« Nāhea vau ’ia fa’a’ite māite i te ‘hotu’ o te ’evanelia ia vetahi ’ē, ’ia ’ite rātou i te faufa’a o te reira nō’u ? »

« ’A ora i te ’evanelia ’ia ’itehia ma te hape ’ore ē e mea ta’a ’ē mau ’outou. Mai te mea e ’ite te tahi mau ta’ata ē tē tāmata nei ’outou i te ora i tō ’outou mau ti’aturira’a, e fa’atupu te reira i te hia’ai i roto ia rātou ’ia uiui. E taime maita’i ïa te reira nō te fa’a’ite i tō ’outou ’itera’a pāpū, tō ’outou here nō te Mesia, ’e te ’oa’oa rahi ’o tā te ’evanelia e fa’atupu i roto ia ’outou. »

Miguel A., 17 matahiti, Asturias, Pāniora

« Hō’ē o te mau hotu o te ’evanelia ’o te ’oa’oa ïa. ’A fa’a’ite i tō ’outou ’oa’oa mai roto mai i te Mesia, ma te mata ’ata’ata ’e te tāvinira’a ’ia vetahi ’ē mai tā Iesu e hina’aro nei. ’Ia ui mai te ta’ata e aha te huru te hōpe’a hepetoma, ’a fa’a’ite atu i te mau mea i orahia i te fare purera’a, nō te tauturu ia rātou ’ia ’ite i te faufa’a mau o Iesu Mesia nō ’outou. »

Eliza S., 16 matahiti, Wicklow, Irerane

« E nehenehe au e ani manihini i te ta’ata ’ia haere mai i te fare purera’a, ’ia ’ite rātou i te maita’i nō rātou iho ! »

Cal L., 11 matahiti, Texas, Marite

« ’Ua fa’ari’i au e rave rahi ha’amaita’ira’a maoti te tāra’ehara a te Fa’aora, ’o tei fa’a’ī i tō’u orara’a i te ’oa’oa. ’Ia pārahi mai to tātou Metua i te ao ra i piha’i iā’u, ’ua riro ïa ’ei tāmahanahanara’a iā’u ’e ’ei ha’apūaira’a iā’u ’ia fa’a’ite i taua ’oa’oa ra. Te fa’a’itera’a i tā’u mau hōro’a ’e mau ha’amaita’ira’a ia vetahi ’ē, e fa’a’itera’a te reira ia rātou i te faufa’a rahi o te ’evanelia nō’u. »

Mariata M., 16 matahiti, Tuamasaga, Hamoa

« Te orara’a i te ’evanelia i te fare ’e i te vāhi ta’ata ’o te ta’ahira’a mātāmua ïa nō te fa’a’ite māite i te reira ! E’ita paha te ta’ata e hina’aro e fa’aro’o i te mea tā ’outou e parau, e ’ite rā rātou i te mea tā ’outou e rave ra, ’e e ’itera’a pāpū pūai te reira. »

Esteicy M., 19 matahiti, Paraíba, Peretīria

« E nehenehe au e fa’a’ite maita’i i te ‘hotu’ o te ’evanelia ia vetahi ’ē, nā roto i te rirora’a ’ei hi’ora’a maita’i nō rātou ’e te ani-manihini-ra’a ia rātou ’ia haere mai i te mau ’ātivite. »

McLayne B., 15 matahiti, Californie, Marite