Vakacava Ke Dredre Meu Veitokani?

Ena yabaki oqo niu a veisau ki na dua na koronivuli vou, au tagi vakalevu baleta niu sega ni vinakata meu biuti ira na noqu itokani makawa. Au a kaya lo niu na sega ni taleitaka na noqu koronivuli vou kau vakila niu na liumuritaki ira na noqu itokani makawa kevaka au vakaitokani vou.

Ena loma ni macawa taucoko, au a matararawa voli ga. Au a sega ni vosa vua e dua. Eso na goneyalewa era tovolea me veivosaki kei au, ia au sega ni vinakata meu veitokani vata kei ira.

Ena dua na siga, au qai kila niu sega ni via tiko duadua. Au raica ni dodonu meu yalorawarawa vakalevu. Niu sarava tiko e dua na iyaloyalo ena retioyaloyalo me baleti Jisu Karisito, au a vakauqeti meu vakasamataka na sala a dau veitokani kina o Koya. O Koya mada ga a sega ni vakamarautaki ira kece, ia vei ira e vuqa na tamata, a veisautaka o Koya na nodra bula.

Ena vuku ni ivakaraitaki i Karisito, au a nanuma meu tovolea meu vakaitokani vou, ena gauna mada ga au rere kina. Au rere baleta niu madua ka lomaleqataka de ra na vakalialiai au na tamata. Ia au a vakasamataka, “E tiko e dua na Tamamu mai Lomalagi ka na vukei iko. Kevaka sara mada ga era sega ni ciqomi iko na tamata kecega, ena tiko e kea o Koya.”

Niu rai lesu qo, au raica rawa ni iTokani duadua ga a sega vakadua ni biuti au ena gauna o ya sa ikoya na iVakabula. Ena vuku ni veika dredre au a sotava, au sa voleka sara kina Vua. E lomani keda vakalevu sara o Koya ka solia kina na Nona bula ena vukuda. Ka solia vei keda o Koya na ivolanikalou me rawa ni da kila na sala meda vakataki Koya kina. E rawa ni o dau vakararavi tu ga vei Jisu Karisito me nomu iTokani.