A Bane n Nakoraoi Bwaai Ngkana Ko Onimakina te Atua

I nanon te tai aei, I a moanna n nanououa ni koauan te euangkerio, au koaua, ao bwa antai raoi Iesu Kristo. I nanon te tai teuana, I a manga nanououa irouna ao ni manga iangoia bwa I a manga aki kakoaua bwa iai te Atua. E rangi ni matotoa nanou kanga ai aron te atibu ae te aiti.

E a bon rangi roko maiu n te kangaanga ae rangi ni korakora ao ni kekerikaaki. I taku bwa bukina bwa ngke ti katoka te onimaki iroun Iesu Kristo ao mwaakana, e a bua te bwai ae kakaawaki ni maiura ao n rangi n rootaki.

I nanon te tai, e kaumakai tamau bwa N na riai ni moana manga kaean te taromauri. I karaoa aio e ngae ngke I bon teimatoa n aki oota au iango ao a bati au titiraki.

N te bong teuana n te taromauri, I noora te boutita ibukin taekan te tieminarii. E karekea nakoiu te kukukurei. I kawara au bitiobi ao n tuanga taekana. E waekoa n karinai nakon te tabo ni marooro n te kurubu n te tieminarii ao n tuangai bwa e na moanaki man 5.30 a.m.

Ngaia are, I a moana iriirakin te tieminarii. E buokai aei ni karekeia raoraou aika a boou ao ni manga karekea au koaua n te Ekaretia ao taian koroboki aika tabu. Iai au tia reirei ae rangi ni kakaungaa au kiraati ao ni karekea te kabanea n tamaroa nakoira. I kunea bwa kamatebwaian koroboki aika a tabu a karekea nakoiu te konaa n ataa te Tia Kamaiu. Iai te kaokoro i marenan ongoraeakinan ana koaua temanna ma ukoran oin am koaua rinanon te kamatebwai ao te onimaki.

Ma ni bon arona, I ataa taekan Tamara are i Karawa ao Iesu Kristo rinanon are a tuangai aomata tabeman. Ma ti kona n taainako n katan ni koaua i aon aia koaua tabeman aomata. Ti riai n ukora ataakin te Tia Kamaiu ibon i bukira.

Ti riai ni karekea te tai ibukin te Tia Kamaiu ao ibukin bwaai mai karawa bwa ti aonga n riki bwa temanna Ana reirei. I reiakinna bwa ko na kina Ngaia ngkana ko:

1. Ukoria raoi ma nanom ni koaua.

2. Wareki booki aika tabu.

3. Keiakimwaaka ni kanakoraoa maium n taamnei.

4. Tataro.

5. Kawara te tembora.

6. Buokiia raora.

7. Aki mamatam.

8. Iriira Ana katooto.

9. Karaoiroa nanom.

10. Tai kariaia te taetae n aki akaaka ke winnantiaia tabeman.

A buokai bwaai aikai n ataa te Tia Kamaiu—ao n riki bwa temanna Ana reirei. E rangi n kakaawaki te riki bwa ana reirei Iesu Kristo ibukina bwa ti kona ni kabonganaa otana ni buokiia tabeman. Rinanon ara katooto aika a raraoi, a kona tabeman n noora mwaitin te kakabwaia ae na reke man te euangkerio.

Ngke I okira te ekaretia, e bon rangi n aki raoiroi are I mena iai—I onrake n taian nanououa, akea raoraou, akea au kaantaninga, I aki ataia bwa antai raoi ngai ke tera bonganau ao bukin maiu.

Ngkai, te euangkerio bon te “ura n ai” ae kaotaa maiu ao e buokai ni karaoa te bwai ae eeti ao n riki bwa te aomata ae tamaroa riki. N akean te euangkerio, I aki ataia bwa N na mena iaa.

A bane n nakoraoi bwaai i nanon te maiu ngkana ko onimakina te Atua. Man te tai are ko ukoria iai, ko moanna n otinako man te mwanono ao a na moanna n nakoraoi bwaai. Eng, e na bon teimatoa n roko te kariiri, ma te onimaki ao te nano ni kakoaua aei e na uotiko rake teutana i mwiin teutana. E na kona n anaa te tai, ma a na nakoraoi riki bwaai!

Ngkana ko onimakina Tamara are i Karawa, ko na kona ni kaaitarai bwaai ake ko rinanona—bwa tao taian kangaanga, nanououa, aoraki, ke te maroaa. Te katooto, ko kona ni karekei bwii aika a tamaroa n te ukeuke, kanakoraoa marurungim, ke ko karekei kaeka—n tabetai kaeka ake ko a kaman ukoria ma ngke 10 am ririki, n ai aron ae riki irou—ngkana ko ukoria ao n onimakinna.

I koaua ni bwaai aikai. I karabwarabwa nakon ana euangkerio, bwa I a kona n taekinna bwa I a tia ni bitaki. Bon arona, a bitaki bwaai ni kabane—nanou, au iango, aroarou, ao reirei. I ataa ngkai te koaua, ao anne ae karika te bitaki ni bwaai nako. A bane n nakoraoi bwaai nako man ana euangkerio Iesu Kristo.