A Sega ni Kila o Koya Niu Gadreva Tu

iTaba mai vei Melanie Miza

Au a sotava tiko eso na leqa vakai au ga. Ena dua na siga au a sega ni bula vinakatiko , kau sega dina ni via lako ki na semineri. Ia au a vakasamataka, “Oqo na iotioti ni noqu yabaki, ka dodonu meu vakayagataka vinaka.”

Au a mani gole yani, ka keimami veitalanoataka na sala e kilai keda yadua kina o Jisu Karisito ena yacada. Keimami a wilika na Vunau kei na Veiyalayalati 18:10: “Nanuma tiko ni sa ka talei ena mata ni Kalou na yalo ni tamata.” A tekivu meu luluvu niu makataka na qaqana oqori. Niu dau luluvu, au dau tagi vakalevu, kau a sega kina ni via wilika tale ena kalasi.

E muri a taroga o qasenivuli, “Na cava o taleitaka vakalevu duadua, kei na vuna?” Au sega ni via vosa, ia a tukuna e dua na noqu itokani na ivolanikalou o ya. A wasea o koya na nona ivakadinadina ni Kalou ena sega ni biuti keda taudua, ni so na gauna eda na guilecava, ia e kilai keda o Koya ka na dau tu e kea me baleti keda.

Niu rogoca oya, a vaka me vosa tiko vei au na Tamada Vakalomalagi mai vua na noqu itokani. E vaka ga ni tukuna tiko o Koya, “Kakua ni vuki tani mai vei au—au sa tu oqo.”

Ni oti o ya au a lako meu tavoya na mataqu, ka lako mai vei au na noqu itokani. A kaya o koya, “Au a sega ni via wasea, ia au vakila ni dodonu meu wasea baleta ni na vukea e dua. Au sega ni kila ni sai iko ga na dua oya.” Oqori sa vakadeitaka vakalevu cake ga vei au ni kauwaitaki au tiko na Tamada Vakalomalagi.

Ni oti na semineri, au a gole ki vale ka masu. E kena ivakarau, au dau vakavinavinaka ka kerea eso na ka. Ia na masu oya—au vakabauta ni sa dua na masu ni vakavinavinaka duadua au se qai bau cabora. Au a vakila na Yalotabu ena noqu rumu, kau vakila ni tiko vata kei au ekea na Tamada Vakalomalagi.