Nakonako ma Ngai

Ko a tia n tuangaki mai mwaaina bwa ko na karaoa te bwai teuana ae ko taku bwa ko aki kona ni karaoia? Tao ko aki namakinna bwa e tau korakoram ke n wanawana, ke ko raraoma bwa a na ngareakiniko tabeman ao n kabuakakako. Ngkana ko namakina aio iroum, ko aki maroaa.

Ngaa n ririki n nako, iai te aomata ae arana Enoka. E tuanga Enoka te Atua bwa e na tataekina te rairannano nakoia aomata—tabeman mai buakoia aika a rangi ni buakaka aika a maeka i aon te aba.

E taku n ana iango Enoka bwa e aki kona ni karaoia. E tuanga te Atua bwa e rangi ni uarereke, e aki rangi ni bati raoraona, ao e aki rangi ni wanawana (Taraa Mote 6:31).

Ma e anga te berita te Atua nakon Enoka. Ao e tuanga te mwaane are e maaku, Waaki nako ao karaoa are I a tia n tuangko” ao “a na mwaing maunga imwaaim, ao karaanga a na bita kawaia; ao ko na mena irou, ao Ngai iroum, ngaia are nakonako ma ngai” (Mote 6:32, 34).

“Nakonako ma Ngaia.” Ai bebetera, ao ai tamaroara te kakao aei.

E berita te Atua nakon Enkoa bwa ngkana e na ninikoria ni waaki, e na memena irouna te Atua n kawaina nako n ana mwakuri. Te Atua e na karika Enoka bwa te aomata ae korakora ni kakorakoraa bwa e na karaoa ae raka riki ao ni buokia bwa e na rikirake nakon are e aki kona n iangoia bwa e konaa.

Teuana aran te Tia Kamaiu man arana aika a mwaiti bon Emanuera, ke “te Atua iroura” (Mataio 1:23). Bon aran te Uea ao arona ae na nakonako iai ma ngaira. Ara bwai te rinerine—ti na kona n nakonako naba, ma ngaia?

N boong aikai, ti noora Enoka bwa te mwaane ae onimaki ao te burabeti ao te tia kairiiri ae korakora. Ma imwaain Enoka te burabeti, ao iai Enoka ae ataei are e nanououa i bon irouna ma e bon rineia bwa e na nakonako ma te Atua.

Ngkana e roko rawawatan te maiu, ngkana e roko iroum ae ko aki tau, uringa ana berita te Uea nakon Enoka, ao nakoim. E na nakonako ma ngkoe. E na aki kitaniko n ti ngkoe, n tiaki naba n te moan waaki.

Emanuera. Te Atua iroura. Te Atua iroum!!

N aroia ataeinimwaane, e tuanga Enoka te Uea bwa e na kakoroi nanon bwaai aika a kakaawaki n te mwiokoaki n te nakoanibonga. Tabena bwa e na tataekina te rairannano nakoia aomata aika a buakaka. E kaota te nanououa Enoka. “[Ngai] bon te ataeinimwaane,” e taku. “A bane aomata n riribaai … I aki kona n taetae raoi; e aera ngkai ngai am tia mwakuri?” (Mote 6:31).

E kaeka te Uea ma te mwaaka ao te kakoaua. “Waaki nako ao karaoa are I a tia n tuangko, … Kauka wiim, ao e na kanoaaki … . E mena Tamneiu i aom …; a mwaing maunga imwaaim …; ngaia are nakonako ma ngai” (Mote 6:32, 34).

E reiakinna Enoka bwa ngkana e anganiira tabera te Uea, ti aki kaitaraia n ti ngaira. Ngkana ti karaoi ao ni kaawakin berita aika tabu ma Kristo, ti nakonako ma ngaia ao n tibwaa Mwaakana—ti riki bwa bwaai ni mwakuri ni baina.

N ai aron Enoka, iai tabem ae kakaawaki: mwakuri ni ibuobuoki, karaoan te toa, kamatebwaian koroboki aika tabu, maiuakinan te euangkerio, rairannano, katauraoi nakon te mitions ao tabeua riki. E kona n roota te namakin. Ko kona n namakina te aki tau. E Tamaroa Anne. Tiaki taekan karaoana n ti ngkoe. Bon taekan rineakina n te bong aei—n te bong aei ao ni katoa bong—n nakonako ma te Atua.

Man Ana ibuobuoki, ko na ni karaoi bwaai ni kabane. E na kakorakora, kabwara bure, ao n karekea nakoim are i aon am konaa. E Tangiriko! Ngkai te Beretitentii ni Kabuta n te Bootaki n Ataeinimwaane, ti tangiri ngkami ao n ingainga n raoni ngkami n ukora te kaungaaki n te boto ni iango n 2026: “Nakonako ma Ngai.”