Wasei ni Reki e Kenya
Ni sa kunea o Robert na kosipeli, a dodonu ga vua me wasea vei ira kece e kila. Sega, e dina—o ira kecega.
iTaba mai vei Leslie Nilsson kei Eric D. Snider
Me tekivu mai na gauna a papitaiso kina ena Okosita 2024, sa kauta mai o Robert L., 18, mai Kenya, e sivia na 50 na itokani ki lotu—ka papitaisotaka e 25 vei ira!
Oqori na iwiliwili taucoko ena neitou veivosaki kei koya ena vica na vula sa oti. Era rairai sa na tubu cake beka mai na gauna oya.
O Robert, e dua na lewe ni Tabana o Bukuru ena Tikina o Kisumu Kenya, a vakaveikilaitaki ki na Lotu i Jisu Karisito ni Yalododonu Edaidai ena itekivu ni 2024, ena nona a sotava e dua na turaga ni Amerika ka veiqaravi voli ena cakacaka ni bula raraba e Kenya.
“Au a sega ni namaka dina tiko ni na vinaka cake na noqu bula,” e kaya o Robert. “A sega na ilavo vei rau na noqu itubutubu; erau a sega ni rawa ni vakauti au ki koronivuli.” (E Kenya, na koronivuli mada ga ni matanitu e saumi vakailavo.)
“Ia au a kila tu ni na vukei au na Tamada Vakalomalagi. Au a tekivu masu ka wilika na Veiyalayalati Vou. Au a qai sotavi noqu dauniveitokoni.”
Na nona “dauniveitokoni” e dua na lewe ni Lotu i Jisu Karisito ni Yalododonu Edaidai ka a vakalougatataka na bula nei Robert ena rua na sala: a vukei koya me rawata na nona vuli, ia ka bibi cake, a wasea vua na kosipeli (ka vakakina e dua tale na cauravou se qai lewena vou ga na Lotu). A papitaiso o Robert ni oti e ono na vula.
Sa sureta o Robert L. mai Kenya e vuqa na tamata ki lotu—o ira era tiko veivolekati vata, itokani ni vuli, gone e dau qito vata kaya—o ira kecega.
Saumi Yani ki Liu
E kena ibalebale, ni a vinakata o Robert me wasea na nona veivakalougatataki vou vei ira tale eso. A sega ni rawa vua me tokona na nona vuli e dua. Ia e rawa vakaidina vua me vakavulica vei ira na kosipeli!
A tekivu me sureti ira na tamata ki lotu—o ira era tiko veivolekati vata, itokani ni vuli, gone era dau qito vata kaya—o ira kecega a kila o koya. “Au a lako mai ena dua na Sigatabu vata kei na, rauta ni, lewe lima, qai dua tale na Sigatabu au lako mai kei na lewe 10,” e kaya o koya. “Au sa qai talai rau yani na daukaulotu me rawa ni ra kila vakavinaka ka kila ni dina na Lotu oqo ka rawa ni ra vakila na veika au vakila.”
Sega ni dede era sa digitaka eso na itokani nei Robert me ra papitaiso ka kerei koya me qarava na cakacaka vakalotu oya.
Sa tubu totolo tiko na Lotu e Aferika, ena vukudra na tisaipeli vakataki Robert. A papitaisotaka e 10 na tamata ena dua na macawa, 11 ena macawa ka tarava, ka qai 4 “walega” ena macawa ka tarava.
E dau sureti ira na nona itokani o Robert ki na nona tabana ni Lotu, ka dau soqoni ena dua na valelaca ena dua na lomanibai veico.
E sivia e dua na daseni vei ira na itokani papitaiso vou oqori era a tiko vata kei koya ena dua na koniferedi ni MST e Kenya ena Tiseba sa oti, oka kina e dua na itokani ka sa papitaisotaka oti e dua na nona itokani.
Raica na sala e tarai cake kina na itosotoso? E veivakani vakaikoya ga!
Vakilai ni Yalotabu
E kaya o Fredrick A., 17, ni gauna a sureti koya kina ki lotu na nona itokani o Robert, a vakila vakaukauwa sara na Yalotabu ka sega ni cakitaka rawa.
“Niu yaco yani ki lotu, a lako mai vei au na Yalo ni Kalou,” e kaya o Fredrick. “Ni sa soli vei au na iVola i Momani, au a tekivu wilika sara. Kevaka au sega ni kila, au dau tarogi noqu peresitedi ni tabana ka masu.”
Erau sa veitokani tikoga o Robert (imawi) kei Fredrick me tekivu mai na gauna a vakaveikilaitaki koya kina o Robert ki na kosipeli.
O Gift M., 18, e dua tale na itokani a papitaisotaka o Robert. “Au marautaka niu tiki ni Lotu dina—na Lotu dina duadua ga e vuravura taucoko,” e kaya o Gift ena matadredredre.
Sa vakanamata tiko o Gift me laki kaulotu.
E vuqa vei ira na tamata a sureta o Robert ki lotu era sa digitaka me ra papitaiso, ka ra sa sureti ira tale tiko eso me ra lako talega mai.
Se Levu Tale na Cakacaka e Tu Mai Liu
Sa navuca tiko o Robert me laki kaulotu tudei ena gauna ga e vakacavara kina na nona vuli (vakakina o Gift kei Fredrick). Na cava na vuna e vinakata kina o koya me cakava oqori ni sa kila vinaka rawa tu na sala me wasea kina na kosipeli?
“Meu na lako ki kaulotu meu sotava eso tale na ka ka vuli vakalevu cake,” e kaya o Robert. “Ena vaqaqacotaka na noqu vakabauta ka veisautaka na noqu rai. Oqori na ka e vinakata na Kalou meu cakava.”
E se bera ni oti na nona wasea na kosipeli o Robert. Sa navuca me laki kaulotu. ”Oqori na ka e vinakata na Kalou meu cakava,” e kaya o koya.