E haere mai nā muri iā’u

’Ua ani-a’ena-hia ānei ’oe ’ia rave i te hō’ē mea ’o tā ’oe i mana’o ē e’ita e mara’a ia ’oe ? Pēnei a’e ’ua mana’o ’oe ’aita i nava’i tō ’oe pūai ’aore rā i te māramarama, ’aore rā ’ua pe’ape’a ’oe i te fa’a’ō’o’o ’e i te fa’ahapa a vetahi ’ē. Mai te peu ’ua tupu a’ena te reira mana’o i roto ia ’oe, e’ita ’oe e vai ’o ’oe ana’e iho.

E rave rahi tauatini matahiti i ma’iri, i ora na te hō’ē ta’ata ’o Enoha te i’oa. ’Ua ani te Atua ia Enoha ’ia poro i te tātarahapa i te mau ta’ata—te tahi o te mau ta’ata ’ino roa a’e tā te fenua i ’ite a’enei.

’Aita Enoha i mana’o e mara’a te reira iāna. ’Ua parau ’oia i te Atua ē e mea ’āpī roa ’oia, ’aita tōna hoa i rahi, ’e ’aita ’oia i nāva’i i te māramarama (hi’o Mose 6:31).

E parau fafau rā te Atua ia Enoha. ’Ua parau ’oia i te ta’ata ri’ari’a ra : « ’A haere atu ’e ’a rave i tā’u i fa’aue ia ’oe », ’e « e haere ’ē atu te mau mou’a mai mua atu ia ’oe, ’e e tīpu’u ’ē atu te mau ’ānāvai pape i tō rātou ra tahera’a ; ’e ’ei roto ’oe iā’u nei e pārahi ai, ’e ’ei roto vau ia ’oe ; nō reira, ’a haere mai nā muri iho iā’u » (Mose 6:32, 34).

« ’A haere mai nā muri iho iā’u » ’Auē ïa anira’a manihini iti ’e te nehenehe.

’Ua parau fafau te Atua ia Enoha ē, mai te mea e nava’i tōna itoito nō te ha’amata, ’ei pīha’i iho te Atua iāna i te mau ta’ahira’a ato’a o te ’ē’a. E fa’ariro te Atua ia Enoha ’ei ta’ata mana rahi ma te ha’apūai iāna ’ia rahi atu ā te ’ohipa tāna e rave ’e ma te tauturu iāna ’ia rahi atu ā tāna e riro mai, hau atu i tāna e nehenehe e feruri.

Hō’ē o te mau i’oa e rave rahi o te Fa’aora, ’o Emanuela ïa, ’oia ho’i « te Atua iō tātou nei » (Mataio 1:23). Tei roto i te i’oa ’e te nātura o te Fatu te haerera’a nā muri iho ia tātou. Tei ia tātou te mā’iti—e haere ato’a ānei tātou nā muri iāna ?

I teie mahana, tē hi’o nei tātou ia Enoha mai te hō’ē ta’ata fa’aro’o ’e te hō’ē peropheta rahi ’e mai te hō’ē ta’ata fa’atere. Hou rā te Enoha, te peropheta, i vai na te Enoha, te tamaiti ’āpi, ’o tei fē’a’a iāna iho, terā rā ’o tei mā’iti rā ’ia haere nā muri iho i te Atua.

’Ia fifi ana’e te orara’a, ’ia mana’o ana’e ’oe e ’ere ’oe i te mea nāva’i, ’a ha’amana’o i te parau fafau a te Fatu ia Enoha,’e ia ’oe. E haere ’oia nā muri iho ia ’oe. E’ita ’oia e vaiiho ’ia vai ’o ’oe ana’e iho, noa atu nō te hō’ē noa ta’ahira’a ’āvae.

’Ēmānuela. Te Atua iō tātou. Te Atua io ’oe !

Mai ia ’outou te feiā ’āpī tamāroa, ’ua ani te Fatu ia Enoha ’ia rave fa’aoti i te mau hōpoi’a faufa’a rahi o te autahu’ara’a. Tāna ’ohipa ’o te porora’a ïa i te tātarahapa i te hō’ē nūna’a ’ī’ino. ’Ua fa’a’ite Enoha i tōna mau fē’a’ara’a. ’Ua parau ’oia : « ’E e tamaiti ’āpī ho’i au. « ’E ’ua au ’ore mai ho’i te mau ta’ata iā’u ; ’e e ta’ata reo maumau vau ; ’e nō te aha ho’i ’au i riro ai ’ei tāvini nō ’oe ? » (Mose 6:31).

’Ua pāhono mai te Fatu ma te mana ’e te tāmarū. « ’A haere atu ’e ’a rave i tā’u i fa’aue ia ’oe […] ’A hāmama i tō ’oe vaha, ’e e fa’a’īhia ïa […] Tei ni’a iho tō’u Vārua ia ’oe […] ’e e haere ’ē atu te mau mou’a mai mua atu ia ’oe […] nō reira, ’a haere mai nā muri iho iā’u » (Mose 6:32, 34).

’Ua ha’api’i mai Enoha ē, ’ia hōro’a ana’e mai te Fatu i te hō’ē ’ohipa, e’ita tātou e fa’aruru i te reira ’o tātou ana’e iho. ’Ia rave ’e ’ia ha’apa’o tātou i te mau fafaura’a ’e te Mesia, e haere ïa tātou nā muri iho iāna ma te fāna’o i tōna mana—e riro mai ïa tātou ’ei mauiha’a i roto i tōna rima.

Mai ia Enoha, e hōpoi’a faufa’a rahi tō ’outou : aupuru, tāvini i roto te hiero, fa’atere i te ’ōro’a mo’a, ’imi i te mau pāpa’ira’a mo’a, ora ’ia au i te mau parau tumu o te ’evanelia, tātarahapa, fa’aineine nō te misiōni, ’e tē vai atu ra. E nehenehe te reira e riro ’ei mea teimaha. E nehenehe ’outou e mana’o e’ita e mara’a. ’Aita e fifi. E ’ere te ravera’a ’o ’outou ana’e iho tē ha’apa’o. ’O te mā’itira’a rā i teie mahana—i teie mahana ’e i te mau mahana ato’a—’ia haere nā muri iho i te Atua.

Nā roto i tāna tauturu, e nehenehe ’outou e rave i te mau mea ato’a. E ha’apūai ’oia, e fa’a’ore i te hapa, ’e e tu’u ho’i i te ’aravihi i roto ia ’outou i ni’a a’e i tō ’outou mau ’aravihi nei. ’Ua here ’oia ia ’outou ! Mātou te peresidenira’a rahi nō te Feiā ’Āpī Tamāroa, ’ua here mātou ia ’outou ’e tē tīa’i maoro nei mātou i te ’āmui atu ia ’outou nō te tuātapapa māite i te tumu parau fa’auru nō 2026 : « E haere mai nā muri iā’u. »