Ana Babaire Tamara are i Karawa ibukiia Utu
Taian reirei, otenanti, ao berita aika a tabu n te tembora a kakabwaiai utu ni kabane n te aonaaba.
Kamatata n te tamnei iroun Shawna Tenney
Bon tibwa taai aika a nako, ngai ma Titita Uchtdorf ti ira ana bwabetito tibutorura temanna. Ngkai ti matakuakini rooro aika a mwaiti n rungaa te waaki aei, ti namakina te kakaitau ibukin ana baire Tamara are i Karawa ibukin Ana baire nii kamaiuakiia Natina. Ti namakina kakaawakiia utu ao berita aika a tabu irouna man te moan tai.
Kakaawakina anne e kona n nooraki n te rongorongo n te O Tetemanti n rongorongon ana kakaonimaki Iakoba, are e karaoa te mwananga ae abwabwaki ni kakaean buuna, ni mare inanon te berita ae tabu, ao ni katea ana utu.
N te tairiki teuana, Iakoba e motirawa bwa e na matu n te tairiki ao e karekea te atiibu bwa uningana. E bon rangi n taonna te kua, anne bukina ngke e rangi ni kai reke matuunako—ao man karekea te mii.
Iakobwa e noora “te kaintamwarake ae kateaki i aon te aba, ao e rota karawa tabona: ao n nooria ana anera te Atua n tamwarake ao n ruo iaona.
“Ao, noria, E tei Iehova i etana, ao E taku, Bon Iehova Ngai, ae Atuan Aberaam are tibum, ao Atuan Itaaka” (Karikani Bwaai 28:12–13).
Imwina E karaoi tabeua berita aika a tabu ao ni kakawaki te Uea nakon Iakobwa—berita ake E karaoi naba ma taman Iakobwa ao tibuna, Itaaka ao Aberaam, ni ikotaki ma:
-
Taian berita bwa Iakobwa e na riki bwa tamaia “te botaki ni botanaomata” (Karikani Bwaai 28:3, 14).
-
Te aba ae beritanaki ibukiia ana kariki Iakobwa (taraa Karikani Bwaai 28:4, 13).
-
Taian berita bwa rinanon Iakobwa ma ana “kariki a na bane utu n te aonaaba ni kakabwaiaki (Karikani Bwai 28:14; e katuruturua anne).
E rangi n tabu te bwai are e rinanona Iakoba n te aro are e kangai: “E boni mena Iehova n te tabo aei. … Bon tiaki te tabo teuana aei ba boni maneaban te Atua ao mataroani karawa aei.” (Karikani Bwai 28:16–17). Ma ngaia are, e arana te abo anne Iakobwa bwa Betaera, ae nanona “maneaban te Atua” (taraa Karikani Bwai 28:19, footnote a).
Tembora ai bon aekan raoi te kaintamwarake are e nooria Iakoba. Reirei, taian otenanti, ao berita aika a tabu n ana auti te Uea e reita karawa ma aon te aba. Te berita ae tabu e kona ni kabotauaki ma kain te kaintamwarake are e kaniira riki nakon te Uea. Ao rinanon ara beku inanon tembora aika a tabu, ti kakabwaiaia “ni kabane utu n te aonaaba”—ake ngkoa, ngkai, ao ake a na roko.
Taraakin te Aonaaba ae Kakukurei
Unimwaane Bruce C. Hafen, te emeritus membwa n te Itingaun, e roko tareboniakina mai iroun te eteta n ana bebwa ni kaongara te aba bwa e na taetae i aon taekan te boki ae kabwaranakoi rongorongo ni kawai i aon taian koaua n taekan karawa man aaro aika kakaokoro.
“A kunea taan kororongorongo bwa iai kan ataakin taekan karawa ae butanako iroun te botanaomata—taian utu i karawa,” e taku Unimwaane Hafen. Ma “angiina aaro ni Kiritian a anga te kaeka ae uarereke nakon te kan ataibwai aei”—ma tii teuana ae e aki: Ana Ekaretia Iesu Kristo Ibukiia Aika Itiaki ni Boong aika Kaitira.
