Tā ’oe hōho’a fenua nō te ho’i i te fare
Nō te aha e mea faufa’a roa ’ia māramarama i te fa’anahora’a nō te fa’aorara’a ?
Fa’ahōho’ara’a nā Mackenzie Alexander
I roto i te Buka a Moromona, ’ua ha’amata te peropheta ra ’o Iaroma i tāna pāpa’a parau ma te parau ē : « E aha atu ā ho’i tā’u e pāpa’i i tei pāpa’ihia e tō’u ra mau metua ? ’Aita ānei rātou i fa’a’ite mai i te ’ōpuara’a nō te fa’aorara’a ? » (Iaroma 1:2)
Mai te mea ’ua mana’o ’oia ē, terā te mau mea ato’a tā tātou e hina’aro nei, e mea faufa’a roa ïa te fa’anahora’a nō te fa’aorara’a !
’Oia mau iho ā ! ’O te hōho’a fenua maita’i roa teie nō tō tātou orara’a. ’Ua parau te peresideni Russell M. Nelson i te tahi taime, « Te hāro’aro’ara’a i te fa’anahora’a pāpū maita’i a te Atua e rave te reira i te mau mea huna o te orara’a ’e te pāpū ’ore o tō tātou orara’a a muri atu. »
Nō reira, e nāhea teie hōho’a fenua e tauturu ia ’oe ’ia rātere ma te pāpū ’ore o te orara’a ?
Nō hea mai au ?
’O te Atua tō ’oe Metua i te ao ra. ’I ora nā ’oe i pīha’i iho iāna hou ’oe ’a fānauhia mai ai. ’Ua aroha ’oia ia ’oe !
’Ua fa’ata’a ’o Elder Alan T. Phillips nō te Hitu ’ahuru, « E ’ere ’oe i te tahi hu’ahu’a hape o te natura, e tao’a ’ōvere nō te ’aore, ’e ’aore rā te tahi ano’ira’a nō te tau ’e te mahoi. I te vāhi tē vai ra te hōho’a, tē vai ato’a ra te ta’ata hāmani hōho’a. »
’Ia fifi ana’e te orara’a, e mea māhanahana ’ia ’ite ē tei ’ō nei ’oe nō te tahi fā ’e ’ia hi’ohia ’oe e te aroha o te Metua i te ao ra.
Tē haere nei au i hea ?
’Aita ’oe i ’ō nei nō te haere ma te ’ōpu’ara’a ’ore —e tapaera’a tō ’oe ! Tē hina’aro nei te Metua i te ao ra ’ia ho’i ’oe i te fare iāna ra ’e ’ia riro mai iāna ra te huru. ’Ua fa’aineine ’oia i te fa’anahora’a nō te fa’aorara’a ’ia ti’a ia ’oe ’ia fa’ari’i i te mau ha’amaita’ira’a ato’a nō tōna bāsileia (hi’o Te Ha’api’ira’a Tumu ’e te mau fafaura’a Te Ha’api’ira’a Tumu ’e te mau fafaura’a 14:7).
E tauturu te ’itera’a i te fa’anahora’a a te Metua i te ao ra ia ’oe i roto i te orara’a. ’Ia « rave ana’e ’oe i te hi’ora’a roa » ’e ’ia feruri tiretiera, e rave rahi mau mā’itira’a e mea ’ōhie ’ia rave—mai te mā’itira’a i te pe’e ia Iesu Mesia.
Nāhea vau e tae atu ai i reira ?
Ta’a ’ē noa atu te hōro’ara’ahia mai ia tātou i te tahi tāpaera’a, tē fa’a’ite ato’a nei te fa’anahora’a nō te fa’aorara’a i te ’ē’a nō te haere i reira.
’O Iesu Mesia te hi’ora’a maita’i roa nō te pe’era’a i te ’ē’a nō te ho’i i te fare. Mai te mea e hi’o ’oe iāna—’e e haere nā piha’i iho iāna—e tauturu ’oia ia ’oe ’ia ho’i fa’ahou i te Metua i te ao ra ’e ’ia riro hau atu mai iāna te huru. Mai tā elder Sergio R. Vargas nō te Hitu ahuru i fa’ata’a mai, « I roto i te hōhonura’a ia tātou tāta’itahi, tē vai ra te tahi hina’aro e ho’i atu i tō tātou nohora’a i te ao ra, ’e ’o Iesu Mesia tō tātou rāve’a arata’i. ʼO ʼoia te ’ēʼa. »
Mai te mea e mo’e au ?
Noa atu te hōho’a fenua, e nehenehe ’oe e rave i te tahi ’ē’a hape. E rave noa ā ’oe i te hape. Tera rā, ’eiaha e ha’aparuparu. ’Ua hōro’a mai te Metua i te ao ra i te tahi Tāra’ehara ’ia ti’a ia ’oe ’ia tātarahapa i te mau taime ato’a, ’ia ho’i fa’ahou iāna ra, ’e ’ia riro hau atu mai iāna ra te huru. ’A ha’amana’o : « ’Aita tātou e fa’aea noa i ni’a i te ’ē’a nō te fafaura’a ma te ’ore roa e rave i te hape. E fa’aea noa tātou i ni’a i te ’ē’a nā roto i te tātarahapara’a i te mau mahana ato’a. »
’A tuatāpapa ai ’oe i te fa’anahora’a nō te fa’aorara’a, ’a ha’amana’o ē ’ua fa’ata’ahia te reira ma te here. Tē hina’aro nei te Metua i te ao ra ’ia ho’i mai ’oe i te fare. ’E mai te mea e pe’e ’oe i tāna hōho’a fenua, e tauturu ’oia ia ’oe ’ia tapae ’oe i reira.