Ha’api’ira’a i muri mai i te mo’era’a tō’u māmā rū’au

Fa’ahōho’ara’a nā Katelyn Budge

Te mo’era’a tō’u māmā rū’au ’ua riro īa ei tata’ura’a nō’u. Mea fātata roa māua. ’Ua ’oto roa vau. Mai te huru ra ē, ’ua nīoa i te tīa’iturura’a hina’arohia e au ’ua mo’e tā’ue roa.

Hou ’oia ’a pohe ai, e ere roa atu vau i te mea pūai roa i roto i te ’evanelia a Iesu Mesia. ’Ua tūru’i rā vau i ni’a i te mau ’itera’a pāpū o vetahi ’ē. ’I roto rā i taua hepetoma mātāmua ra o te taiā, ’ua haere au i roto i te tahi piha ha’api’ira’a fa’aro’o i reira te tahi ’orometua ha’api’i e ha’api’i ra i te tāra’ehara a Iesu Mesia ’e te fa’anahora’a nō te fa’aorara’a a te Metua. ’Ua ’ite a’era vau ē, e ti’a iā’u e fārerei fa’ahou i tō’u māmā rū’au. E nehenehe tātou e ’āmui-fa’ahou-hia i roto i te orara’a i muri nei nā roto i te mau ’ōro’a o te hiero.

’Ua ha’apūai te reira i tō’u ’itera’a pāpū. ’Ua ha’amata vau i te rōtahi atu ā i ni’a i tō’u Fa’aora ’ia Iesu Mesia ’e ’ia ha’api’i atu ā i tāna ’evanelia. ’I teienei tē ’imi nei au i te mau pāhonora’a nā roto i te mau pāpa’ira’a mo’a ’e te Mai, pe’e mai. E mea au nā’u i te fa’aro’o i te mau a’ora’a o te ’āmuira’a rahi, nā roto iho ā rā i te peropheta, te peresideni Russell M. Nelson. ’A fa’aro’o ai au i te mau a’ora’a, te tūru’ira’a i ni’a i te mau pāpa’ira’a mo’a, te pure ’e te ferurira’a hōhonu, ’e te anira’a i te Vārua Maita’i, e pūai īa tō’u ’itera’a pāpū.

’Ua tauturu ato’a mai te ha’api’ira’a seminaire iā’u ’ia ha’api’i ’e ’ia tūtava ’ia riro mai tō tātou Fa’aora, ’o Iesu Mesia, ’a ’ohipa ai au ma te fa’aro’o, te māta’ita’ira’a i te mau mea nā roto mai i te hi’ora’a mure ’ore, ’e ’ua ’imi i te tahi atu ā ’ite nā roto i te mau rāve’a i fa’ata’ahia.

Ti’aturi i te Metua i te ao ra ’e ia Iesu Mesia ’Eiaha e tūru’i noa i ni’a i tō ’oe iho ’ite, i ni’a rā ia rāua. E nehenehe rāua e tauturu ia tātou ’e e arata’i ia tātou nā roto i te mau tāmatara’a ’e ’aore rā te mau ’ati tā tātou e fa’aruru nei.