« Tē rave nei tō’u mau hoa maita’i i te mau mā’itira’a ’o tē fa’atupu i te au ’ore i roto iā’u. E aha tā’u e rave ? »

« ’A paraparau i tō ’outou mau hoa nō ni’a i tō ’outou mau nīno’a mana’o. E ha’amatara te paraparaura’a i te ’ē’a nō te hō’ē aura’a mā a’e. I te tahi taime e mea fifi roa, nō te mea tē pe’ape’a nei tātou i te fa’a’ino’ino i tō tātou mau hoa, tē vai ra rā te hō’ē rāve’a : ’a rave i te mea tā te Mesia e rave ’e ’a ’ohipa ma te aroha ».

Luan R., 19 matahiti, São Paulo, Peretīria

« I te tahi taime e rave te mau hoa i te mau mā’itira’a nō te ’ume mai tō rātou mau hoa. Mai te mea e paraparau vau i tō’u mau hoa nō ni’a i tā rātou mau mā’itira’a, e nehenehe au e tauturu ia rātou ’ia ha’apa’o i tā rātou mau fā ’e tō rātou faufa’a. I te tahi atu taime, ’aita mātou e tū’ati nei i ni’a e aha te mea maita’i ’aore rā te mea faufa’a, e ti’a rā ia mātou ’ia fa’atura i tō te tahi mana’o ’e tōna ti’amāra’a ».

Maggie A., 18 matahiti, Texas, Marite

« Penei a’e tē putapū nei ’outou i te au ’ore nō te mea tē parau nei te Vārua Maita’i ia ’outou ē, te mea tā rātou e rave ra e ’ere ïa i te mea ti’a. ’A ani ia rātou ’ia rave i te tahi atu ’ohipa ».

Lorenzo M., 12 matahiti, Quezon City, Firipino

« E nehenehe ’outou e arata’i ia rātou i ni’a i te ’ē’a o te Atua, ’aore rā e ’imi i te tahi atu mau hoa ’o tē riro ’ei fa’aurura’a maita’i. ’A pure nō te ’ite e aha te fa’aotira’a e rave. ’A ti’aturi i te pa’ari o tō ’outou Metua i te ao ra, ’e nāna e arata’i ia ’outou ».

Haiden W., 15 matahiti, Washington, Marite

« E rave au i te mea maita’i roa a’e nō te riro ’ei hi’ora’a maita’i. E pure ato’a vau nō rātou nō te mea ’ua ’ite au e upo’oti’a noa te māramarama i ni’a i te pōuri ».

Isaac M., 19 matahiti, Lualaba, Rēpūpirīta manahune nō Tōneto

« ’Ia vai mata’u ’ore noa ’e te itoito mai ia Moroni te huru. E fa’ari’i ihoā tātou pā’āto’a i te mau hoa ’o tē rave i te mau fa’aotira’a ’ino, ’e e hina’aro tātou i te tauturu a te Metua i te ao ra nō te fa’aruru i te reira. I te mau po’ipo’i ato’a, tē pure nei au nō te ’ō’omo i te ha’ana tama’i a te Atua, ’e e tauturu rahi te reira iā’u ! »

Asa F., 15, Utaha, Marite

« ’A here ia rātou ’e ’a vaiiho i tō ’outou māramarama ’ia ’ana’ana. E ha’amata te ta’ata i te fa’atura i tā ’outou mau fa’aotira’a. ’O vau ’e tō’u ’utuāfare ana’e te mau melo o Te ’Ēkālesia a Iesu Mesia i te Feiā Mo’a i te mau Mahana Hope’a nei i tā mātou fare ha’api’ira’a, ’e ’ua ’ite au ē ’ua fa’aea te mau ta’ata i te tuhi tei reira ana’e mātou, nō te mea ’ua ’ite rātou e mea ta’a ’ē mātou »c

Penelope W., 13 matahiti, Tuha’a fenua rōpū, Pōtītī