Au Otanna

Teuana mai buakon mwakoro n te Nu Tetemanti are e mamate nanou iai e taekina tokanikain Iesu Kristo n rokona i Ierutarem. Ao a takarua aomata, “Otanna nakon Natin Tawita: E na karaoiroaki Teuae nakomai n aran te Uea; Otanna ike moan te rietaata.” (Mataio 21:9). Ngkana I wawareka aio, I iango: Tera au otanna?

Inanon maiu ae bwanin iai kabwakau bwa I rerarera ngkana I taetae. N te tai teuana ma teuana I namakina te rawawata ao te bwarannano ibukina ngkai I aki kona ni kabwarabwaraai raoi n aron are I tangiria. I iangoia bwa ngkana tao I kona n taetae n akea bureburen au taeka ke n aki manga oki n taetae. I aki toki n raoraoma ngkana I taetae imataia te koraki ke moarara riki ngkana I tataro ni kabaibati. I bubuti ma te onnon n te aro ae mabu ibukin te taotaonaki n nano, te rau, ao te buoka n te tai ae bati. Aio teuana mai buakon au otanna ae onoti—tangiu n tataro ibukin kainaomataakiu.

N aron Kristo ngkai e aki kona n ae E na aki mutiakini tangiia aomata n tataro i Ierutarem, E bonaki kona n ae E aki mutiakinai naba. E aki katoka aron kabwakau ngkai I rerarera n taetae, ma E a tia ni kakorakoraai ni kawai ake I aki kaantaningaia. E a tia ni buokai n namakina te rau inanon taai ni korakai n iango ao n ataia bwa bwanaau, ae taraa ni kabwaka, e bon tau Irouna.

Ngaira n tatabemaniira nako iai te bwai teuana inanon maiura ae uotiira nakon bubuan waera. N tabetai, ti bae n namakinna bwa aikoa kaekaaki tangira n tataro. Ma E ongo otanna n tatabeua nako. Ao inanon Ana kawai ao Ana tai ae kororaoi, E na roko ni katauraoa te buoka ibukira.

I Ketetemane, e karawawataaki Kristo ibukin ara bure ao e namakina marakira ao korakaira. E teimatoa ni kairiia ao kabebeteia ni kabane ake a tan Nakoina ao Tamara are i Karawa. Bon te Kristo naba anne are e karawawataaki ibukira i Ketetemane ao i aon te kaibangaki e uti naba man te nne ni mate, e tokanikai i aon te mate bwa ti aonga ni karekea te kaantaninga. Mangautina bon te kabanea ni kaeka nakon otaana n tatabeua nako.