’Aita ’oia i ’ite e hina’aro vau i te reira

Hōho’a nā Melanie Miza

Tē fa’aruru ra vau i te tahi mau fifi nō’u iho. I te hō’ē mahana, e ’ere au i te mea maita’i roa, ’e ’aita vau i hina’aro roa e haere i te séminaire. ’Ua mana’o rā vau, « e matahiti hope’a teie nā’u, ’e e ti’a iā’u ’ia fāna’o i te reira ».

Nō reira ’ua haere atu vau ’e ’ua ’āparau mātou, e mea nāhea Iesu Mesia e ’ite ai ia tātou tāta’itahi ma tō tātou i’oa. ’Ua tai’o mātou Te Ha’api’ira’a Tumu ’e te mau Fafaura’a 18:10 : « ’A ha’amana’o na ē e faufa’a rahi tō te mau vārua ta’ata i mua i te aro o te Atua ». ’Ua ha’amata vau i te horuhoru te ’ā’au ’a tāpa’o rēni ai au i te ’īrava. ’Ia horuhoru ana’e tō’u ’ā’au, e ta’i rahi au, nō reira ’aita vau i hina’aro e tai’o fa’ahou i te reira i roto i te piha ha’api’ira’a.

I muri a’e, ’ua ui mai te ’orometua ha’api’i, « e aha te mea tā ’oe i fa’ahiahia rahi a’e, ’e nō te aha ? » ’Aita vau i hina’aro e paraparau, ’ua fa’ahiti mai rā te hō’ē hoa tō’u i te reira pāpa’ira’a mo’a. ’Ua hōro’a mai ’oia i tōna ’itera’a pāpū ē e’ita roa te Atua e vaiiho ’ōtahi noa ia tātou, ē i te tahi taime e mo’ehia ia tātou, ’ua ’ite maita’i rā ’oia ia tātou ’e tei reira ’oia nō tātou.

I tō’u fa’aro’ora’a i te reira, e au ra iā’u ’o te Metua i te ao ra teie e paraparau nei iā’u nā roto mai i tō’u hoa. E au ra tē parau nei ’oia iā’u, « ’eiaha e fāriu ’ē mai iā’u—tei i’ō nei au ».

I muri mai i te reira, ’ua haere atu vau e horoi i tō’u hōho’a mata, ’e ’ua haere mai tō’u hoa iā’u ra. ’Ua parau mai ’oia, « ’aita vau i hina’aro e parau, terā rā ’ua ’ite au i roto iā’u e mea tītauhia nō te mea e tauturu te reira i te hō’ē ta’ata. ’Aita vau i ’ite teie ta’ata ’o ’oe ». ’Ua ha’apāpū fa’ahou mai te reira iā’u ē, tē māna’ona’o nei te Metua i te ao ra iā’u.

I muri a’e i te séminaire, ’ua ho’i atu vau i te fare ’e ’ua pure au. Tei mātauhia, e ha’amāuruuru vau ’e e ani au i te tahi mau mea. Teie rā pure—tē mana’o nei au ’o te pure ha’amāuruuru rahi a’e ’o tā’u i ’ore a’enei i pure. ’Ua putapū vau i te Vārua i roto i tō’u piha, ’e ’ua ’ite au tei pīha’i iho te Metua i te ao ra iā’u.