Te mau tāpa’o nō te Tae-piti-ra’a mai : ’Aita e tumu ’ia mata’u

Nā David A. Edwards ’e Eric B. Murdock

Te mau ve’a a te ’Ēkālesia

’Ua tohuhia te mau tupura’a ’ohipa fifi mau hou te ho’ira’a mai o te Fa’aora. E mau tumu maita’i rā tō ’outou ’eiaha e mata’u.

E ho’i fa’ahou mai tō tātou Fa’aora, ’o Iesu Mesia. ’Ua ha’api’i ’oia i teie parau mau pāpū maita’i (hi’o Mataio 24). E rave rahi ta’ata tei hina’aro e ’ite i te taime e tupu ai te reira, ’ua parau rā Iesu, « ’āre’a te reira mahana ’e te reira hora, e ’ore roa te hō’ē e ’ite, e ’ore ho’i te mau melahi o te ra’i ; maori rā o tā’u Metua ana’e rā » (Mataio 24:36).

Teie rā, ’ua heheu mai te Fatu e rave rahi tāpa’o ’o tē nā mua mai i tōna Tae-piti-ra’a mai. E rave rahi o rātou e mea ’ana’anatae ’e te fa’ahiahia, mai te fa’aho’i-fa’ahou-ra’a mai o te ’evanelia, te taera’a mai te Buka a Moromona, ’e te ha’aputuputura’a o ’Īserā’ela.

Terā rā tē vai ra … te tahi atu mau tāpa’o. ’Ei hi’ora’a :

Te mau tama’i, te mau parau nō te mau tama’i, ’e te ’ārepurepura’a rahi.
Te mau o’e, te mau ma’i, ’e te mau ’āueuera’a fenua.
Te mau tāpa’o i ni’a i te ra’i (’oia ato’a te mahana, te ’āva’e, ’e te mau feti’a) ’e i ni’a i te fenua (’oia ato’a te auahi, te mau mata’i pūai, te mau vero, ’e te mahu auahi).
Te ’ino, te te’ote’o, ’e te aoaoa.

E nehenehe teie mau mea ato’a e riro ’ei mea ri’ari’a. Nō reira, ’ua parau te Fa’aora ē i te mau mahana hope’a nei, e ’āhuehue te ’ā’au o te ta’ata e rave rahi nō tō rātou mata’u.

I teienei, penei a’e tē hi’o nei ’outou i te mau fifi ’ati a’e te ao nei, nā reira ato’a te mau tāmatara’a tā ’outou iho e fa’aruru nei, ’e tē teimaha nei ’e tē pe’ape’a nei ’outou. E riro paha ’outou i te uiui e aha te mau ’ohipa e tupu mai e riro e mea ri’ari’a a’e ’e mea fifi roa a’e ’a piri mai ai te Tae-piti-ra’a mai.

e ta’ata e tūra’i ra i te hō’ē menemene rahi o te fenua nā ni’a mai i te hō’ē ’āivi

E ’ere rā mai te reira tā Iesu Mesia e hina’aro nei ia ’outou—te hō’ē o tāna mau pipi—’ia tīa’i i tōna ho’ira’a mai.

Te parau poro’i a te Fatu i tāna mau pipi

Noa atu te ’ārepurepura’a ’e te ’āehuehura’a o te mau mahana hope’a nei, ’ua parau te Fa’aora i tāna mau pipi, « ’eiaha e pe’ape’a ». Nō te aha ? Nō te mea « ’ia hope teie nei mau mea ato’a i te tupu, e ’ite ai ’outou ē e fa’atupuhia te mau fafaura’a i fafauhia atu ia ’outou na » (Te Ha’api’ira’a Tumu ’e te mau Fafaura’a 45:35).

’Ua parau mai Iesu Mesia ia tātou « ’eiaha e mata’u » (Te Ha’api’ira’a Tumu ’e te mau Fafaura’a 50:41) ’e « ’ia ’oa’oa maita’i » (Te Ha’api’ira’a Tumu ’e te mau Fafaura’a 61:36). Nō reira, ’āhiri i te rōtahira’a i ni’a i te mau ’ati e tae mai, e mea maita’i a’e paha e taui i tā tātou fa’atumura’a.

Teie e toru rāve’a faufa’a roa ’o tā ’outou e nehenehe ’ia « ’ore e mata’u », ’ia hi’o i mua i te Tae-piti-ra’a mai hanahana, ’e ’ia parau mai ia Ioane te Heheu parau, « ’a haere mai, e te Fatu Iesu » (Apokalupo 22:20).

1. ’A hi’o i te peropheta

’Ua fa’aara te Fa’aora ē, hou tōna ho’ira’a mai e rave rahi Mesia ha’avare ’e te mau peropheta ha’avare ’o tē fa’ahema e rave rahi ta’ata. ’Ati a’e ia tātou, e tāmata te mau reo pūai, te ’āhuehue ’e te ’aipa [négative] i te arata’i ’ē ia tātou. I te mau mahana hope’a nei, « e fa’atupu [Sātane] i te ’ārepurepu i roto i te ’ā’au o te mau tamari’i a te ta’ata nei, ’e e fa’ati’arepu ho’i ia rātou ’ia riri i te mea maita’i » (2 Nephi 28:20). ’Oia ato’a te feiā i mā’itihia e fāriu ’ē i te parau mau.

