Te māhora o tōna ’ē’a
E’ita paha te ’ē’a o te Fa’aora i te mea ’ōhie, e haere rā ’oia nā piha’i ia tātou ’e e arata’i ia tātou i te vāhi tā tātou e hinaaro i te haere.
Fa’ahōho’ara’a nā Yukai Du
E mā’iti tātou i te hō’ē ’ē’a nō te mea e arata’i te reira ia tātou i te vāhi tā tātou e hina’aro i te haere. Terā rā, ’ua hau atu te reira i te ’ē’a i te tāpaera’a. Tê vai ato’a ra te māhora—te huru o te repo te ’āfa’i ia tātou i roto.
Tē ani nei ’o Iesu Mesia ia tātou ’ia haere nā piha’i iāna (hi’o Mose 6:34 ; Mika 6:8 ; 1 Ioane 2:6 ; Te Ha’api’ira’a Tumu ’e te mau Fafaura’a 19:23). Te ’ē’a tāna e ani nei ia tātou ’ia haere nā ni’a iho, ’o te ’ē’a īa nō te fafaura’a—te ’ē’a nō te hau, te ’oa’oa ’e te ora mure ’ore i pīha’i iho i tō tātou Metua i te ao ra, i te vāhi tā tātou e hina’aro ’ia noho atu.
E aha rā te huru nō teie ’ē’a ? E aha te huru o te māhora tā tātou e haere ’a haere ai tātou nā piha’i iho i te Fa’aora ?
Piriha’o
« Te apiapi rā te ’ūputa e te piri ho’i ’o te ’ē’a e tae atu ai i te ora » (Mataio 7:14).
’Ia tā’ōti’a ana’ehia tōna ’ē’a, tē vai ra hō’ē tumu. Nā te piriha’ora’a o te ’ē’a e tape’a ia ’oe ia ta’ahi i te vāhi e mauiui ai ’oe ’e ’aore rā e mo’e ’oe.
Ti’ara’a
« E mea tītī’aifaro tōna mau ’ē’a » (Alama 37:12).
E ’ere ’oia i te ’ē’a araharaha. ’O te ’ē’a ’āfaro roa a’e nō tā tātou fā nō te ora mure ’ore. E’ita e hahi. I te tahi rā taime, nā tātou e reira nei. Maoti te tāra’ehara a te Fa’aora, e nehenehe tātou e tātarahapa ’oi’oi ’e e ho’i fa’ahou i ni’a i tōna ’ē’a.
Mea topatārere ’e te tahi taime ’ōfāfa’i
« Te ’ē’a i te [fare o te Atua] ’e mea topatārere ’e te tahi taime mea ’ōfāfa’i » (Peresideni Henry B. Eyring nō te Peresidenira’a Mātāmua, « Tauturu ia rātou i ni’a i tō rātou ’ē’a ho’ira’a i te fare, » ’āmuira’a rahi nō ’Ēperēra 2010 [Ensign ’e ’aore rā Liahona, Mē 2010, 25]).
E nehenehe te haerera’a fifi e riro ei mea rahi, ’e e’ita paha ’oe e ’ite i ni’a i te tupua’i o te hō’ē aivi tā ’oe e ta’uma ra. Terā rā, tē ha’apūai nei ’e tē fa’aitoito nei te Fa’aora ia ’oe ’a tūtava ai ’oe i te rave i te mau mea pa’ari tāna e ani mai ia ’oe ’ia rave.
E nehenehe te mau ’ōfa’i i ni’a i tō ’oe ’ē’a e ta’a ’ē i tō vetahi ’ē. Nō ’oe iho tō ’oe mau tāmatara’a ’e tō ’oe huru orara’a. ’O te Fa’aora rā te hoa rātere maita’i roa a’e ’e e tauturu te reira ia ’oe ’ia fa’aruru i te mau fifi ato’a.
’Ana’ana maita’i
« E lāmepa tā ’oe parau i tō’u nei ’avae, e ti’arama nō tō’u nei mau e’a » (Salamo 119:105). « Ia haere rā tātou nā te māramarama, mai iāna i roto i te māramarama ra » (1 Ioane 1:7).
’Ia ha’apōuri-ana’e-hia tō ’oe ’ē’a, e nehenehe te Fa’aora e tūrama i tō ’oe ’ē’a, noa atu ē, ’ua nava’i te reira nō te hō’ē ta’ahira’a ’e i muri iho, i ni’a i tō ’oe tere ho’ira’a i tō ’oe Metua i te ao ra.
’ata’ata ’ore
« E ’ia haere noa atu vau nā te peho ra, ’o te marū pohe, e ’ore ā vau e mata’u i te ’ino, tei pīha’i-ato’a-iho ’oe iā’u : tō rā’au ’e te to’oto’o tei ha’amāhanahana mai iā’u. »(Psalm 23:4).
Noa atu te mata’u, te hepohepo ’e ’aore rā te fifi o tō ’oe ’ē’a, e nehenehe ’oe e fa’ari’i i te hau ma te ’ite ē, ’a haere ai ’oe nā piha’i iho ia Iesu Mesia, e haere ’oia nā piha’i iho ia ’oe ’e e arata’i ia ’oe i te pārurura’a, e ho’i i te Metua i te Ao ra.