Berita aika Kakaawaki n Ana Babaire te Tama
A riai ni kaonaki nanora n te kakaaitau ngkai ti iangoi ana babaire te Atua ibukira aika a korakora.
Kamataata n te tamnei iroun Alyssa Petersen
Ana babaire Tamara are i Karawa e kabwarabwara te “taeka n akoi aika a kakawaki mani moa ni kakanato” (taraa 2 Betero 1:3–4) ao koaua ake a kabwarabwarai kinakira ao ara kantaninga aika akea tokiia.
N aron ae kabwarabwaraaki i nanon “Te Utu: Te Katanoata nakon te Aonaaba: “Ni kabane aomata—mwaane ao aine—a karikaki ni katotongan te Atua. Bon naati mwaane ao aine n tatabemaniia aika tamnei irouia ara karo ake i karawa, ao, n aron anne, iai aroia n te aro n atua ao tokin kawaia.”
E berita te Atua nakoira bwa ngkana ti iriira Ana babaire ao ana katooto Natina ae Tangiraki, ni kawakin tuua, ao ni kekeiaki n onimaki ni uaa te toki, ti na “karekea te maiu are akea tokina, are te bwai n tituaraoi ae moan te korakora mai i buakon ana bwai n tituaraoi nako te Atua.”(Reirei ao Berita aika Tabu 14:7).
E boboto ana mwakuri te Atua i aon rikirakeia ao karietataakia natina. E karaoaki kanoan nako Ana babaire bwa e na kakabwaiaira ibukina bwa “e korakora kakawakia aomata i [matana]” (Reirei ao Berita aika Tabu 18:10).
Ana Babaire Te Tama
N te kauntira i mwain te maiu aei, E uotaarake Ana babaire Tamara are i Karawa ibukin rikirakeia natina n tamnei ae akea tokina ao kukureia. E tuangiira bwa E na kanakoira nako aon te aba ni kaotia nakoira, bwa ti na nooria ngkana ti na ongotaeka nakoia ao n tau ni “karekea te mimitong i aon [atuura] n aki totoki.” (taraa Aberaam 3:24–26).
Ao i mwiina E kangai: Antai ae N na kanakoa? Ao temanna e kaeka n ai aron Natin te Aomata: Aio Ngai, kanakoai. Ao temanna riki e kaeka ao e taku: Aio Ngai, kanakoai. Ao te Uea e taku: N na kanakoa te moan.
“Ao te kauoman e bon un, … ao, n te bong arei, a mwaiti aika iria” (Aberaam 3:27–28).
Bon ti teuana te babaire ae kaotaki—Ana babaire te Tama. E aki kaota ana titiraki Tamara are i Karawa, “Tera ae ti na karaoia?” E aki ukori iango tabeua, ke n tuatua kaetieti, ke n bubuti kareke iango. E boboto kakaawakin Ana titiraki iaon are antai ae riai ni kanakoaki bwa e na kakoroi nanon kainibaaire ma kanoan nako Ana babaire.
E aki kaota ana babaire Rutibeero are e aki rineaki irouia angiia kaain te kauntira n te maiu imwain te maiu aei. E kaaitara! E ukora kabuaan inaomatan te aomata n rinerine, ao e karenakoaki, ao, “e riki bwa Tatan, … te riaboro, taman taian kewe ni kabane, bwa e na mwamwanaia ao ni kamatakia aomata, ao ni kairia nakon te tautaekanaki n ana kantaninga” (taraa Mote 4:1, 3–4). Te kamoamoa, ti kakaawakina n ti ngaia, ao te tinanikubeka a bon boutokaa arona ni kaitaraa ana babaire te Tama.
Ana Babaire te Tama ao Ana Euangkerio te Tia Kamaiu
Te babaire e kabwarabwara ana mwakuri nako te Tama ao te Nati are e karekea katauraoan taian kakabwaia n te maiu ae akea tokina nakoia aomata ni kabaneia.
Ana euangkerio Iesu Kristo bon te kawai are ti karekei iai kakabwaia ake a beritanaki n ana babaire te Atua, ao n reirei, moan tuua, otenanti, ao berita aika tabu are ti riai ni kakoauai ao n iriiri. “Bon akea te ara riki teuana are e a tia n taekinaki i aan karawa ma ti Iesu Kristo … are e na kona ni kamaiuaki iai te aomata” (2 Nibwaai 25:20). N te koaua, te Uea ae Iesu Kristo bon “te kawai, te koaua, ao te maiu: akea ane e nako n te Tama, ba ti i [Rou]” (Ioane 14:6; e kairaki ma katuruturuana).
Atuun te Babaire i nanon Ana Boki Moomon
Ti reiakin taian koaua aika a kakaawaki man kinaakin ao kamatebwaian ana babaire te Tama i nanon Ana Boki Moomon n atuuna aika a mwaiti man kakaokoro. Te katooto, iangoa katooto n atuun rongorongo aika a rineaki aikai:
-
“Ana babaire n nanoanga te Tia Karikibwai ae kakannato” (2 Nibwaai 9:6).
-
“Ana babaire te Atua” (2 Nibwaai 9:13).
-
“Te babaire ni kamaiu” (Iarom 1:2; Aramwa 24:14).
-
“Te babaire ni kabomwi” (Aramwa 12:25, 26, 30, 32, 33; 42:11, 13).
-
“Te babaire ibukin kaokan bwaai nako” (Aramwa 41:2).
-
“Te babaire ni kakukurei” (Aramwa 42:16).
-
“Te babaire n nanoanga” (Aramwa 42:31).
A buokira ni mataata raoi riki atuun rongorongo aikai n tatabeua ni kakaawakin taian berita n ana babaire te Tama ao ni kaoni ara nonoori ibukin arora ao nanona nakon maiura ae mamate .
Kakawakina, ae kakabonganaaki riki ibukin ana babaire te Atua n Ana Boki Moomon bon (“te babaire ni kabomwi”) ae boboto i aon te kabomwi man te bure ao te mate are e karekeaki rinanon Ana Mwakuri ni Kamaiu Iesu Kristo (taraa Aramwa 12:25; 33:22).
E Katauraoaki te Kawai
A riai ni kaonaki nanora ma te kakaaitau ngkai ti iangoa ana babaire te Atua ae korakora. Te ataibwai n Ana babaire e katauraoa te nonoori ae moan te kakaawaki, e kaoni nanora n taian kimwareirei, ao ni kakorakoraira n tokanikai i aon ara kangaanga ao kataaki.
E ingainga nanon Tamara are i Karawa bwa ti na okiria ni maeka ma ngaia. E kaoira ao ni beritani taian kakabwaia, ma E na bon aki kairoroira, imanonoira, ke n tautaekana aron rikira man inaomatara n rinerine are E a tia n anganiira. Ti riai ni mwakuri ao n rineia n okirikaaki Nakoina man iriirakin ana katooto Natina ae Tatangiraki.
“E katauraoakite kawai ao ngkana ti taraia ao ti na maiu n aki tokir” (Aramwa 37:46; kaairaki katuruturuana).
I kakoaua ma te kimwareirei bwa Tamara are i Karawa bon ngaia te tia korea te babaire ni kamaiu mai karawa ibukiia natina. Iesu Kristo bon te tia Kabooi maiura ao te Tia Kamaiu. Ngkai ngai temanna Ana Abotoro ni boong aika kaitira, I kakoaua bwa bon Ngaia ni koaua “te kawai, te koaua, ao te maiu.” (Ioane 14:6; kaairaki katuruturuana).