Te Itita N Taainako
Karika te Itita bwa te tai ibukin te kantaninga man kaaniakin riki te Tia Kamaiu.
Kamataataa n te tamnei iroun Toby Newsome
N moan Tabatin te Itita, ngke Maria te I-Maketara ao aine riki tabeman a kawara ana nne ni mate Kristo, e tuangiia te anera, “Akea ikai: bwa E a uti” (Mataio 28:6). Te rongorongo aio e uota te kantaninga ae bati nakoia Ana taan iriiria imwiin te karawawataaki are a kakoaua n Taurakina.
Te kabanea n tamaroa n rongorongo? Te rongorongo anne e teimatoa ni koaua. E teimatoa n uti Kristo. E bon teimatoa n tokanikai iaon te mate ao te bure. Ao te kantaninga are e roko man Mangautina e bon teimatoa n tauraoi nakoim—tiaki n tii tain te Itita, ma ibukin taai ni kabane!
Te Itita bon tiaki tii te bong ae ko konaa ni karinea iai te Mangauti. Katai iango tabeua aikai ni karaoa te Itita—ao waaki n rungaa te Tia Kamaiu ao Ana mmwakuri n anga maiuna ao Mangautina—te tai ae bwanin ibukin te kantaninga ao te kimwareirei.
Kamatebwaia Maiun te Tia Kamaiu
Koroboki aika a tabu bon bwaai ni mmwakuri aika korakora ibukin buokam n ata Iesu Kristo n reitakim ma ngaia ao ni kakorakoraa am onimaki i Rouna. Inanon taain te Itita, ko konaa ni kabotoa am kamatebwai n koroboki aika a tabu iaon ana kabanea ni wiiki ni Maiuna ke n Rokona nakoia kaain Amerika bwa te Tia Kamaiu ibukin te aonaaba are e maungauti. Warekakin rongorongo aika mwakaroiroi aikai a kona ni buokiko n namakina ana tangira te Tia Kamaiu ibukim ao ni mataata riki n Ana Mmwakuri n Anga Maiuna ao Mangautina.
Ngkana ko aki ata te mwakoro n rongorongo ae ko na kamatebwaia raoi, ko kona ni kataia ni iira te kairi ibukin kamatebwaian te Itita n te Nakomai, Iriirai ke kairi riki tabeua ibukin kamatebwaian te Itita a kana a koreaki iaon ChurchofJesusChrist.org.
Ira Buakon te Mmwakuri n te Tembora
Tokanikain Kristo iaon te mate ao te ataibwai are ngaira ti na manga uti naba bon “te kabanea ni mimitong mai buakon rongorongoia aomata nako.” Bwa ibukin Ana Mmwakuri n Anga Maiuna ao Mangautina, ara utu a kona n teimatoa n aki toki, ao ni kabane ara bakatibu a konaa ni karekei taian berita aika a tabu.
Ko konaa n rungaa Mangauti Iesu Kristo ao n reita Ana mmwakuri ni kamaiuia tamnei ake n te aonaaba ni kaikain (taraa 1 Betero 3:18–20) man karaoakin te riki n te utu ao te mmwakuri n te tembora. Am beku n te tembora e karekea aia tai tamnei akanne n rineia bwa a na karekei naba ni kabane kakabwaia man Ana Mmwakuri Kristo n Anga Maiuna.
Beeku Ibukiia Tabemwaang n Aiaron Kristo
E tabekiiarake ao ni beku ibukiia tabemwaang Iesu Kristo ni kabanea bongin Ana mmwakuri n te maiu aei—e ngae naba ni menana iaon te kaibangaki. Ko konaa ni karinea Ana banna ni katooto man karoan te beku ibukiia aomata aika irarikim n aron are E karaoia. E ngae n tii te mmwakuri n aakoi ae uarereke n aron te moangare n taainako, te kakauongo ni koaua nakoia tabemwaang, ao te ibuobuoki inanon te mweenga e konaa ni karika namakinan ana tangira Kristo. Ngkana ko beku ibukiia tabemwaang, ngkoe ao ngaiia kam konaa ni kaai namakina te kantaninga ao tamaroan tain te Itita.
Anaakin te Toa ni Koaua
E a tia te Tia Kamaiu ni karaoa te katei ae na buokiko ni Uringnga riki nakon bwaai riki tabeua: te toa. Anaakin te toa e kaotia bwa ko tauraoi n “taainako ni Ururingnga ao ni kawakin Ana tua,” ao ni kaekaan anne E berita bwa e na “memena Tamneina taainako [iroum]” (Reirei ma Berita Aika Tabu 20:77). Anne bon te berita ae korakora! Ngkana ko anaa te toa ni katoa wiiki, ko konaa ni moana karekean namakinan koauan te berita anne n te Itita ao n taainako.
Kataia ururing iaon ana mmwakuri Iesu Kristo, ana Mmwakuri n Anga Maiuna, ao Mangautina ngkai ko anaa te toa. Tataro ma nanon ni koaua, ao ni kataia ni iangoa aron Ana anganano n tia ni kakabwaiako n arom.