Te poro’i nō ni’a i te ’utuāfare ’e ’outou

Nā Eric B. Murdock

Mau ve’a a te ’Ēkālesia

E 30 matahiti tō te poro’i nō te ’utuāfare i teie ’āva’e. ’A hi’o nāhea te reira e riro ’ei ha’amaita’ira’a nō tō ’outou ’utuāfare i teie mahana.

E 30 matahiti ti’a i teienei, i te ’āva’e Tetepa 1995, ’ua pia te Peresidenira’a Mātāmua ’e te pupu nō te Tino ’Ahuru ma Piti ’āpōsetolo i « Te ’Utuāfare : E Poro’i i tō te ao nei », ma te parau ē « ’ua riro te ’utuāfare ’ei pū nō te ’ōpuara’a a Tei Hāmani nō te hope’a mure ’ore o tāna mau tamari’i ».

E ’āpōsetolo te peresideni Dallin H. Oaks, tauturu hōē i roto i te Peresidenira’a Mātāmua, i taua taime ra. ’Ua parau ’oia, « tē fa’a’ite pāpū nei au ē ’ua riro te poro’i nō ni’a i te ’utuāfare ’ei fa’ahitira’a parau nō te parau mau mure ’ore. … ’A ha’api’i i te reira, ’a ora i te reira, ’e e ha’amaita’ihia ’outou ».

’Ua ha’amaita’i te poro’i nō ni’a i te ’utuāfare i te mau ’utuāfare nā te ao ato’a nei e 30 matahiti te maoro—’e e tāmau noa te reira i te nā reira.

Mau mana’o tauturu nō te mau ’utuāfare pūai ’e te ’oa’oa

I roto i te poro’i nō ni’a i te ’utuāfare, tē fa’a’ite pāpū nei te mau peropheta ’e te mau ’āpōsetolo ē, « e mea pāpū a’e te ’oa’oa i roto i te orara’a ’utuāfare ’ia fa’atumuhia te reira i ni’a i te mau ha’api’ira’a a te Fatu Iesu Mesia ».

Tei roto i te reira « te fa’aro’o, te pure, te tātarahapa, te fa’a’orera’a hara, te fa’atura, te here, te aroha, te ’ohipa, ’e te mau ’ātivite maita’i ».

E nehenehe te fa’a’ohipara’a i teie mau ha’api’ira’a e ha’amaita’i i tō ’outou ’utuāfare nā roto i te mau rāve’a fa’ahiahia. ’Ei hi’ora’a, e nehenehe ’outou e :

Fa’aitoito i te purera’a ’utuāfare. E tauturu pāpū roa te pure i te mau ’utuāfare ’ia vai pūai atu ā. Mai te mea e ’ere te pure i te peu mātauhia i roto i tō ’outou ’utuāfare, ’a fa’aitoito ia rātou ’ia tāmata i te reira. E nehenehe te pure-’āmui-ra’a e hōpoi mai i te hau, te here, ’e te au-māite-ra’a.
Fa’a’ite i te here nā roto i te mau parau ’e te mau ’ohipa. ’A parau pinepine i tō ’outou ’utuāfare ē ’ua here ’outou ia rātou—noa atu ē tē mana’o ra ’outou ē ’ua ’ite a’ena rātou. Fa’a’ohipa i te mau parau maita’i ’e te fa’aitoito. E ani te reira i te Vārua i roto i tō ’outou fare.

Te tāvinira’a i tō ’outou ’utuāfare ’o te tahi atu ïa rāve’a rahi nō te fa’a’ite i te here. ’A feruri ’ia rave huna i te tahi mau ’ohipa maita’i nō tō ’outou mau taea’e ’e mau tuahine, ’aore rā nō te tauturu i te mau ’ohipa i te fare ma te ’ore e anihia mai.
’A fa’ata’a i te taime nō te pārahi ’āmui ’e nō te ’ārearea. Tē fa’ahiti nei te poro’i nō ni’a i te ’utuāfare i « te mau ’ātivite maita’i », ’ei rāve’a nō te tauturu i te mau ’utuāfare ’ia pūai ’e ’ia ’oa’oa. E nehenehe ’outou e haere nā ni’a i te pere’o’o ta’ata’ahi nā roto i te ’āua, e fa’aineine ’e e ’ōpere i te mā’a, e haere e ori haere, ’aore rā e ha’uti ’āmui i te mau tū’aro ’aore rā te mau ha’uti i ni’a i te tāpura. E nehenehe te tāpura e tāmau noa, e fa’aha’amana’ora’a rā te taime ’āmuira’a ia ’outou ē, ’o te ’utuāfare te mea faufa’a roa a’e.
’A tāvini ’āmui. E nehenehe tō ’outou ’utuāfare e ha’afātata mai nā roto i te tāvini-’āmui-ra’a. E nehenehe te reira e riro ’ei mea ’ōhie i te fa’aineinera’a i te hō’ē mā’a au-roa-hia nā te hō’ē ta’ata nava’i ’ore, ’aore rā i te tāmāra’a i te aroā o te hō’ē ta’ata tupu.

E nehenehe te Fa’aora e tauturu ’ia fa’atītī’aifaro i te mau ta’a-’ore-ra’a ’e te mau tāmatara’a i roto i te mau ’utuāfare, nā roto i te tātarahapara’a, te fa’a’orera’a hara, ’e te fa’aro’o. ’A pe’e ’e ’a tūru’i ai tātou i ni’a ia Iesu Mesia, e rahi atu ā te here ’e te fa’atura tā tātou e putapū nei i roto i tō tātou ’utuāfare.

E rave rahi atu ā rāve’a nō te ha’apūai ’e nō te fa’a’oa’oa i te mau ’utuāfare ’e nō te ha’afātata atu ā ia rātou.

E aha tā ’outou e nehenehe e rave ?

Mau parau mau nō teienei ’e nō te mau taime ato’a

’Aita e ’utuāfare maita’i roa a’e. Tē fa’aruru nei vetahi i te mau fifi rahi. E nehenehe ’outou e hi’o māite i te huru orara’a o tō ’outou ’utuāfare ’e e ui ia ’outou iho, nāhea te poro’i nō te ’utuāfare e nehenehe ai e ha’amaita’i i tō ’outou ’utuāfare. Terā rā, ’ua ’ī te reira i te mau parau mau mure ’ore ’o tē ha’amaita’i i tō ’outou ’utuāfare—noa atu te ’ohipa e tupu mai.