Piha ha’api’ira’a ’āpī, mau rāve’a ’āpī
Te tomora’a i roto i te piha ’āpī ’e ’aore rā te pupu autahu’ara’a ’āpī ? Teie te tahi mau mea ri’i nō te hi’o ātea i mua !
Fa’ahōho’ara’a nā Cinta Fosch
Mea pinepine te ha’amatara’a o te hō’ē matahiti ’āpī i te hōpoi mai i te mau tauira’a rahi—tae noa atu i te ravera’a i te tahi tauira’a nō te hō’ē piha ha’api’ira’a ’e ’aore rā te tahi pupu autahu’ara’a i te fare pureraa ! Te fa’aru’e ra ’oe i te Paraimere, te tomo ra ānei ’oe i roto i te Sotaiete Tauturu ’e ’aore rā, i te pupu peresibutero, ’e ’aore rā te haere noa ra ’oe i roto i te piha a te Feiā ’Āpī Tamahine ’e ’aore rā, te pupu Autahu’ara’a a Aarona, teie e toru mea e ti’a ia hi’o atu.
1. Te mau ta’ata ’āpī
E au ra ē, e mea mata’u ’ia haere i roto i te hō’ē piha ha’api’ira’a e te mau pīahi pa’ari roa a’e ia ’oe, terā rā, e rave rahi mau mea tei tu’ati maite ia ’oe i tā ’oe e mana’o ra. E mau pipi ana’e ’oe pā’āto’a nā Iesu Mesia ’o tē tāmata nei i te pe’e iāna. ’Ua riro te tauira’a i te mau piha ha’api’ira’a ’ei rāve’a nō te fa’aro’o i te mau mana’o ’āpī nō roto mai i te mau pīahi ’e te mau ’itera’a ta’a ’ē i tō ’oe—’e rāve’a teie nō te fa’ahoara’a i te mau pīahi ’āpī.
2. Te mau ’ātivite ’āpī
Mea ’ārearea roa te mau fa’anahora’a a te Feiā ’Āpī Tamāroa ’e te mau tamāhine ’āpī E mau rāve’a ’āpī tā ’oe nō te tū’ati atu i te tahi atu feiā ’āpī, tae noa atu i te mau ’ātivite ’e te mau pūhapara’a a te piha ha’api’ira’a ’e a te pupu autahu’ara’a. I te 14ra’a o tō ’oe matahiti, e ti’a ato’a ia ’oe ’ia haere i te mau ’āmuira’a JSF, te mau ’orira’a ’e te ha’api’ira’a ’evanelia (séminaire).
’Ei feiā ’āpī pa’ari, e ti’a ia ’oe ’ia haere i roto i te ha’api’ira’a ’evanelia nā te feiā ’āpī pa’ari ’e te mau fa’a’oa’oara’a tei fa’aineinehia e te Sotaiete Tauturu, te pupu peresibutero, ’e ’aore rā i te pāroita ’e ’aore rā te vāhi putuputura’a a te feiā ’āpī pa’ari.
3. Te mau ha’amaita’ira’a ’āpī
’Ia pa’ari ana’e ’oe, e rahi atu ā tā ’oe mau rāve’a nō te tāvini i roto i te ’Ēkālesia, mai te ravera’a i te mau pāpetitora’a nō te feiā pohe, te ha’amaita’ira’a i te ’ōro’a mo’a, ’e ’aore rā te ravera’a i te hō’ē pi’ira’a (tae noa atu i te fa’auera’a nō te aupurura’a). ’A ha’amaita’i i teie mau rāve’a nō te tupura’a i te rahi i te pae vārua ’e ’ia ’oa’oa i te ha’apūaira’a i tō ’oe tū’atira’a i te Metua i te ao ra, ia Iesu Mesia ’e i te mau ta’ata tā ’oe e tāvini nei.
’A rave ai ’oe i te tauira’a i roto i te hō’ē piha ha’api’ira’a ’āpī, ’a ha’amana’o ē « hō’ē ā ho’i ’oe i roto i te Mesia ra ia Iesu » (Galatia 3:28). ’A fa’atumu ai ’oe i tō ’oe ’itera’a i roto i te ’Ēkālesia ’ati a’e iāna, e tauturu ’oia ia ’oe ’ia ’ite i te ’oa’oa i te mau vāhi tei reira ’oe.