Nō te mau mahana maita’i ato’a ’o Iesu Mesia.
’Ia maita’i ana’e te mau mea, nāhea tātou ’ia vai tūtonu noa i ni’a i te Fa’aora ? Teie te tahi mau mana’o.
’A feruri na, ’aita te hō’ē hoa e pārahi mai i pīha’i iho ia ’oe i te taime ana’e e fifihia ’oia ’e e ’ape ia ’oe ’ia ’oa’oa ana’e ’oia. E tā’amura’a maita’i ānei ? ’Aita paha ?
Mai te reira ānei tō tātou huru i ni’a i tō tātou Fa’aora—e ’imi iāna i roto i te mau taime fifi ’e e ha’amo’e iāna i te mau taime maita’i ?
Tē parau rahi nei tātou e mea nāhea Iesu Mesia i te tauturu ia tātou i roto i tō tātou mau taime fifi, pēnei a’e nō te mea tātou pā’ātoa, i te hō’ē taime, e fa’aruru tātou i te mau ’ohipa fifi.
Tē vai ra rā te tahi mau mahana—te mau hepetoma ’aore rā ’oia ato’a te mau matahiti, mai te peu e fana’o tātou—e mea maita’i roa te mau mea ato’a. I te tahi taime e mo’ehia ia tātou te Fa’aora i roto i te reira mau taime. ’Ua nā reira te mau nūna’a o te Buka a Moromona. ’Ua manuia rātou i te hō’ē tau maoti te mau ha’amaita’ira’a a te Atua, i te pae hope’a rā ’ua topa rātou i roto i te te’ote’o ma te mo’era’a ’oia ia rātou.
’Aita te mau taime maita’i i te aura’a ē, ’aita tātou i reira iho e hina’aro fa’ahou ia Iesu Mesia. Te mau taime manuiara’a ’o te taime maita’i roa ïa nō te ’oa’oa ’e te Fa’aora, ’e ’eiaha rā nō te ha’amo’e iāna.
Nō reira, nāhea ïa tātou ’ia vai tū’ati noa ia Iesu Mesia ’e i tō tātou Metua i te ao ra, ’ia ’ore ana’e te mau tāmatara’a e fa’aha’amana’o ia tātou ’ia fāriu atu i ni’a ia rāua ?
’Ia vai ha’eha’a noa
’Ia maita’i ana’e te mau mea ato’a, e mea maita’i ’ia fa’ahanahana i tā ’outou mau ha’amaita’ira’a ’e mau manuiara’a. ’Eiaha rā ’ia mo’ehia ia ’outou nā vai i fa’atae mai ia ’outou i reira i te vāhi tei reira ’outou. ’Ua fa’ahiti te ari’i Beniamina i te reira i roto i tāna a’ora’a i roto i te Buka a Moromona :
« Inaha ho’i, e ’ere ānei tātou pā’āto’a i te feiā tāparu ? ’Aita ānei tātou pā’āto’a e ti’aturi nei i te hō’ē ā ta’ata, ’oia ho’i i te Atua, nō te mau mea ato’a tā tātou i fa’ari’i ; nō te mā’a ’e te ’ahu, ’e nō te auro, ’e te ’ārio, ’e nō te mau huru tao’a ato’a tā tātou i fa’ari’i ? » (Mosia 4:19).
Te vai-ha’eha’a-ra’a i mua i tō ’outou manuiara’a ma te ha’amana’ora’a i te mea tā te Metua i te ao ra ’e tā Iesu Mesia i rave nō ’outou, ’o te hō’ē ïa rāve’a maita’i roa nō te fa’aō mai ia rāua i roto i tō ’outou mau taime ’oa’oa.
’Ia roa’a te ’ā’au māuruuru
Te ’ā’au māuruuru ’o te hō’ē ïa o te mau rā’au tinai pūai roa a’e nō te te’ote’o ’e te ’aramōinara’a. Te ha’amāuruurura’a i te Atua e tauturu ia ’outou ’ia ha’amana’o iāna, ’e i te mau mea maita’i ato’a tāna ’e tā tāna Tamaiti e rave nei i roto i tō ’outou orara’a. E mea tano ato’a te reira i roto i te mau taime maita’i mai i te mau taime fifi.
’Ia vai ara noa
Hō’ē o te mau ’arora’a au roa a Sātane ’oia ho’i e « fa’ahau ’e e fa’ata’oto ho’i ia [’outou] i te ta’oto hau roa » (2 Nephi 28:21). E nehenehe e parau, e au roa ïa ’oia ’ia putapū ’outou i te māuruuru rahi ’e te pārurura’a i roto i tō ’outou mau taime maita’i, ’ia mo’ehia ia ’outou te mea faufa’a a’e. Nō reira, ’eiaha e ha’amo’e i te Atua ! ’Ia vai ara ana’e ’outou i te mau fa’ahemera’a a te ’enemi ’e ’ia pāto’i i te reira i roto ato’a i tō ’outou mau taime maita’i, e vai fātata noa ’outou i te Metua i te ao ra ’e ia Iesu Mesia.
The Good Shepherd [Te tīa’i māmoe maita’i], nā Michael Malm
’Ia vai tūtonu noa i ni’a i te Mesia
’Ua ha’api’i te peresideni Russell M. Nelson : « ’Ia fa’atumu ana’e tātou i tō tātou orara’a i ni’a i te ’ōpuara’a nō te fa’aorara’a a te Atua… ’e ia Iesu Mesia ’e i tāna ’evanelia, e nehenehe ihoā tātou e fāri’i i te ’oa’oa noa atu te mea e tupu mai—’aore rā ’o te ’ore e tupu mai—i roto i tō tātou orara’a. Nō ’ō mai iāna ra ’e nōna te ’oa’oa e tae mai ai. ’O ’oia te tumu o te ’oa’oa ato’a ».
E aha te pinepinera’a e feruri ai ’outou i teie parau mau nō ni’a i te ’oa’oa, ’ia maita’i ana’e te orara’a ? E ’ere noa i te parau a’o tāmāhanahana nō te mau taime fifi. E parau mau tāmau te reira, ’oia ato’a i roto i tō ’outou mau mahana maita’i a’e. Nō reira, ’a rave ma tō ’outou pūai ato’a nō te rōtahi i ni’a i te Mesia, i te mau taime fifi ’aore rā te mau taime maita’i.