Kangaanga ake E kaitarai Inanon Maiuna
E aki beebete kawain te Tia Kamaiu n tainako, ma E na nakonako ma ngaira ao e na kairiira n tabo ake ti kan nako iai.
Tamnei ni kamatata iroun Yukai Du
Ti taneiai n rinea te kawai ibukina bwa e kairiira nakon te tabo are ti tangiria n nako iai. Ma iai riki te bwai ae nano nakon te kawai nakon tii tokin te kawai. Iai naba kangaangan kawaina—aekakin te tabo are e na kairiira n rinanona.
E kaoira Iesu Kristo bwa tina nakonako ma Ngaia (taraa Mote 6:34; Mika 6:8; 1 Ioane 2:6; Reirei ao Berit aika Tabu 19:23). Te kawai are e kaoira bwa tina nakonako iaona bon kawain te berita—te kawai nakon te rau, kimwareirei, ao te maiu are akea tokina ma Tamara are i Karawa—are ti tangiria n nako iai.
Ma aekakira te kawai aei? Aekakira kangaangan te kawai are tina toua ngkai ti rianna ma te Tia Kamaiu?
Irariki
“Bwa e wariki te mataroa, ao e irariki te kawai are nako n te maiu” (Mataio 7:14).
Ngkana iai tianakin kawaina, bon iai bukina. Irarikin te kawai e kawakiniko man touan tabo ake ko kona n ikoaki ke ni bua iai.
Eti
“Ao a eti kawaina” (Aramwa 37:12).
Kawaina e aki kamangaongao. Ngaia te kawai ae rang eti nakon ara kouru n te maiu ae akea tokina. A aki bibitaki. Ma n tabetai ngaira ti bibitaki. Ibukin ana Mwakuri ni Kamaiu te Tia Kamaiu, ti kona ni waekoa n rairi nanora ao n okira kawaIna.
Katati ao n Tabetai e Kiriatibu
“Te kawai [nakon mweengan te Atua] e katati ao n tabetai e kiriatiibu” (Beretitenti Henry B. Eyring man te Moan Beretitentii, “Help Them on Their Way Home,” Apr. 2010 general conference [Ensign ke Liahona, May 2010, 25]).
Tamwarakean te maunga e kona ni kakua, ao ko kona n aki kona n noora taubukin te maunga ke iteran te maunga are ko tamwarakeia. Ma te Tia Kamaiu e kakorakorako ao e kaunga nanom ngkai ko kataia ni karaoi bwaai aika a kangaanga ake E kaoi ngkami bwa kam na karaoi.
Atibu ake iaon kawaim a kona ni kaokoro ma ake irouia tabeman. Kakaewenakoam ao bwaai ake ko rinanona bon mai iroum. Ma te Tia Kamaiu bon te rao ni mwananga ae te kabanea n tamaroa ao e na buokiko ni kaitarai kangaanga nako.
Ura-Raoi
“Boni baeni waeu am taeka, ao otani kawaiu” (Taian Areru 119:105). “Ti nakonako n te ota n ai arona ngkae E mena n te ota” (1 Ioane 1:7).
Ngkana e roo kawaim, te Tia Kamaiu e na kaota kawaim, riki ngkana e tau ibukin teuana te rangata ao ngkanne are imwiina ao are imwiina iaon kawaim nakon mweengam nakon Tamara are i Karawa.
Mano
“Ao ngkana tao I nakonako I nanoni maruan nun te mate, Ao I aki maka tebai teuana ae buakaka; ba Ko memena I rarikiu” (Taian Areru 23:4).
N aki tabe bwa kakamakura, kabwarananora, ke kangangara aron taraan kawaim, ko kona ni karekea te raunnano n ataia bwa ngkai ko nakonako ma Iesu Kristo, E na bon nakonako irarikim ao ni kairiko ma te kamanoaki, n okira Tamara are i Karawa.