iVakatakilakila ni iKarua ni Lako Mai: Sega ni Vakavuna na Rere
Eso na ka bibi sa tukuni oti ni bera ni lako tale mai na iVakabula. Ia e tiko na vuna vinaka mo kakua kina ni rere.
E Lako Tale Mai me Veiliutaki ka Vakatulewa, mai vei Mary RL Sauer
Ena lako tale mai na noda iVakabula, o Jisu Karisito. A vakavuvulitaka vakamatata sara o Koya na dina oqo (raica na Maciu 24). E vuqa na tamata era vinakata me ra kila na gauna ena yaco kina na ka oqo, ia a kaya o Jisu, “na siga ko ya kei na tikinisiga ko ya sa sega e dua e kila, ko ira na agilose mai lomalagi era sega ni kila, ko koya duaduaga na Tamaqu” (Maciu 24:36).
Ia, sa vakatakila mai na Turaga e vica na ivakatakilakila ni bera na Nona iKarua ni Lako Mai. E vuqa vei ira oqo era taleitaki ka vakasakiti, me vakataka na Vakalesuimai ni kosipeli, na tadu mai ni iVola i Momani, kei na nodra vakasoqoni vata na Isireli.
Ia sa qai tiko na … ivakatakilakila tale eso. Me kena ivakaraitaki:
-
Na ivakatakilakila mai lomalagi (oka kina na matanisiga, vula, kei na kalokalo) kei vuravura (oka kina na bukawaqa, cagilaba, cava, kei na o kubou).
Na veika kece oqori e rawa ni rogo rerevaki. Na ka dina, a kaya na iVakabula ni ena iotioti ni gauna, era na luluqa na yalodra e vuqa na tamata ena vuku ni rere.
Ia oqo, de o raica beka na leqa e vuravura raraba, vakakina na veivakatovolei yadua o sotava, ka vakila na lomaocaoca kei na nuiqawaqawa. O na rairai vakataroga beka se cava mo namaka tiko kevaka ena vakarerevaki ka dredre cake tikoga na veika me yacova yani na iKarua ni Lako Mai.
Ia oqo e sega ni sala e vinakata o Jisu Karisito vei iko—e dua vei ira na Nona tisaipeli—mo namaka kina na Nona lesu mai.
Na iTukutuku ni Turaga vei Ira na Nona Tisaipeli
Ena gauna mada ga ni veilecayaki kei na yavavala ni iotioti ni gauna, sa kaya na iVakabula vei ir na Nona tisaipeli, “Dou kakua ni rarawa.” Cava na vuna? Baleta “ni, ena gauna sa yaco kina na veika oqo, mo dou kila sara ni sa vakayacori na veika kecega sa yalataki vei kemudou” (Vunau kei na Veiyalayalati 45:35).
Sa tukuna vei keda o Jisu Karisito meda “kakua ni rere” (Vunau kei na Veiyalayalati 50:41) ka “reki ka marau” (Vunau kei na Veiyalayalati 61:36). O koya gona, me kua ni da vakanamata ki na veika rerevaki ena yaco mai, e vinaka duadua beka meda veisautaka na noda rai.
Oqo e tolu na sala bibi e rawa ni o “kakua ni rere,” vakanamata ki na iKarua ni Lako Mai lagilagi, ka kaya, vata kei Joni na Daunivakatakila, “Ni Lako mai, Turaga Jisu” (Ai Vakatakila 22:20).
1. Rai vua na Parofita
E veivakasalataki na iVakabula ni na levu sara na Karisito vakailasu kei na parofita vakailasu ni bera na Nona lako mai ka ra na vakacalai ira e vuqa na tamata. Vakavolivoliti keda, era tu na domo rogolevu, veilecayaki, ka veivakacacani ka tovolea tiko me muataki keda vakatani. Ena iotioti ni gauna, o Setani ena “cakacaka vakaukauwa … e lomadra na luve ni tamata, ka vakayavalati ira me ra cudruva na ka vinaka” (2 Nifai 28:20). O ira sara mada ga na digitaki era na kau tani mai na dina.
