Kaubwai aika Karabaaki
Kunean ana Mwakuri ni Kamaiu te Tia Kamaiu n Te O Tetemanti
Kaaniko taraia; reiakina ae nano riki.
A taku n aia iango tabeman aomata bwa te O Tetemanti, are e a kaman koreaki imwaain bungiakin te Tia Kamaiu ao e aki taekina Iesu Kristo n arana, e karako naba taekinan te Itita inanona. Ma n aron ae kamatataaki n ana Boki Moomon, aomata n taai ake ngkoa a ataia ao iai aia onimaki iroun te Tia Kamaiu, naba (taraa Iakobwa 4:4).
A reireinaki Tibun Iteraera bwa oin bukin ana tua Mote bwa aonga ni kairaki nakon Kristo. Te katooto, ngke a kamarurungaki man tenaakiia n te naeta ae boitin man taraakin te naeta ae karaoaki n te buraati are e tua te Uea bwa e na karaoaia Mote, e reireinia Mote bwa aio bon te kanikina ibukin te Tia Kamaiu, are e na roko ao ni kamaiuiia man aia bure (taraa Warekaia Iteraera 21:7–9; Aramwa 33:18–20).
Ae kananokawaki, kamataatakina aika mwaiti akanne a bua man te Baibara ae iai iroura ngkai, ni kaeti ma taian bitaki—ae nanonaki ni karaoaki ao n ae tiaki te kaantaninga—rinanon bubua n ririki ma ririki (taraa 1 Nibwaai 13:23–27).
Ma ngkana ko taraia, ko bon kona ni kunei bwaai ni kakoaua ibukin te Tia Kamaiu ao Ana Mwakuri ni Kamaiu n te O Tetemanti. Ti na maroroakina taekana tabeua!
Tabatin te Bwaam, Ketetemwane, ao te Kataaki
“E nako im am Uea, E raoiroi, ao iai i Rouna te kamaiu, E nimamanei, ao e toka i aon te ati, ao i aon te ati te tei ae bunin te ati” (Tekaria 9:9).
E a korobukin aio i aon te bwai are e aranaki bwa Tabatin te Bwaam, itibong te bong imwaain te Itita , ngke e rin Iesu i Ierutarem ma te tokanikai (taraa Mataio 21:15).
“E koaua ba e anai rawawatara, ao n uouoti nanokawakira, ma ti taku bwa E boaki ma n oreaki iroun te Atua, ao e karawawataki” (Itaia 53:4).
I Ketetemane, e korakai te Tia Kamaiu ibukin aia bure aomata ni kabane—ao n namakina te rawawata, te maraki, te aoraki ao te karawawataki—ibukiia aomata nako ake a tia ni maeka i aon te aba ke ake a na maeka i aon te aba. Ibukin aio, E ataia bwa e na kanga n anganiira te raunnano inanon kataakira (taraa Aramwa 7:11–13; taraa naba Mataio 8:17).
“E bwainikirinaki, ao e karawawataki, ma e aki kauka wiina; e kairaki n aiaron te tiibu te teei are e na tiringaki, ao n aiaron te tiibu are roko i mataia taan koroburaeia ao e aki kauka wiina” (taia 53:7).
E teimatoa ni kainabwabu Iesu ngke e titirakinaki iroun te ibonga ae reitaata (taraa Mareko 14:60–61).
Tauraki Iesu n te Kaibangaki
“A otabaniniai te botaki n aomata ae buakaka: a ewari baiu ma waeu” (Taian Areru 22:16).
“A tibai kunnikaiu i buakoia, ao a kaiwa ninirau” (Taian Areru 22:18).
“A anganai te kai ae man ba kanau; ao ngke I taka, ao a kamoai n te beneka” (Taian Areru 69:21).
Te tauraki n te kaibangaki bon te kawai ae kabonganaki n tiringakin te aomata n te tai anne, ma tautian I Rom a bon rangi ni buakaka ma aron kakanikoan ao bwainikirinan te Tia Kamaiu irouia (taraa Ioane 19:1–3; Mataio 27:34–35, 48).
Te Mangauti
“E ongaki te mate i Rouna n aki toki; ao E na kaoi rannimata te Uea ae Iehova mani mata ni bane; ao E na uota kamamaean ana botanaomata mai aonaba ni bane: ba bon ana taeka Iehova” (Itaia 25:8).
“Ma I ata au tia kamaiu ba e maiu, ao e na tei rake rimwi i aon te aba: Ao rimwi ngkana e a tia ni kamaunaki kuniu ae rabatau aei, ao N na bon nora naba te Atua ngkana akea irikou” (Iobi 19:25–26).
E a mangauti te Uea Iesu Kristo. E maiu ngkai! A mwaiti koroboki aika tabu ao kakoaua ake a kamatoa aio. Ae kakawaki riki, E a kaman ataia Tamara are i Karawa man moan karikani bwaai ae ti kainnanoa te Tia Kamaiu, ao E a kaman katauraoiia Natina bwa a na butimwaea te Tia Kamaiu n tain te O Tetemanti.