Ē mai te mea tē tāfifi nei au ’ia fa’ahoa atu ?

I teie matahiti, i tō’u tauira’a i te hō’ē fare ha’api’ira’a, ’ua ta’i rahi au nō te mea ’aita vau i hina’aro e vaiiho atu i tō’u mau hoa tahito. ’Ua parau vau iā’u iho ē, e’ita roa vau e au i tā’u fare ha’api’ira’a ’āpī ’e e au ra iā’u, ’ua ha’avare au i tō’u mau hoa tahito mai te mea e fa’aho’a vau i te ta’ata ’āpī.

I te hepetoma tā’āto’a, ’ua fa’atu’atu’a vau te mata. ’Aita vau i paraparau i te ta’ata. ’Ua tāmata te mau tamāhine i te paraparau mai iā’u, ’aita rā vau e ’imi ra i te fa’ahoa ia rātou.

I te hō’ē mahana, ’ua ’ite a’era vau ē, ’aita vau i hina’aro ’ia vai ’ōtahi noa. ’Ua ta’a iā’u ē e ti’a iā’u ’ia maheu a’e. ’A māta’ita’i ai au i te hō’ē ’āna’i hōho’a ’āfata teata nō ni’a ia Iesu Mesia, ’ua fa’auruhia vau ’ia feruri e mea nāhea tōna fa’ahoara’a. Noa atu ’aita ’oia i auhia e te ta’ata ato’a, nō te rahira’a rā o te mau ta’ata, ’ua taui ’oia i tō rātou orara’a.

Maoti te hi’ora’a o te Mesia, ’ua fa’aoti au e tāmata e fa’ahoa i te ta’ata ’āpī, noa atu tō’u mata’u. ’Ua ri’ari’a vau nō te mea e ta’ata māmahu vau ’e tē pe’ape’a nei ’ia fa’ao’ō’o mai te ta’ata iā’u. ’Ua parau rā vau iā’u iho, « e Metua i te ao ra tō ’oe ’o tē tauturu mai ia ’oe. Noa atu e pāto’i mai te tā’āto’ara’a ia ’oe, tei reira ’oia ».

’Ia hi’o vau i muri, tē ’ite nei au ē te hoa tei ’ore roa i fa’aru’e iā’u i te roara’a o taua taime ra ’o te Fa’aora ïa. Maoti te mau tāmatara’a fifi tā’u i fa’aruru, ’ua ha’afātata rahi atu ā vau iāna. Nō tōna here rahi ia tātou, ’ua hōro’a ’oia i tōna iho ora nō tātou. ’E ’ua hōro’a mai ’oia ia tātou i te mau pāpa’ira’a mo’a, ’ia ’ite tātou nāhea ’ia riro mai iāna te huru. E nehenehe noa ’oe e ti’aturi i ni’a ia Iesu Mesia nō te riro ’ei hoa nō ’oe.