Na Ivakaro ni Matavuvale kei Iko
Sa yabaki 30 na ivakaro ni matavuvale ena vula oqo. Raica na sala e rawa ni vakalougatataka kina na nomu matavuvale nikua.
Droini mai vei Irtaxe López de Munáin
Ena 30 donu na yabaki sa oti, ena Sepiteba ni 1995, eratou a solia kina na Mataveiliutaki Taumada kei na Kuoramu ni iApositolo Le Tinikarua “Na Matavuvale: A Ivakaro ki Vuravura Raraba,” ka tukuna kina ni “matavuvale sa itakele ni nona ituvatuva na Dauniveibuli me baleta na nodra icavacava tawamudu na Luvena.”
O Peresitedi Dallin H. Oaks, na iMatai ni Daunivakasala ena Mataveiliutaki Taumada, a dua tiko na iApositolo ena gauna o ya. A kaya o koya, “Au vakadinadinataka ni ivakaro ena matavuvale sa itukutuku ni dina tawamudu. … Vakavuvulitaka, bulataka, ko na qai vakalougatataki.”
Na ivakaro ni matavuvale sa vakalougatataki ira na matavuvale e vuravura raraba ena loma ni 30 na yabaki—ka na tomani tiko vakakina.
iVakasala me Baleta na Matavuvale Qaqa ka Mamarau
Ena ivakaro ni matavuvale, era vakadinadinataka na parofita kei na iapositolo ni “na qai laki kunei ga na bula marau ena veimatavuvale, ke yavutaki ena ivakavuvuli ni Turaga o Jisu Karisito.”
Oqo e oka kina na “vakabauta, masumasu, veivutuni, veivosovosoti, veidokai, veilomani, yalololoma, gugumatua, kei na golevi ni itavi qaravi vivinaka.”
Na vakayagataki ni ivakavuvuli oqo ena rawa ni vakalougatataka na nomu matavuvale ena veisala vakasakiti. Kena i vakaraitaki, sa rawa mo:
-
Vakayaloqaqataka na masu vakamatavuvale. Na masu ena vukea dina na matavuvale me qaqaco cake. Kevaka e sega ni itovo tudei ena nomu matavuvale na masu, vakayaloqaqataki ira me ra tovolea. Na masu vata e rawa ni kauta mai na vakacegu, loloma, kei na duavata.
-
Vakaraitaka na loloma ena vosa kei na ivalavala. Tukuna wasoma cake ki na nomu matavuvale ni o lomani ira—kevaka sara mada ga o vakadeitaka ni ra sa kila oti tu. Vakayagataka na vosa ni yalovinaka ka veivakayaloqaqataki. Oqo ena sureta na Yalotabu ki na nomu itikotiko.
Na qaravi ni nomu matavuvale e dua tale na sala cecere ni kena vakaraitaki na loloma. Navuca mo cakava eso na ka vuni me baleti ira na tacimu se veivuke ena cakacaka e vale ni o sega ni kerei.
-
Vakayagataki gauna vata ka marautaka. E tukuni ena ivakaro ni matavuvale na “golevi ni veivakabulabulataki vivinaka” me dua na sala me vukei kina na matavuvale me kaukauwa ka mamarau. E rawa ni o vodo basikeli ena vanua ni gade, vakarautaka ka wasea na kakana, taubale vakalekaleka, se qito se veimau vata. E rawa ni toso tiko na lisi, ia na nomu dau tiko vata ena vakananumi iko ni sa ka bibi duadua na matavuvale.
-
Veiqaravi vata. E rawa ni veivolekati sara na nomu matavuvale ni dou veiqaravi vata. Oqo e rawa ni rawarawa sara me vaka na kena vakarautaki e dua na kakana taleitaki vua e dua e vakaleqai tu se sivi uca cevata mai na gaunisala nei dua e tiko voleka.
Sa rawa vua na iVakabula me vukea na kena wali na veilecayaki kei na bolebole ena loma ni matavuvale ena veivutuni, veivosovosoti, kei na vakabauta. Ni da vakamuri ka vakararavi vei Jisu Karisito, ena tubu cake na loloma kei na veidokai eda vakila ena noda matavuvale.
E vuqa tale na sala me vaqaqacotaki ka marau kina na matavuvale ka kauti ira vata mai vakavoleka sara.
Na cava eso na ka o rawa ni cakava?
Na Dina ena Gauna Oqo kei na Veigauna Kecega
Sega ni dua na matavuvale e vinaka sara Eso era sotava na bolebole levu. O na raica beka na ituvaki ni nomu matavuvale ka vakataroga na sala e rawa ni vakalougatataka kina na nomu matavuvale na ivakaro ni matavuvale. Ia e sinai tu ena dina tawamudu ka na vakalougatataka na nomu matavuvale—se cava ga e yaco.