုဏာထင်ရှားစွာဖော်ပြလိမ့်မယ်ဆိုတာ ကျွန်တော်သိပါတယ်။ ယေရှုခရစ်တော်၏နာမတော်အားဖြင့်၊ အာမင်။