Vipi Kama Ninahangaika Kupata Marafiki?

Mwaka huu nilipobadilisha kwenda shule mpya, nililia sana kwa sababu sikutaka kuwaacha marafiki zangu wa zamani. Nilijiambia kamwe sitapenda shule yangu mpya na nilihisi kama ningewasaliti marafiki zangu wa zamani kama ningetafuta wapya.

Wiki yote, nilikunja uso wangu. Sikuzungumza na yeyote. Kulikuwa na baadhi ya wasichana ambao walijaribu kuzungumza nami, lakini sikuwa nikitafuta kufanya urafiki nao.

Siku moja, niligundua sikutaka kuwa mpweke. Niliona kwamba nilihitaji kuwa wazi zaidi. Wakati nikitazama mfululizo wa vipindi vya televisheni kuhusu Yesu Kristo, nilipata mwongozo wa kiungu wa kufikiria kuhusu jinsi Alivyopata marafiki. Hata Yeye hakumpendeza kila mtu, lakini kwa watu wengi, Alibadilisha maisha yao.

Kwa sababu ya mfano wa Kristo, niliamua kujaribu kuwa na marafiki wapya, hata kwa hofu niliyokuwa nayo. Nilikuwa na hofu kwa sababu nilikuwa na aibu na nilikuwa na wasiwasi kwamba watu wangenidhihaki. Lakini nilipata wazo, “Unaye Baba wa Mbinguni ambaye atakusaidia. Hata kama kila mmoja akikukataa, yeye atakuwa hapo.”

Sasa nikitazama nyuma, ninaweza kuona kwamba Rafiki mmoja ambaye kamwe hakuniacha wakati huo alikuwa Mwokozi. Kwa sababu ya uzoefu mgumu niliopitia, nilisogea karibu zaidi na Yeye. Anatupenda sana kiasi kwamba alitoa uhai Wake kwa ajili yetu. Na alitupatia maandiko ili tuweze kujua jinsi ya kuwa kama Yeye. Unaweza daima kumtegemea Yesu Kristo kuwa Rafiki yako.