Ko Aki Kainanoia n Riki bwa te Tia Rabakau

Eric D. Snider

Ana Maekatin te Ekaretia

“Ko taarena” ke ko aki, ni kabane a konaa ni karekea te ungannano.

Angiina mai i buakora ti a tia n noori mwakoron tamnei ke kamataku ao n taku inanora: “I rangi ni kan karaoa anne, ma e aki tau au taarena.”

Angiin karaobwai aika mamaten nanom a bon karaoaki irouia aomata aika bati aia tarena ae a bungiaki ma ngaia. Ma ko na bae ni mimi bwa e kanga te aomata ae bon akea ana ataibwai ni karekea te ungannano.

“Let Easter Anthems Ring,” teuana mai buakon anene n te booki ae e a tibwa katokaa te Ekaretia, e koreaki taekana iroun Ae Itiaki ae arana Larry A. Hiller. Bon ngaia te tia koroboki ao eteta ae kinaaki n ana mwakuri (e a ritaea ngkai), ma tiaki te tia koroanene. Tiaki te tia anene ae kinaaki ke katangitang, naba.

Bon tii te aomata ngaia ae tatangira te katangitang ao ni iai irouna iango aika kaunganano.

Inanon rikina bwa te tarekita n te kuaea n te uoote n ririki aika a nako, Tari Hiller e kataneiaa baina ni koreakin taekan kuuna ma te anene ni kawai are e kunea. E rangi n tatangira te bwai are e karaoia anne ao e titirakina raoraona ae mwakuri n te Ekaretia ngkana e ataia ae iai riki kuuna aika a kainnanoa taekaia aika boou. E kaotii nakoina kuna n te boki aika a oteaki in te 1800 tabun.

E taku Tari Hiller, “I tekateka ma taian anene akanne ao taekaia a roko n au iango n te tai ae tawe: ‘Teirake, ngkami Aika Itiaki, kukurei.’ Ao mai ikanne I a kona naba n namakina taekana ni kabane ao tera ae tangiraki ibukina—te kuna ni kakatonga ibukin te Tia Kamaiu.”

Te kuna anne a boretiaki n te Entiain inanon 2012. Iai aua kibuna ao e kaineti ma taekan ana Mwakuri Iesu Kristo n Anga Maiuna. “E korakora ana boboto iaon ae ‘ko na manga nooria aika ko tatangiria; iai te mangauti,’” e taekinna Tari Hiller. Ngke e kanakoa ana wewete te Ekaretia ibukin anene n te boki aika boou, e tuangaki Tari Hiller bwa e na manga kabotoi taekan ana anene iaon riki te Itita.

Imwin bitakin taekan te kuna—e ngae ngke te moan rain ae, “Rise up, ye Saints, rejoice,” e tiku n arona—e a karekea te kuna n te boki ae teniua kibuna Tari Hiller ae “Let Easter Anthems Ring.” Ko konaa n ae ko anene n tain te bootaki n toa n tain te Itita aei!

E karekea ungan ana namakin Tari Hiller ngke e korei taeka?

“E karekea te kananorinanoaki ngkana I kona n taekinna,” e taku. “Ma eng. Iai taai ake I namakini iai kaotin taeka n roko nakon au iango. E karekea te nano ni kakaitau ao te kimwareirei ae karaunano. Ao I konaa n teimatoa n namakina te eko man te kimwareirei anne ngkana I kaoka warekan te bwai teuana are e raka rotakiu iai n te tai anne. Akanne n tii ngaiia a kaokii namakin n te koaua. Kanga ai aron ae manga maiuakinan bae e a tia n riki.”

A bon bae aomata n tatangira te kuna, ma e tara n ae teuare e mwaiti ae reke iouna bon te (oroturam) … temanna are e koreia! Kabonganaakin ara tarena ao iango aika kaunganano a aki tii kakabwaiaia tabemwaang—a kakabwaiaira, naba.

Kawai ibukin Tarena

Reiakin ni kabane ake ko konai. “Ni kabane tein kario iai rabwataia ao tuaia,” e taku Tari Hiller. “Reiakinakin akanne ao irakin nanoia e kakorakoraa am konabwai, e karikirakea tamaroan te bwai are ko karaoia.”
E bongana taeka n kaetieti. E taekinna Tari Hiller bwa e rangi ni kakaitau irouia taan eteta ao tabeman ake a buokia ni karaoi kuuna aika tamaroa.
Ko aki n ae ko na rangi ni bwakuaku. Ngkana ko tatangiria n karaoa te bwai ni kakauiango, karaoia! “Tatangiria,” e taku Tari Hiller. “Karika am kakauiango bwa e na butinako.”
N tokin te tai, boni i bukim. E a tia ni korei kuuna tabeua Tari Hiller aika a aki kona n boretiaki n taabo nako. E aki akaka. “E ngae ngke e aki konaa ni boretiaki, e riki bwa te kakoaua nakoiu,” e taekinna. “Anne te bwai teuana ae rang rianako bonganana ae e kona n namakinna temanna.”