Te mau ha’amaita’ira’a nō te ha’amanara’a ’e te mana o te autahu’ara’a

’O Iesu Mesia te upo’o o te ’Ēkālesia. E mauiha’a te ’Ēkālesia ’o tāna i hāmani nō te fa’atupu i te ’ohipa e tītauhia o te fa’aorara’a i te ta’ata. Nā roto i te ’Ēkālesia e nehenehe ’oia e :

• Poro i tāna ’evanelia nā te ao ato’a nei.

• Pūpū i te bāpetizora’a ’e te tahi atu mau fafaura’a ato’a—’oia ato’a te hō’ē ’ē’a nō te fafaura’a e haere ti’a i tōna bāsileia tiretiera.

• Tāhō’ē i te mau ’utuāfare ē a muri noa atu.

• Pūpū i te mau hōro’a o te fa’aorara’a, ē tae noa atu i te feiā tei pohe ’aita tā rātou.

• Aupuru i te mau hina’aro pae tino o te mau tamari’i a te Atua i teie mahana.

Jesus Teaching Mary [Iesu e ha’api’i ra ia Maria], nā Dan Burr

Nō te rave fa’aoti i teie mau ’ōpuara’a rarahi ’e nō te fa’aineine i te ho’ira’a mai o te Fa’aora, e hina’aro te ’Ēkālesia i te arata’ira’a tāmau a te Atua, tāna ha’amanara’a ’e tōna mana. Te ’Ēkālēsia ’o te « ’ēkālēsia mau ïa ’e te mea ora » (Te Ha’api’ira’a Tumu ’e te mau Fafaura’a 1:30) nō te mea tē ha’amana nei te Mesia i te reira i tāna fa’aterera’a ’e tōna mana nā roto i tōna autahu’ara’a.

’Āhiri ’aita teie autahu’ara’a mo’a, e riro noa ïa te ’Ēkālesia ’ei fa’anahora’a nā te ta’ata noa mai te tahi atu mau pu’era’a, ma te ravera’a i te maita’i i roto i te ao nei, ’aita rā tō rātou e mana nō te rave fa’aoti i te ’ōpuara’a nō te fa’aineine i te mau tamari’i a te Atua ’ia fa’ari’i i te ’oa’oa o te ora mure ’ore i mua i tōna aro. Nā roto i teie autahu’ara’a, ’e te mau tāviri nō te arata’i i te ’ohipa o teie autahu’ara’a, tē vai nei te ha’amanara’a ’e te nahonaho i roto i te ’Ēkālesia.

« I roto i te ’Ēkālesia, e fa’a’ohipahia te ha’amanara’a o te autahu’ara’a ato’a i raro a’e i te arata’ira’a a te feiā tei mau i te mau tāviri autahu’ara’a.

« E fa’ari’i te mau melo tāne ti’amā o te ’Ēkālesia i te ha’amanara’a o te autahu’ara’a nā roto i te hōro’ara’a i te autahu’ara’a ’e te fa’atōro’ara’a i te mau tōro’a o te autahu’ara’a. E nehenehe te mau melo ato’a o te ’Ēkālesia e fa’a’ohipa i te ha’amanara’a i hōro’ahia mai i te taime ’a fa’ata’ahia ai rātou ’aore rā, ’a fa’auehia ai rātou ’ia tauturu i roto i te ravera’a i te ’ohipa a te Atua ».

’A ’īritihia ai te Buka a Moromona i te matahiti 1829, ’ua ha’amata te Fatu i te fa’aho’i mai i tāna fa’anahora’a o te autahu’ara’a. ’Ei pāhonora’a i te pure a Iosepha Semita ’e Oliver Cowdery nō ni’a i te bāpetizora’a, ’ua fā mai Ioane Bāpetizo tei ti’afa’ahou ’e ’ua hōro’a ia rāua i te Autahu’ara’a a Aarona, tei « mau i te mau tāviri nō te utuutura’a a te mau melahi, ’e nō te ’evanelia nō te tātarahapa, ’e nō te bāpetizora’a nā roto i te utuhira’a nō te matarara’a hara » (Te Ha’api’ira’a Tumu ’e te mau Fafaura’a 13:1). Nā roto i taua ha’amanara’a ra, ’ua bāpetizo Iosepha ’e ’o Oliver ia rāua te tahi i te tahi ’oia ato’a i te tahi mau ta’ata, i te taime ’a fa’anaho-mau-hia ai te Ēkālesia.

’Aita i maoro roa, ’ua fā mai te mau ’āpōsetolo tahito ’o Petero, Iakobo ’e Ioane ’e ’ua hōro’a i te autahu’ara’a teitei a’e ’aore rā te autahu’ara’a a Melehizedeka, tei roto « te mau tāviri nō tō’u bāsileia ’e te tau tu’ura’a ’evanelia nō … te ’īra’a o te mau tau ! » (hi’o Te Ha’api’ira’a Tumu ’e te mau Fafaura’a 27:12–13 ; 128:20).

