« E haere mai nā muri iā’u »—E fa’ata’a hu’ahu’a ana’e i te reira

I tō te Fatu pi’ira’a ia Enoha ’ia riro ’ei peropheta, ’ua parau fafau atu ’oia iāna : « E fa’ati’a vau i tā ’oe ato’a mau parau ; ’e e haere ’ē atu te mau mou’a mai mua atu ia ’oe, ’e e tīpu’u ’ē atu te mau ’ānāvai pape i tō rātou ra tahera’a ; ’e ’ei roto ’oe iā’u nei e pārahi ai, ’e ’ei roto vau ia ’oe ; nō reira, ’a haere mai nā muri iho iā’u » (Mose 6:34).

Mai te mea ’ua parau-fafau-hia ’outou ē, te haerera’a nā muri iho i te Atua, te aura’a ra e turu ’oia i tā ’outou mau parau, e fa’aātea ’oia i te mau ti’a’iara’a i tō ’outou ’ē’a, ’e i pīha’i iho noa ’oia ia ’outou—nō te aha ïa e’ita ’outou e haere nā muri iāna ?

Parau ’āpī rahi : ’Ua parau-fafau-hia ’outou teie,’aita paha i maoro a’e i te sābati i ma’iri iho nei. ’Ia rave ana’e ’outou i te ’ōro’a mo’a, e fafau ’outou « i te ha’amana’o ā iāna […] ma te ha’apa’o maita’i i tāna mau fa’aue »—’oia ho’i, e haere nā muri iāna. ’E nō te aha ’outou e rave ai i te reira ? « ’Ia vai noa tōna Vārua i roto ia [’outou] » (Te Ha’api’ira’a Tumu ’e te mau Fafaura’a 20:77 ; reta tei fa’ahuru-’ē-hia).

I teienei, tē ’ite ra ’outou ’aita te Fatu i parau ia Enoha : « ’A ti’a i ’ōnei ’e ’a hi’o ’ati a’e nā muri iā’u. » ’Aita ’oia i parau : « ’A pārahi mai ’e ’a fa’afa’aea mai i pīha’i iho iā’u ma’a taime ri’i. » ’Ua parau ’oia : « ’A haere mai nā muri iho iā’u. » Tītau-roa-hia ia tātou ’ia ha’a i ni’a i te mau muhumuhu pae vārua e fa’ari’ihia e tātou. Tītau-roa-hia ’ia rave ’e ’ia parau i te mea tā tātou e ti’aturi nei e mea tano.

Mai tā te peresideni Marion G. Romney (1897–1988) i parau, e tauturu i roto i te Peresidenira’a Mātāmua : « E nehenehe noa ’oia e arata’i i tō tātou mau ta’ahira’a ’āvae i te taime e fa’anu’u ai tātou i tō tātou ’āvae ».

’A hi’o na e aha atu ā tā te Fatu i ’ore i parau. ’Aita ’oia i parau : « ’A horo mai na muri iho iā’u. » ’Aita ’oia i parau : « ’A ’ōu’a maroā nā ni’a i tā ’oe mau ti’a’iara’a ato’a ’e ’o vau. » ’Aita ’oia e ani nei ia tātou « ’ia horo vitiviti atu i tei au i [tō tātou] ra pūai » (Mosia 4:27). ’Aita ’oia e tītau nei ia tātou ’ia haere tu’utu’u ’ore noa ma te vitiviti roa. ’Aita ’oia e tīa’i nei ia tātou ’ia ’ore e hape ’aore rā e tō’aru’aru. Tē hina’aro nei ’oia ’ia tāmau noa tātou i te nu’u i mua.

E haere tātou nā muri i te Fa’aora. ’Eiaha i mua iāna. ’Eiaha roa atu i te ātea a’e iāna !

’Ia haere ti’a atu ’outou nā muri i te hō’ē ta’ata, e haere ’outou i tōna pae. I roto rā i teie fa’ahōho’ara’a, e nā muri ri’i noa atu tātou i te Fa’aora. Nāna e arata’i, ’e nā tātou e ’āpe’e—piri iāna.

Mai te mea tei ni’a ’outou i te ’ē’a mau, e’ita te ’ē’a e « arata’i atu » ia Iesu ra—tei reira ato’a ’oia ! ’A ha’amana’o i te ’ōro’a mo’a ! E vai noa te Fatu, nā roto i tōna Vārua, i pīha’i iho ia ’outou, ’a tāmau noa ai ’outou i te ani iāna.

’Aita tō tātou Metua i te ao ra ’e ’o Iesu Mesia i te mea ha’apa’o roa i te vāhi tei reira ’outou i ni’a i te ’ē’a mai ia rāua, maori rā te ’avei’a tā ’outou e haere ra. E fārerei rāua ia ’outou i te vāhi tei reira ’outou. ’Aita ato’a e fifi te marū o tā ’outou ta’ahira’a.

E tītauhia ’ia ha’a (E HAERE MAI). E tītauhia ’ia rave i te reira ’ia au i te mau fa’auera’a a te Atua ’e i te mau muhumuhu a te Vārua (NĀ MURI). ’E e tītauhia ’ia rave i te tā’āto’ara’a o te reira nā muri i te hō’ē noa ta’ata ’aita atu ai, maori rā ’o Iesu Mesia (IĀ’U).

(Nō te mea ’ua hō’ē Iesu Mesia, ’e tōna Metua i te ao ra ’e te Vārua Maita’i i roto i te ’ōpuara’a—hi’o Ioane 10:30 ; 17:21 ; Te Ha’api’ira’a Tumu ’e te mau Fafaura’a 35:2—e mea tano ’ia parau ē, « ’ia haere nā muri i te Atua », « ’ia haere nā muri i te Fa’aora », « ’ia haere nā muri i te Vārua », ’aore rā te hō’ē mea mai te reira.)

Tē vai ra e rave rahi reo e pe’e i roto i teie ao. E’ita e pau te mau ta’ata ’ume, te mau ta’ata tu’iro’o ’e te mau ta’ata poritita ’o tē hina’aro nei ’ia « haere » ’outou nā muri iho ia rātou (’aore rā nō te hōro’a a’e i te moni nā rātou). E parau faufa’a tā te ta’ata e parau, mai te mea noa rā e tū’ati i te mau ha’api’ira’a a te Fa’aora.

’A haere mai nā muri iāna.