’Ua hōro’a mai rā te Fatu i te hō’ē tauturu faufa’a rahi ia tātou. ’Ua pi’i ’oia i te mau peropheta nō te ha’amaita’i ’e nō te arata’i ia tātou. E’ita roa te Peresidenira’a Mātāmua ’e te pupu nō te Tino ’Ahuru ma Piti ’āpōsetolo e arata’i ’ē ia tātou. ’Ua parau te Fa’aora, « nā roto i tō’u iho reo ’e ’aore rā nā roto i te reo o tō’u mau tāvini, hō’ē ā ïa » (Te Ha’api’ira’a Tumu ’e te mau Fafaura’a 1:38). E nehenehe ’outou e ani i te Metua i te ao ra ’ia ha’apāpū mai te Vārua Maita’i i te mau parau mau tā rātou e ha’api’i nei, mai te mau ha’api’ira’a ’āpī a te peresideni Russell M. Nelson : « E tae mai te mea maita’i roa a’e, … nō te mea tē ho’i fa’ahou mai ra te Fa’aora ! » ’E : « Tē fa’aineine nei ’oia nō te ho’i mai. ’Ia ineine ato’a tātou nō te fa’ari’i iāna ».

’E ’a pe’e ai ’outou i tā rātou mau ha’api’ira’a « ma te fa’a’oroma’i ’e te fa’aro’o » (Te Ha’api’ira’a Tumu ’e te mau Fafaura’a 21:5), e nehenehe ’outou e ’ite nō te aha rātou e riro ai ’ei ha’amaita’ira’a nō tō ’outou orara’a.

’Ua parau Elder Allen D. Haynie nō te Hitu ’Ahuru : « I tō’u tamari’i-ri’i-ra’a, ’ua fa’ari’ari’a [te] mau tohura’a o te mau mahana hope’a nei iā’u ’e ’ua tūra’i iā’u ’ia pure ’eiaha te Tae-piti-ra’a mai ’ia tupu ’a ora ai au. … I teienei rā tē pure nei au ’ia tupu te reira. …

« … ’Eiaha tātou e mata’u. Te ha’api’ira’a tumu ’e te mau parau tumu ’o tā tātou e ti’a ’ia pe’e nō te ora i te pae vārua ’e ’ia fa’a’oroma’i i te pae tino, e ’itehia ïa i roto i te mau parau a te hō’ē peropheta ora ».

’A pe’e ai ’outou i te arata’ira’a a te mau peropheta ’e te mau ’āpōsetolo, e monohia tō ’outou mau mata’u e te fa’aro’o, te tīa’ira’a ’e te ’oa’oa.

2. ’A ti’a i te mau vāhi mo’a

’Ua parau te Fa’aora ē i rotopū i te mau ’ati rahi o te mau mahana hope’a nei, « e ti’a noa tā’u mau pipi i te mau vāhi mo’a ra, ’e e ’ore roa rātou e fa’anu’u-’ē-hia atu » (Te Ha’api’ira’a Tumu ’e te mau Fafaura’a 45:32). Teie mau vāhi mo’a ’oia ho’i tō tātou mau fare, te mau fare purera’a ’e te mau hiero.

Nō ni’a i te mau hiero, ’ua ha’api’i te peresideni Nelson ē « tō tātou pārurura’a pāpū roa a’e ’o te tāmau-noa-ra’a ïa ’ia vai ti’a-mā nō te tomo i roto i tōna fare mo’a ». ’E « e tauturu te taime rahi e ravehia i roto i te hiero ia tātou ’ia fa’aineine nō te Tae-piti-ra’a mai ».

3. Fa’aineine i te ao nei

Hō’ē ’o te mau ’ohipa tā te ’Ēkālesia a Iesu Mesia e rave nei i te mau mahana hope’a nei, ’o te tauturura’a ïa i te fa’aineine i te ao nei nō tōna ho’ira’a mai. ’E e nehenehe ’outou e tauturu ma te ’āmuira’a mai i roto i tāna ’ohipa.

E nehenehe ’outou e fa’a’ite i te ’evanelia ia vetahi ’ē ’e e tauturu i te ’āfa’i i te māramarama ’e te parau mau a te Atua i te feiā « tei fa’a’erehia i te parau mau nō te mea ’aita rātou i ’ite i te vāhi te reira e ’itehia mai ai » (Te Ha’api’ira’a Tumu ’e te mau Fafaura’a 123:12).

E nehenehe ato’a ’outou e rave i te mau bāpetizora’a i roto i te hiero nō te feiā i terā pae mai o te pāruru, ’o tei ora na ’e ’ua « pohe ma te ’ite ’ore i [te] ’evanelia, ’o tei fa’ari’i rā i te reira » (Te Ha’api’ira’a Tumu ’e te mau Fafaura’a 137:7).

Ma te rahi o te ’aipa i roto i te ao nei, e nehenehe ’outou e riro ’ei māramarama nō vetahi ’ē ’e e tauturu i te hōpoi mai i te fa’aorara’a i te ao nei. E nehenehe ’outou e tauturu i te fa’aineine i te hō’ē nūna’a i reira te Fa’aora e nehenehe e haere atu ’e tei ineine nō te fa’ari’i iāna.

E hōpoi’a rahi teie ’e e ’ohipa fa’ahiahia e ti’a ’ia tīa’i.