Tibwa Ataia Imwiin Maten Tibu te Unnaine

Kamataatan te tamnei iroun Katelyn Budge

Buan tibu te unnaine bon te kakaewenako nakoiu. Ti rangi n irekereke. I rang namakina te nanokawaki. I namakinna bwa te kantaninga are I kainnanoia e a bua.

Imwain ae e bua, I bon aki rang matoatoa n ana euangkerio Iesu Kristo. I bon katan iaon aia koaua aomata. Ma inanon te moan wiiki n nanokawaki, I nakon te kiraati n taekan te aro are e reireinai iai au tia reirei taekan Ana Mwakuri ni Kamaiu Iesu Kristo ao ana babaire ni kamaiu te Tama. I a ataia bwa ngaia I kona ni manga noora tibu teuana riki te tai. Ti kona ni manga kaitiboaki n te maiu ae e na roko rinanon otenanti n te tembora.

Aio e kakorakoraa au koaua. I a waaki ni kabotoa riki au iango iaon au Tia Kamaiu ao n reiakina riki taekan Ana euangkerio. Ngkai I a ukoukori kaeka rinanon koroboki aika a tabu ao Nakomai, Iriirai. I tatangiria n ongora ni maroro n te maungatabu, riki mairoun te burabeti, Beretitenti Russell M. Nelson. Ngkai I ongora nakon reirei, ni katan iaon koroboki aika a tabu, tataro, ao n iango, ao ni bubuti te Tamnei ae Raoiroi, au koaua e a kona ni matoatoa.

Te tieminarii e buokai naba n reiakinna ao ni kataia n riki n ai aron te Tia Kamaiu, Iesu Kristo, ngkai I mwakuri ma te onimaki, n tarai bwaai man te taratara ae akea tokina, ao ni kakaai riki atatai rinanon bwaai n ibuobuoki aika a kariaiakaki.

Onimakina Tamara are i Karawa ao Iesu Kristo. Tai katan n oin wanawanam n ti ngaia ma Onimakiniiia. A kona ni buokiira ao ni kairiira rinanon kanganga nako ke kataaki ake ti kaitarai.