Akea te Tai ae akea irouna te Kaantaninga
Ngkana ti karaua iangoan ae E a tia ni karaoia te Tia Kamaiu ibukira, ti konaa n teimatoa n ataia bwa E raoniira n taai nako.
Te kamataata n te tamnei iroun Albert Espi
Iangoia aongkoa a kabaeaki baim i akuum, ao imwiina ko teweakinako nanon te buuru ae ruaiua te buuti nanona! Tera ae ko kona ni karaoia? Ko na kakorakaiko ni iangoa ae ko na beti ao ni kakuako, ke tao ko na karauko n aki ininimaki ao man kakaea te anga n butakinako man te aro ae kanganga aei?
Uaake a kataneiai ibukin te riki bwa kaain te United States Navy SEALs a aitara ma te aeka ni kakaewenako aei. E aranaki bwa te “drown-proofing.” Boton te iango ko na kaota am konaa n maiu inanon te ran n aekan kanganga aika kakaokoro. Imwiin kabaeaia ao tenakoaia nako nanon te ran, kanoan te ukeraki bwa a na kaiinakoiia nako kabin te buuru n aki kanakoi nanoia, a na kaboonganai waeia n touaa nako kabin te buuru, ni manga oki nako eta, ao man kawaekoaiia n anai ikeia imwaain manga iinakoia riki. Aio e kaokiokaki inanon taai aika baireaki.
Angiina mai buakora a konaa n rinanon te kataneiai n te Taanga ae te SEAL, ma tao a na bon iai bwaai tabeua aika ti kona n reiakinaki mai iai—ao ni konaa naba ni karekea te kakaaitau ibukin Ana mmwakuri Iesu Kristo n anga maiuna inanon te kawai.
Am Tia Kamaiu Rinanon Nako Bwaai
Kaain te SEAL a katine iaon aia kataneiai ma aroia ni kabane ni kakoroan nanon te ukeraki ae karauaki arona ni barongaaki—ao tabeia bwa a na riai ni karaoi nanoia ni kabane ibon irouia. Ti na bon bane n rinanon taian kakaewenako inanon te maiu, ma tiaki n ai aroia kaain te SEAL n aia kataneiai, ti aki konaa n rinanon ara kakaewenako n tii ngaira.
Ngkana ti kabaeaki n te bure, te raraoma, te karawawataaki, ke tao kakaewenako riki tabeua ao man namakina ae ti a iinako, ti konaa n tan nakon Iesu Kristo. Ngkana e roko iroura namakinan ae ti a iinako nako naano ao n aki manga otirake, ti kona ni uringnga bwa te Tia Kamaiu e a tia n roko ikanne, ao E na bon anganiira te korakora bwa ti na totokoira rake, ni manga anaa ikera, ao reitakinakoa karaoan anne. Ma Ngaia, ti aki kona n ae akea te kantaninga.
Iesu Kristo bon am Tia Kamaiu man te bure ao te mate. Iesu Kristo bon am Tia Kabooko ngkana ko kabwaka ao man tangiria n riki ni bwanin inanon te tamnei. Iesu Kristo bon am Tia Bwain Aoraki man marakin am namakin, marakin tamneim, ao n tabetai marakim n rabwata ao rawawata aika bon tii Ngaia ae konaa n katoki. Aikai ao tabeua riki aara ibukin Iesu Kristo a kaota te koaua ae Ngaia bon Temanna ae e na tannako te aba nakoina, e moaraarariki ngkana e kanganga te maiu.
Ma te Itita ae e a tabe n roko, ti rungaa Mangautin Iesu Krsito. E maiu! Ao ibukina ngkai E maiu, ti na manga bon maiu riki ao n karekea te berita n te maiu are akea tokina. Ma imwaain Mangautina, te Tia Kamaiu e karawawataaki i Keketemwane ao ni mate iaon te kaibangaki ibukira ibukina bwa E tangiriira. E “karinanoa iaan bwaai nako”—ni uota tiaki tii rawawatan burera, ma n rinanon naba aekakin nako kammaraki, karawaawata, korakai, ao kaririaki—n te aro bwa E na ata aron buokakira (Reirei ma Berita Aika Tabu 88:6; taraa naba Aramwa 7:11).
Noora Am Kantaningaa Irouna
Ngke E tauraki te Tia Kamaiu, a taraa n akea te kantaninga ni bwaai ni kabane. A urubeke nanoia Ana taan ririmwiina. A tia ni Iriiria, ni Kakoauaa—ao ngkai E a nako. Ngke e a kaweneaki Iesu inanon te nne ni mate, a taonaki n te uruaki n nano ao n akean aia ataibwai. Ma teniua te bong imwiina, n te Tabati, a akea kaain te nne ni mate. E a tia ni uti Iesu Kristo! Tera are e a tia n tara ni bua ngkai e manga riki bwa te kantaninga!
Ngkana a moanna n roo ao man kabwaranano bwaai—kanga ai aron ae a kabaeaki baim ao n tewenakoaki nako nanon te buuru—ao ko aaki noora te kawai n otinako, a naa teutana te tai ao karekea te kantaninga iroun Iesu Kristo, ao uringnga bwa ko bon tuai n roko n te tia.
Te Tia Kamaiu e aki roko n Tabatin te Itita ae kakukurei n akea moa te tokanikai iaon Keketemwane ao te kaibangaki teniua te bong imwaaina. Ma ngaia are, ngkana ko rinanon te tai ae matoatoa, tai taenikai! N aron are taekinna Unimwaane Joseph B. Wirthlin (1917–2008) n te Kooram n Abotoro n te Tengaun ma uoman, “Inanon rotongitongin karawawataara, te Tabati e na bon roko. … E ngae ngke a rawawaata nanora, te Tabati e na bon roko.”
Rinanon Ana mmwakuri n anga maiuna ao Mangautina, Iesu Kristo E teimatoa ikekei ni buokiko ni kunea te rau ao ni mwaingirake n ae raka riki nakon are ko bon kantaningaia.