’Ua tae mai te tahi atu ha’amanara’a o te autahu’ara’a ’a fā mai ai e toru nā peropheta tahito, ’o Mose, Elia ’e ’o Eliaha, ia Iosepha ’e ia Oliver i roto i te hiero nō Kirtland ’e ’ua hōro’a ia rāua ra te mau tāviri nō te ha’aputuputura’a o ’Īserā’ela ’e nō te ’ohipa hiero a te Fatu (hi’o Te Ha’api’ira’a Tumu ’e te mau Fafaura’a 110:11–16).

’Ei ha’apotora’a, te fā nō te ha’amanara’a ’e te mana o te autahu’ara’a tā Iesu Mesia i fa’aho’i mai, nō te ha’amaita’i ïa. E fa’ati’a te reira i te mau melo ato’a o te ’Ēkālesia ’ia fa’a’ohipa i te mana o te Atua i roto i te tāvinira’a ’e te ha’amaita’ira’a ia vetahi ’ē i roto i te ’Ēkālesia, i te fare ’e nā te ao ato’a nei. E ’āmui te mau melo i te Fa’aora i roto i te rave-fa’aoti-ra’a i tāna ’ohipa nō te fa’aorara’a ’e te fa’ateiteira’a, ma te fa’a’ohipa i te mau hōro’a hanahana ’e te mana i ’ō atu i tō rātou iho, nō te tauturu i te bāsileia o te Atua ’ia tupu i te rahi nō te fa’a’ī i te fenua nei (hi’o Te Ha’api’ira’a Tumu ’e te mau Fafaura’a 65:2, 5–6).

Tē fa’ata’a nei te Fatu ē « ’e ’o teie autahu’ara’a rahi a’e ïa ’o te fa’atere i te ’evanelia ’e ’o tē mau ho’i i te tāviri nō te mau parau ’aro nō te bāsileia, ’oia ïa te tāviri nō te ’ite i te Atua.

« Nō reira, i roto i te mau ’ōro’a nō te reira te mana nō te huru Atua e fa’a’itehia mai ai » (Te Ha’api’ira’a Tumu ’e te mau Fafaura’a 84:19–20).

Te mau ’ōro’a e mau ravera’a hanahana e fa’aterehia e te autahu’ara’a nā roto i te reira tātou e rave ai i te mau fafaura’a ’e te Atua, ma te ha’amata nā roto i te bāpetizora’a ’e haere atu ai nā roto i te mau fafaura’a e fa’ari’ihia i roto i te fare o te Fatu. Mea nā roto i te ha’apa’ora’a i teie mau fafaura’a tātou e tauihia ai mai te mau tāne ’e te mau vahine « nātura » ’ei feiā mo’a (hi’o Mosia 3:19) nā roto i te aroha tāra’ehara o te Mesia ’e e riro mai e mea ti’a ’e te ha’amo’ahia—ma te hapa ’ore ’e te pora’o ’ore—i mua i te Atua (hi’o Te Ha’api’ira’a Tumu ’e te mau Fafaura’a 20:29–31 ; 3 Nephi 27:16–20).

Christ in America [Te Mesia i Amerika], nā Ben Sowards

« Te fa’aho’i-fa’ahou-ra’a mai o te ’īra’a o te ’Evanelia a Iesu Mesia : E poro’i i tō te ao nei nō te piti-hānere-ra’a o te matahiti », nā te Peresidenira’a Mātāmua ’e te pupu nō te Tino ’Ahuru ma Piti ’āpōsetolo, e ha’apoto maita’i i teie parau poro’i :

« Tē parau nei mātou ē Te ’Ēkālesia a Iesu Mesia i te Feiā Mo’a i te mau Mahana Hope’a nei, tei fa’ati’ahia i te 6 nō ’Ēperēra 1830, ’o te ʼĒkālesia ïa o te Faufa’a ’Āpī a te Mesia tei fa’aho’i-fa’ahou-hia mai. ’Ua mau teie ’Ēkālesia i ni’a i te orara’a maita’i roa ’o tāna ’ōfa’i tihi tumu, ’o Iesu Mesia ,’e i ni’a i tāna tāra’ehara mure ’ore ’e tōna ti’afa’ahoura’a mau. ’Ua pi’i fa’ahou Iesu Mesia i te mau ’āposetōlo ’e ’ua hōro’a ia rātou i te mana o te autahu’ara’a. Tē ani manihini nei ’oia ia tātou pā’āto’a ’ia haere mai iāna ra ’e i tāna ’Ēkālesia, ’ia fa’ari’i i te Vārua Maita’i, te mau ’ōro’a nō te fa’aorara’a ’e ’ia roa’a ho’i te ’oa’oara’a tāmau ».