Ia sa solia vei keda na Turaga e dua na veivuke vakaitamera. Sa kacivi ira na parofita o Koya me ra vakalougatataki keda ka tuberi keda. Eratou na sega ni rawa ni kauti keda vakatani na Mataveiliutaki Taumada kei na Kuoramu ni iApositolo Le Tinikarua. Sa tukuna na iVakabula, “Se mai na domoqu ga se mai na domodra na noqu tamata, e sa tautauvata ga” (Vunau kei na Veiyalayalati 1:38). Sa rawa mo kerea vua na Tamada Vakalomalagi me vakadeitaka na Yalo Tabu na dina era vakavulica, me vakataka na ivakavuvuli walega oqo nei Peresitedi Russell M. Nelson: “Na ka vinaka duadua e se bera tiko ni yaco mai, … baleta ni na lako tale mai na iVakabula!” Ka: “Sa vakavakarau tiko o koya me lako tale mai. Me da vakavakarau vakakina meda ciqomi Koya.”
Ni ko vakamuria na nodra ivakavuvuli “ena yalo vosota kei na vakabauta” (Vunau kei na Veiyalayalati 21:5), sa rawa ni o raica na sala era vakalougatataka kina na nomu bula.
Sa kaya o Elder Allen D. Haynie ena Vitusagavulu: “Niu a se gone, a vakarerei au na veiparofisai ni iotioti ni gauna ka vakavuna meu masulaka ni na sega ni yaco ena noqu gauna na iKarua ni Lako Mai. … Ia au sa masulaka oqo na kena veibasai. …
“… E sega ni gadrevi meda rere. Na vunau kei na vakavuvuli sa dodonu me muri meda bula vakayalo ka vosota vakayago kina sa kune ena vosa ni parofita bula.”
Ni ko vakamuria na nodra veituberi na parofita kei na iapositolo, na nomu rere ena sosomitaki ki na vakabauta, inuinui, kei na reki.
2. Tu ena Veivanua Tabu
E kaya na iVakabula ena maliwa ni veika rerevaki ni iotioti ni gauna, “na noqu tisaipeli era na tudei tu ena vanua tabu, ka sega ni yavalati rawa” (Vunau kei na Veiyalayalati 45:32). Na veivanua tabu oqo e oka kina na noda veivale, valenilotu, kei na valetabu.
Me baleta na valetabu, e vakavuvulitaka o Peresitedi Nelson ni “noda inisua taqomaki vinaka duadua sai koya me da kilikili tikoga ni curu ki na Nona vale tabu.” Kei na “vakalevutaki ni gauna ena valetabu ena vukei keda meda vakavakarau ki na iKarua ni Lako Mai.”
Karobo Mai, mai vei Yongsung Kim
3. Vakarautaka na Vuravura
E dua na itavi e vakayacora na Lotu i Jisu Karisito ena iotioti ni gauna o ya me vukea na kena vakarautaki na vuravura me baleta na Nona lako mai. Ka sa rawa ni o veivuke ena nomu vakaitavi ena Nona cakacaka.
Sa rawa mo wasea na kosipeli vei ira tale eso ka veivuke ena kena kau mai na rarama kei na dina ni Kalou kivei ira “era sa sega ga ni kila rawa na ka dina, ni ra sega ni kila na vanua me ra vakasaqara kina” (Vunau kei na Veiyalayalati 123:12).
Sa rawa talega mo papitaiso ena valetabu me baleti ira era tiko ena tai kadua ni ilati era a bula ka “mate ni ra se bera ni rogoca na kosipeli, io ko ira a rawa me ra vakabauta” (Vunau kei na Veiyalayalati 137:7).
Ni sa rui levu na veika ca e vuravura, sa rawa mo rarama vei ira tale eso ka vukea me kauta mai na veivakabulai ki vuravura. E rawa ni o veivuke ena nodra vakarautaki e dua na matatamata e rawa ni lako mai vei ira na iVakabula ka ra na vakarau tu me ra ciqomi Koya.
Oqori e dua na itavi levu ka dua na ka totoka me da vakanamata kina.