Nakomai, Iriirai
Te Otinako 12
Ara Toa are Te Riao—te Toa
Iai waaki aika ti tearona imarenan te Toa are Te Riao n taai ake ngkoa ao ara toa ni katoa wiiki.
Kamataataan te tamnei iroun Alyssa Tallent
I mwaain kitanan te maiu n tautoronaki i Aikubita irouia tibun Iteraera ake ngkoa, a tuangaki bwa a na irii nanon kaetieti mairoun te Uea bwa aonga anera ake taan tiritiri ni kamaiuiia, ke n riaoia (taraa Te Otinako 12). I mwiin kitanan Aikubita, a kakaraoa te baka n amwarake aei ni katoa ririki tibun Iteraera, ae e aranaki bwa te Toa are Te Riao. n ururingnga bwa e kanga te Uea ni kamauiia Ana aomata.
N ana kabanea ni wiiki ni maiuna, e ira te Toa are Te Riao Iesu Kristo. Are ti aranna te baka anne bwa te Kabanea ni Katairiki. E kabongana te tai ane e onoti anne te Tia Kamaiu ni kabwarabwara te otenanti ae te toa are ti iririia ni katoa wiiki. (Taraa Mataio 26:26–28; Ruka 22:19–20; Reirei ao Berita aika Tabu 20:77, 79.)
Aikai tabeua waaki ae ti tearona imarenan te moan Toa are Te Riao, ana Kabanea ni Katairiki te Uea, ao te toa ni boong aikai are e kona ni buokiira n ururinga kamaiuakira rinanon te Tia Kamaiu.
Te Kariki
Te Toa are Te Riao: Inanon itiua te bong, tibun Iteraera a kana te kariki are e aki karikaki (are e waekoa aron karaoana ao ni kakerikaaka reken te bwebwe ao te mka).
Te Kabanea ni Katairiki Iesu Kristo e kakabwaia ao n tatabeutaa te kariki ae aki karikaki ibukin te Toa are Te Riao, ao E anganiia ana reirei. E tuangiia bwa a na kanna bwa kanuringan rabwatana, are E ataia bwa e na n uruakaki ao e na mate ma e na manga uti.
Te toa: Ti kana te kariki bwa kanuringan rabwatan Iesu Kristo.
Iesu Kristo bon te Berena ni Kamaiu. Rinanon Mangautina, ti na bane ni mangauti ma rabwatara aika a kororaoi, aki bareka, ao n aki mamate. E kamaiuiira man te mate.
Raraan te Tiibu te Teei
Te Toa are Te Riao: Te tibu te teei n te Toa are Te Riao, bon te tibuteteei te mmwaane ae itiaki ae teuana ana ririki. E tiringaki, ao raraana e kawawaeaki nako nanon te boora. Hyssop (te taberanikai) e kateboteboaki inanon te boora ao e kabonganaaki n tataraki te raraa iai i tinanikun bouan te mataroa. Aio bon te kanikinaa itinaniku bwa kinaakiia ana aomata ni berita te Uea bwa a na riaoaki irouia anera ake taan tiritiri bwa a aonga ni kamaiuaki man te tautoronaki i Aikubita.
Te Kabanea ni Katairiki: Iesu Kristo e kabongana te wain n tei ibukin raraana. E tuangiia Ana reirei bwa a na nimma bwa kanuringan raraana are e kawaewaeaki ibukiia ibukin kabwaraan aia bure ao e riki bwa mwakoron te berita ae boou.
Te Toa: Ti nima te ran bwa kanuringan raraan Iesu Kristo.
Iesu Kristo bon ana Tibuteteei te Atua. E kawaewaeaki raraana ngkai E korakai ibukin ara bure ao mamaaraia. Raraana—Ana anga karea—e kaitiakiira. E kainoamataira man te bure.