Te Mwananga nakon te Tembora

Kamataata n te tamnei iroun Katelyn Budge

Iai te tai ae e aki reke mwanangau nakon te tembora tao inanon te maan ae onoua te ririki. Ririki aikai bon taai ni karawawata inanon maiu ibukina naba bwa bon te tai ae bua iai tinau. I tangiria ni kan nako n te tembora, ma taraan ae bon teuana te aoa kaeana man mweengau, ao akea au mwane ibukin baou ni mwananga ao akea ae na kairai.

Ngkanne n te ririki ae nako I weteaki n nakoau ae te beretitenti ibukin aia kiraati ataeinnaine. Ngke e butiiai au tia kairiiri n te bootaki n ataeinnaine bwa N na buokia ni bairea kanoan waaki ni kakukure ibukin te ririki, I tuangnga bwa te moan bwai are ti riai ni karaoia ti na nako n te tembora ma kaain te kiraati. Ngke I katanoata aio nakoia ataeinnaine. a rangi ni kukurei! Bwa angiina mai buakoia, ai bon tibwa aia moan tai n iriia. I tataromwaaka ao ni karaoa au aki mamatam ngkai ti katauraoi ibukin te mwananga. I aki tangiria bwa a na iai te bwai ae na nakobuaka.

Inanon te tembora, I namakina te kabebeteaki man taian rawawata nako. I berita bwa N na kamwaita nanakou nakon te tembora. Bon te taneiai ae moan te tamaroa ao te kakabwaia. I bon rangi ni kukurei bwa Ngai ma raou ni kairake ti iira buakon karaoan ana mwakuri ae korakora Tamara are i Karawa.

I ataia bwa te tembora bon te auti ae mimitong, ike a karaoaki iai otenanti aika a tabu. Ikanne, ti kona n tang nakon Tamara are i Karawa inanon te tataro, ao E na kanakoraoi bwaai n Ana tai, kaoniira n te tangira, ao n angiira te rau n aki totoki. I ataia bwa ngkana ti taraa Kristo, ti na noori taian kakai ake ti kainnanoi. Bon ngaira natin Tamara are i Karawa aika a tangiraki, ao iai Ana mwakuri ae korakora ibukira bwa ti na karaoia—ikoikotaia Iteraera n iteran te rabuna ake uoua.