Na Veivakalougatataki ni Lewa kei na Kaukauwa ni Matabete

E iliuliu ni Lotu o Jisu Karisito. Na Lotu sa iyaya ni cakacaka sa bulia o Koya me vakacavari kina na cakacaka bibi ni veivueti ni kawatamata. Mai na Lotu, e rawa kina Vua me:

• Vunautaka na Nona kosipeli e vuravura raraba.

• Solia na papitaiso kei na veiyalayalati kece tale eso—io e dua sara madaga na salatu ni veiyalayalati ki na Nona matanitu vakasilesitieli.

• Vakaduavatataka na matavuvale me tawamudu.

• Solia na isolisoli ni veivakabulai, vei ira sara madaga era sa mate ka sega tu ni ra rawata.

• Qarava na nodra gagadre vakayago na luve ni Kalou ena gauna oqo.

Vakavulici Meri o Jisu, mai vei Dan Burr

Me rawati na inaki cecere oqo, ka vakavakarau ki na nona lesu tale mai na iVakabula, e gadreva na Lotu na veidusimaki tomani tiko, na lewa, kei na kaukauwa ni Kalou. Na Lotu sa ikoya na “lotu dina ka bula” (Vunau kei na Veiyalayalati 1:30) baleta ni solia kina na Karisito na Nona veiliutaki kei na kaukauwa mai na Nona matabete.

Kevaka e sega na matabete tabu oqo, sa na dua na isoqosoqo vakavuravura na Lotu me vakataki ira e vuqa tale, ka caka vinaka tiko e vuravura ia ena sega na kaukauwa me rawata na inaki ni nodra vakarautaki na luve ni Kalou ki na reki ni bula tawamudu ena Nona iserau. Mai na matabete oqo, kei na idola me dusimaki kina na cakacaka ni matabete oqo, sa tiko ruarua kina na lewa kei na ivakarau ena Lotu.

“Ena Lotu, na lewa kece sara ni matabete e vakayacori ena nodra veidusimaki o ira era taura tu na idola ni matabete.

“O ira na lewe ni Lotu tagane bula kilikili era ciqoma na lewa ni matabete ena veivakatikori ni matabete kei na veitabaki ki na itutu ni matabete eso. Na lewe ni Lotu kece e rawa ni ra cakacakataka na lewa lesi era sa vakatikori se lesi kina me vukea na kena vakavatukanataki na cakacaka ni Kalou.”

Ni sa vakadewataki tiko na iVola i Momani ena 1829, a tekivu tuvanaka na Turaga na Nona ituvatuva vakamatabete. Me isau ni nodrau masu o Josefa Simici kei Oliva Kauderi me baleta na papitaiso, a rairai mai o Joni na Dauveipapitaiso sa tucaketale ka vakatikora vei rau na Matabete i Eroni, ka sa “koto kina na idola ni nodra veiqaravi na agilosi, kei na kosipeli ni veivutuni kei na papitaiso ena tabadromuci me bokoci kina na ivalavala ca” (Vunau kei na Veiyalayalati 13:1). Ena veivakadonui oqori, erau a veipapitaisotaki vakai rau o Josefa kei Oliva kei ira tale eso ena gauna a tauyavutaki kina na Lotu.

Sega ni dede ni oti o ya, eratou a rairai mai na iApositolo makawa o Pita, Jemesa, kei Joni ka vakatikora na Matabete cecere cake se Melikiseteki, oka kina “na idola ni noqu matanitu, kei na dua na itabagauna ni kosipeli me baleta … na taucoko ni gauna!” (raica na Vunau kei na Veiyalayalati 27:12–13; 128:20).

A yaco mai na ikuri ni lewa ni matabete ena nodratou rairai vei Josefa kei Oliva ena Valetabu e Kirtland e tolu na parofita ni gauna makawa, o Mosese, Ilaisa, kei Ilaija, ka solia vei rau na idola ni nodra vakasoqoni vata mai na Isireli kei na cakacaka ni valetabu ni Turaga (raica na Vunau kei na Veiyalayalati 110:11–16).

Ena dua na vosa, na inaki ni lewa kei na kaukauwa ni matabete sa vakalesuya mai o Jisu Karisito o ya me veivakalougatataki. Ena rawa kina vei ira kece na lewe ni Lotu me ra vakayagataka na kaukauwa ni Kalou ena nodra qaravi ka vakalougatataki ira na tani ena Lotu, e vale, kei na veiyasai vuravura. O ira na lewenilotu era duavata kei na iVakabula ena kena vakayacori rawa na Nona cakacaka ni veivakabulai kei na bula vakacerecerei, ena nodra vakayagataka na isolisoli vakalou kei na kaukauwa e uasivi cake sara mai vei ira me vukea na tubu ni matanitu ni Kalou me vakasinaita na vuravura (raica na Vunau kei na Veiyalayalati 65:2, 5–6).

Sa vakamacalataka na Turaga “Ia na matabete cecere [Vakamelekesateki] ena cakacakataka na kosipeli ka na taura tu na idola ni veika vuni ni matanitu, io na idola sara mada ga ni nona kilai na Kalou.

“Ia ena vakatakilai mai na kaukauwa ni bula vakalou ena kena veicakacaka vakalotu” (Vunau kei na Veiyalayalati 84:19–20).

Na cakacaka vakalotu sai koya na soqo e-vei qaravi kina na matabete ka vakavuna meda-caka-veiyalayalati kina kei na Kalou, Ka tekivu ena papitaiso ka tomani yani ki na veiyalayalati e ciqomi ena vale ni Turaga. Ena noda maroroya tiko na veiyalayalati oqo eda sa veisautaki kina mai na tagane kei na yalewa “vakayago” ki na yalododonu (raica na Mosaia 3:19) mai na loloma soliwale ni veisorovaki i Karisito ka yaco meda vakadonui ka vakatabui—tawacala ka sega ni tauvi duka—ena mata ni Kalou (raica na Vunau kei na Veiyalayalati 20:29–31; 3 Nifai 27:16–20).

Karisito e Amerika, mai vei Ben Sowards

“Na Vakalesuimai ni Taucoko ni Kosipeli i Jisu Karisito: Ai Vakaro ki Vuravura Raraba,” mai vei iratou na Mataveiliutaki Taumada kei na Kuoramu ni iApositolo Le Tinikarua, e vakamacalataka e dua na ivakaleka veiganiti:

“Keitou cauraka yani ni Lotu i Jisu Karisito ni Yalododonu Edadai, ka tauyavutaki enai ka 6 ni Epereli, 1830, sa Lotu ni Veiyalayalati Vou i Karisito ka sa vakalesui mai. Sa itakele ni Lotu na bula uasivi ni vatu i vakadei, o Jisu Karisito, kei na Nona Veisorovaki kei na Tucaketale mai na Mate. Sa kacivi ira tale ena gauna oqo na iApositolo o Jisu Karisito ka solia vei ira na lewa ni matabete. Sa sureti keda kece meda lako mai Vua kei na Nona Lotu, ka ciqoma na Yalo Tabu, na cakacaka vakalotu ni veivakabulai, ka rawata na reki tawamudu.”