N ana Ekaretia te Tia Kamaiu ae kaokaki, ti karekei iai tembora aika a tabu. Iai iroura te mareaki are akea tokina, ma te kariaiakaki ni kabaebae are e karekea te kakabwaia riaon te mate n rabwata. Ti karekei berita n arora ae akea tokina ma naake ti tangiriia i matan te Tama ao te Nati. Man aikai, a katerea taan kororongorongo bwa ana kabwarabwara ae Itiaki ni Boong Aikai i aon taekan karawa ngaia te kabanea ni mataata—ao, I tangiria ni kan reitia, te kabanea ni kakukurei.
N aron ae e a tia n reirei i aona Beretitenti Russell M. Nelson, “Te Uea … e karaoa te aonaaba bwa ti aonga ni konaa ni karekei rabwatara ao ni katei ara utu. E katea Ana Ekaretia ibukin karietatakiia utu. E katauraoi tembora bwa aonga utu ni konaa n reitiia n aki totoki.”
Kamanoan te Utu
E na aki katounakoira ae te bwai ae moan te kakawaki nakon Ana babaire te Atua e na aitara ma te totoko. E taku Beretitenti M. Russell Ballard (1928–2023), “Tatan e ata te koaua ao te kawai ae e rangi n nakoraoi ibukin kamangaoan Ana mwakuri te Uea bwa kakerikaakan nakoraoin te utu ao tabun te mweenga.”
Ataakin ae ti ataia, ti riai n ae ti mena ibuakoia koraki n te aonaaba aika taan kamanomano aika a koaua nakon te utu.
Ti na kanga ni karaoa aei?
Ti konaa ni karaoi “bwaai aika uarereke ao ni bebete” (Aramwa 37:6) aika a kakorakoraa reitakin te utu. Aikai a kairekerekeaki ma reirei aika kaotaki n te katanoata ibukin te utu: “onimaki, tataro, rairannano, ikabwarabure, karinerine, tangira, nanoanga, mwakuri, ao waaki ni kakukurei.” N aki taraa aron tein am utu ngkai, ko konaa ni kaotia n am mwakuri bwa reitaki inanon te utu a kakawaki nakoim ibukin te tai ae akea tokina.
Man arora ni maiu, ni kamanoa, ao n tibwauai koaua n taekan te utu n aki totoki, ti konaa ni buokiia tabemwaang n noora ae “te utu e boboto nakon ana babaire te Tia Karikibwai ibukin uaiakinan ae akea tokina irouia Natina” ao n anne “tembora aika a tabu a anga te konaa nakoia aomata n oki nako matan te Atua ao ibukin ikotakiia utu n akea totokina.”
The Chosen One, by Dan Wilson
“N na Memena Iroum”
Ngke ti matakuakiniia ara utu ngai ma Titita Uchtdorf ni karaoi berita aika a tabu ma Tamara are i Karawa ae tatangira, a kaonaki nanora n te kimwareirei ao te kakaitau. Ti kimwareirei tiaki ti irouia natira ma natiia ma irouia naba ara karo ao aia karo. Ti iango ma te tangira ae korakora n aron te berita ae tabu n te euangkerio ni kona ni katiteuanaira ma rooro nako.
Te berita are e beritana iai Aberaam te Uea, Itaaka, ao nakon naba Iakobwa inanon miina e bon kaineti nakon taian utu. Ao n reitinako nakoia ni kabane Natina inanon te berita ae tabu—n raonaki ma ngkoe ao ngai. “Noria,” e taku te Uea, “I memena i roum, ao N na kawakiniko n tabo nako akana ko na nako iai, … ao N na aki kitaniko” (Karikani Bwai 28:15).
I berita nakoimi bwa ngkana kam iriira ma tibwauaa ana kainibaire Tamara are i Karawa ibukiia utu, E na bon raoraoniko, moarara riki n taai ake a roko kataakim ke kataakia ake ko tangiriia. E na uotiko, tabekikorake, ao ni kairiko nakon te kimwareirei ae tabwanin Irouna, ma Natina Iesu Kristo,ao ma am utu—n akea tokina.