Mau tao’a i hunahia

I roto Te Ha’api’ira’a Tumu ’e te mau Fafaura’a 95, ’ua māuruuru ’ore ri’i te Fatu i te feiā mo’a. ’Ua fa’aue ’oia ia rātou nā mua atu ’ia patu i te hō’ē hiero (hi’o Te Ha’api’ira’a Tumu ’e te mau Fafaura’a 88:119)—pae ’āva’e rā i muri mai, ’aita noa a’e rātou i rave i te hō’ē a’e ’ohipa.

E’ita paha te reira e ferurihia mai te reira te huru i teie mahana. E ’ohipa mātāmua te patura’a i te mau hiero nō tātou ! ’Aita rā te Fatu i heheu rahi mai nō ni’a i te mau hiero i te matahiti 1833. ’Aita te feiā mo’a i māramarama hope roa i te faufa’a o te reira.

E aha ïa tā te Fatu i rave ? ’Ua ha’apāpū hu’ahu’a ’oia nō te aha ’oia e hina’aro ai ’ia patu rātou i te hō’ē hiero (hi’o Te Ha’api’ira’a Tumu ’e te mau Fafaura’a 95:8–17). ’Ua fa’ata’a hōhonu ’oia i te mea tāna i parau nā mua atu, ma te hōro’ara’a mai i te mau hi’ora’a ātea ’āpī ’e ma te ha’apāpū i te faufa’a o te reira.

I te matahiti 1834, ’ua uiui te feiā mo’a nō te aha te Fatu i vaiiho ai i tō rātou mau ’enemi ’ia hāmani ’ino ia rātou ’e ’ia tīahi ia rātou i rāpae i tō rātou iho fenua. Nā roto i te peropheta Iosepha Semita, ’ua hōro’a mai te Fatu e piti pāhonora’a.

’A tahi, ’ua parau te Fatu i te tahi taime e vaiiho ’oia i te feiā ’ī’ino ’ia rave i te mau ’ohipa ’ino « ’ia ti’a ia rātou ’ia fa’a’ī roa i te fāito nō tā rātou mau ’ohipa ’ī’ino » (Te Ha’api’ira’a Tumu ’e te mau Fafaura’a 103:3). Tē fa’ahiti ra Alama mai teie : « ’E fa’ati’a ’oia ’ia nā reira rātou [te mea ’ino]… ’e te mau ha’avāra’a tāna e fa’atae i ni’a ia rātou i roto i tōna riri ’ū’ana, e mea ti’a ïa » (Alama 14:11).

Te tahi atu tumu tei hōro’ahia mai e te Fatu i te feiā mo’a nō tō rātou mau fifi ’oia ho’i, e mea teiaha ri’i paha ’ia fa’aro’o : « ’ia ti’a ho’i ia rātou ’o tei pi’i ia rātou i tō’u nei i’oa ’ia tā’irihia, nō te hō’ē tau poto noa … nō te mea ’aita rātou i ha’apa’o māite i te mau ha’api’ira’a ’e te mau fa’auera’a tā’u i hōro’a atu ia rātou ra » (Te Ha’api’ira’a Tumu ’e te mau Fafaura’a 103:4).

’Aita te reira e parau nei ē, tē fa’ati’a nei te Atua i te mau ’ohipa ’ī’ino ’e te tano ’ore a tō rātou mau ’enemi. ’Aita ’oia i « fa’auru » i te feiā hāmani ’ino ’ia ’aro atu i te feiā mo’a ; ’ua vaiiho rā ’oia ia rātou ’ia rave i tō rātou ti’amāra’a ’e ’aita i haere mai e tāpe’a ia rātou.

’Ua fafau mai rā te Fatu noa atu ra te reira ē, mai te mea e ha’apa’o te feiā mo’a, « e ’ore roa rātou e fa’aea i te upo’oti’a » (Te Ha’api’ira’a Tumu ’e te mau Fafaura’a 103:7).

’Ua uiui paha ’outou ia ’outou iho, nō te aha te autahu’ara’a teitei i pi’ihia ai i te i’oa o Melehizedeka. ’Ua fa’ata’a mai te Fatu i te reira nā roto i te peropheta Iosepha Semita :

« Hou tōna ra mahana ’ua parauhia ïa te Autahu’ara’a Mo’a, mai te au i te Fa’anahora’a a te Tamaiti a te Atua. Terā rā nō te fa’atura i te i’oa o tei Teitei Roa, ’ia ’ore ho’i ’ia fa’ahiti-pinepine-noa-hia tōna i’oa, ’ua parau rātou, ’oia ho’i te ’ēkālesia, i te tau tahito ra, i taua autahu’ara’a ra i te i’oa o Melehizedeka, ’oia ho’i te Autahu’ara’a a Melehizedeka » (Te Ha’api’ira’a Tumu ’e te mau Fafaura’a 107:3–4).

’A feruri na i te pinepinera’a tātou e fa’ahiti i te parau « te autahu’ara’a a Melehizedeka » i roto i te mau rurura’a a te ’Ēkālesia ’e te mau ’āparaura’a. I teienei ’a feruri na ē, ’āhiri ’aita o « Melehizedeka », e parau tātou « te Tamaiti a te Atua » i te mau taime ato’a. E ha’amata te reira i te riro ’ei mea fa’atura ’ore. ’Ua hina’aro te Fatu e ’ōpani i te reira.