Te urupu’upu’u, te Vārua ’e te mau pāpa’ira’a mo’a

Fa’ahōho’ara’a nā Katelyn Budge

’Ua fa’anu’u rahi au te vāhi fa’aeara’a i roto i tō’u orara’a. Tau matahiti i ma’iri a’e nei, ’ua haere atu mātou e fa’aea i Dubai nō te tahi taime poto. I tō’u tātarara’a i tō’u vaira’a ’ahu, te tao’a hope’a i raro a’e roa ’o tā’u ïa mau pāpa’ira’a mo’a. ’Ua mana’o vau ē e ti’a iā’u ’ia tai’o i te reira. ’E ’ua nā reira vau, e ’ere te reira i te mea mātauhia, nō te mea e ’ere roa vau i te mea ’aravihi maita’i nō te pe’e i te muhumuhu a te Vārua. ’Ua ha’amata rā vau mai te ’ōmuara’a mai, ’e tē mana’o nei au ’ua tai’o vau e pae ’aore rā e ono pene.

I muri mai, ’ua anihia vau e hōro’a i te hō’ē a’ora’a i te fare purera’a. ’Ua umehia vau ’ia paraparau nō ni’a i te faufa’a rahi ’ia ’imi māite i te pāpa’ira’a mo’a. ’Ua pāpa’i au i tā’u a’ora’a ’e tō’u mau mana’o, « ’auē, e ti’a iā’u ’ia tai’o pinepine mau i te pāpa’ira’a mo’a ». ’Ua riro ato’a mai te hō’ē huru tata’ura’a i rotopū iā’u ’e tō’u pāpā. Tei roto ’oia i te Alama ’e ’ua hina’aro vau e tāpapa iāna. ’Ua ha’amata vau i te tai’o i tā’u mau pāpa’ira’a mo’a i te mau mahana ato’a—i te tahi taime 10 ’aore rā 15 pene !

’Ua ha’amata vau i te ’ite rahi atu i te mau ’ohipa e tupu ra i te pae vārua. ’Ia tai’o rahi ana’e ’outou i te reira, e fa’ati’a te reira ia ’outou ’ia fa’ari’i i te mau heheura’a nō ’outou iho. ’Ua fa’ata’a mau vau i te taime nō te Fatu.

’Ua ha’amata vau i te pāpa’i i te hō’ē buka ’ā’amu pae vārua. Teie te hō’ē tā’u i pāpa’i, « tē tai’o ra vau i te 3 Nephi e fa’ati’a ra mea nāhea tō Iesu Mesia poura’a mai i mua i te nūna’a ’e te mau mea fa’ahiahia tāna i rave. ’Ua ’ite au i te fātatara’a atu i te Metua i te ao ra ’e ia Iesu Mesia i teie mahana »

’Ua māere roa vau i te rahira’a o te mau ’ohipa i tupu ’o tā’u i ora mai, i te taime ihoā rā ’a mā’imi ai au i te reira. ’Ua parau vau iā’u iho, « ’auē ïa ē, ’ua paraparau rahi mau mai te Atua iā’u ».

’Ua tauturu mau mai te ’imi-māite-ra’a i te mau pāpa’ira’a mo’a iā’u, i roto ihoā ra i tō’u urupu’upu’u i te pae ferurira’a, nō te rahira’a o te tauira’a o te vāhi fa’aeara’a’a. Te mau pāpa’ira’a mo’a e mau parau ïa a te Mesia. E paraparau ’oia ia tātou nā roto mai i te reira. Nā roto i tāna mau parau e nehenehe au e ha’afātata atu iāna.