3 Kawai n Totokoa Taatan ao Rinea Iesu Kristo
Ataakin bwaai aika riki n te maiu imwain te maiu aei e kona ni buokiko ni karaoi rinerine aika raraoi ngkai.
Te Kamataata n te tamnei iroun Dean MacAdaM
Ngke e kaota Ana baire Tamara are i Karawa ibukin kimwareireira ae akea tokina ao rikirakera, E berita nakoira bwa e na kanakoa te Tia Kamaiu bwa e na buokiira. Ngke e titiraki te Tama: Antai ae N na kanakoa?” (Aberaam 3:27), Iesu Kristo, “[Natin] te Tama ae Tangiraki ao e Rineaki man te moan tai” (Mote 4:2), e taku, “Aio Ngai, kanakoai” (Aberaam 3:27). Akea te bwai ae tuatua. E ti tangiria ni kakoroa nanon ana kantaninga Tamana (taraa Mote 4:2).
Imwiina e roko Rutibeero. E kaeka naba, “kanakoai” (taraa Mote 4:1). Ma e tinanikubeka Rutibeero, n aki kan anganano ibukira. E tangira karineana mairoun te Atua, te mwaaka, ao te mimitong bon ibukina (taraa Mote 4:1). E tangiria Rutibeero n urui inaomatara n rinerine. E kanga n iangoa karaoan aei e bon aki matata. Ma ti ataia bwa n akean inaomatara, tina bon aki kona n rikirake n riki n ai aron Tamara are i Karawa. Ngaia are taraana, Rutibeero e kaitara Tamara are i Karawa ao e katinanikua Ana baire.
Ana kakaitara Rutibeero e karika te buaka i karawa, ike e a “teweaki nako;” ao e “riki bwa Taatan” (Mote 4:3–4). Te katenimwakoro kain karawa a iria (taraa Reirei ao Berita aika Tabu 29:36). Ma ti kabongana inaomatara ao ti ira Iesu Kristo.
Te buaka are e waaki i karawa e reitinako ni karokoa te bong aei. Tatan ao taan iriiria a reitinako n ukoukora kaitaraakira. Aikai teniua kawai ni kina ana kamwane ao ana kainibaire Tatan, n totokoi ana kamwane ao n rinea Iesu Kristo rinanon nako maiura.
1. Tai Kariaia te Riribai bwa e na Tokanikai
Ririki aika a nako, I kataia te taina ni kairi nanoia raraou n te reirei bwa a na aki karaoi aia kamatebwai n te mweenga ibukina ngke I tuai ni karaoi au bwai. I bon kairua, ma I iangoia bwa ngkana ti bane n reke n te kanganga, N na kona ni karekea te nakoraoi ibon ibukiu. Anuau aika aki raraoi a kauringai anuan Tatan nakoira. Ibukina bwa e rereke n te kangaanga, e tangiria bwa e na kataonabai arora n te maiu are akea tokina.
Tatan e rang aki barongaaki n ana kakairiribai n te aro are e—ngke e ataia bwa e na bon kabwaka—e korakora nanona ni “kabutanakoi mwakuri n roo” (Ereman 6:28), bwa e na kaikoakiia angiira mai ibuakora n aron are e kona.
Buakakan Tatan bon tiaki te baire ae tina rineia. Ti kona ni kabonganai inaomatara n rinerine n reitinako n iriiira Iesu Kristo ao n reitinako n totokoa buakakan Tatan, ma ana kamwane aika akea uaai, ao kabwaka ni kariiri. E anga maiuna te Tia Kamaiu bwa ti aonga ni kona n riki nakon are E ataia bwa tina riki nako iai ao ni karekea te kimwareirei are e reke n te maiu ae akea tokina.
2. Tai Konaaki n te Maaku
N tabetai I mimi bwa bukin tera tenimwakoro mairouia natin te Atua a na kona n rineia bwa a na totokoa Ana babaire. Tatan e ataia bwa te maaku ao te nanokokoraki bon kawai aika nakoraoi ibukin kakerikaaakan te onimaki. E kona ni kaririira bwa tina nanokokoraki ibukin kakaawakira ke ni kairii ara iango bwa tina aki kona n itiaki rinanon ana Mwakuri ni Kamaiu Iesu Kristo. Ke e kona ni kataia ni kabwarai nanora bwa tina maaku n rairi nanora ke n ira ana babaire te Atua.
Ngkana ti kaitarai kataaki ao kangaanga, ti kona n rineia bwa tina onimakina ana babaire te Atua ao Iesu Kristo. E a tia n teimatoa ni bwaai ni kabane bwa E aonga ni kakorakoraaki ngkana ti kaitara te maaku, ao rinanona, ti na kona n tokanikai.
3. Butimwaai ni Kabane ake E Anganiko te Tia Kamaiu
Tamara are i Karawa ao Iesu Kristo a uaia n anganiira te karineaki ao te Kakorakoraki. Antai riki ae tangiria ni buokiira ni karekea nakoira ara kabanea n tamaroa ao n anganiira bwaai ni kabane n akea ae a taua? Bwaai ni kabane ake ana bwai te Tama a kona n riki bwa ara bwai! Ti anganaki aei ti rinanon Iesu Kristo.
Ngkana I iangoa ana mwamwannano te Tia Kamaiu ao mwaakana ni kamaiu, I tangiria n iriiria. Iesu Kristo bon te tiambion ae kororaoi n te baire ae kororaoi. Ngkai ti rineia, E buokiira n tokanikai iaon te kakaitara, n iriira ana baire te Tama, ao ti karekea tokin kawaira i karawa.