Jisu Karisito E baleta Talega na Veisiga Vinaka
Ni sa toso vinaka tiko na veika eso, e rawa vakacava ni da vakanamata tikoga vua na iVakabula? Oqo e vica na vakasama.
Raitayaloyalotaka mada ke dua na itokani e dau tiko vata ga kei iko ena gauna e sotava kina na dredre ka levei iko ena gauna e marau kina. Veimaliwai bulabula? Sega soti sara.
Eda dau cakava beka oqori vua na noda iVakabula—vakasaqarai Koya ena veigauna dredre ka guilecavi Koya ena veigauna vinaka?
Eda veivosakitaka vakalevu na sala e vukei keda kina o Jisu Karisito ena noda gauna dredre, baleta beka ni tamata yadua, ena dua na gauna se dua tale, era dau sotava na veika dredre.
Ia eso na siga—macawa se yabaki sara mada ga, kevaka eda kalougata—sa toso vinaka tiko kina na veika kece. Ena so na gauna eda dau guilecava na iVakabula ena veigauna vakaoqori. Era a vakakina o ira na tamata ena iVola i Momani. Era a sautu mai na veivakalougatataki ni Kalou ena dua na gauna ia era yaco me ra rawai ena dokadoka ni ra guilecavi Koya.
Na gauna vinaka e sega ni kena ibalebale ni da sa sega tale ni gadrevi Jisu Karisito. Na gauna ni bula sautu sai koya na gauna uasivi duadua me da reki vata kina kei na iVakabula, ka sega ni guilecavi Koya.
Ia eda na semati tikoga vakacava vei Jisu Karisito kei na Tamada mai Lomalagi ni sega ni vakananumi keda tiko na veivakatovolei meda gole vei Rau?
Yalomalumalumu Tikoga
Ni sa toso vinaka tiko na veika eso, e vinaka mo marautaka na nomu veivakalougatataki kei na veika sa rawata. Ia kakua ni guilecava o cei a vakavuna mo yacova na vanua o sa lai tiko kina. A kaya vakaoqo o Tui Penijamini ena nona vunau ena iVola i Momani:
“Ni raica, eda sa sega li ni daukerekere kecega? Eda sa sega li ni vakararavi vata tiko ki vua e dua ga na Ka Bula, o koya na Kalou, ena vuku ni veika kece sa tu vei keda, na kakana kei na isulu, kei na koula, kei na siliva, kei na iyau kecega sa tu vei keda ena kena veimataqali?” (Mosaia 4:19).
Na yalomalumalumu me baleta na nomu rawa-ka ena nomu nanuma tiko na veika erau sa cakava vei iko na Tamada Vakalomalagi kei Jisu Karisito sa dua na sala cecere mo okati Rau kina ena nomu veigauna vinaka.
Vakavinavinaka Tikoga
Na vakavinavinaka sa dua vei ira na iwali vinaka duadua ni dokadoka kei na guiguileca. Na nomu vakavinavinaka vua na Kalou ena vukei iko mo nanumi Koya kei na veika vinaka kece sara e cakava o Koya kei na Luvena ena nomu bula. Oqo e mana sara ga ena gauna vinaka me vaka ena gauna dredre.
Mo Qaqarauni Tiko
E dua vei ira na ravuravu taleitaki nei Setani o ya me “vakacegui … ka veidabuitaki [iko] ena sautu vakavuravura” (2 Nifai 28:21). Ena dua tale na kena itukutukuni, ena taleitaka o koya kevaka o vakila na vakacegu kei na taqomaki ena nomu gauna vinaka ka guilecava kina na veika e bibi duadua. O koya gona, kakua ni guilecava na Kalou! Ni ko kidava tiko na ilawaki qaseqase ni meca ka vorata ena nomu gauna vinaka mada ga, sa rawa mo volekata tikoga na Tamada Vakalomalagi kei Jisu Karisito.
Na iVakatawa ni Sipi Vinaka, mai vei Michael Malm
Tiko Vakatabakiduataki Karisito
A vakatavulica o Peresitedi Russell M. Nelson: “Ni vakanamata na noda bula ki na ituvatuva ni veivakabulai ni Kalou … kei Jisu Karisito kei na Nona kosipeli, eda na rawa ni vakila na reki veitalia na cava e yaco tiko—se sega ni yaco tiko—ena noda bula. Na reki e yaco mai Vua vakakina ena Vukuna. O Koya na ivurevure ni reki kecega.”
E vakavica na gauna o dau vakasamataka kina na dina oqo me baleta na reki ni sa toso vinaka tiko na bula? Oqo e sega walega ni ivakasala veivakacegui ena gauna e dredre kina. E dina tu ga, oka kina na nomu veisiga vinaka duadua. Cakava na veika kece o rawata mo vakanamata vei Karisito, ena veigauna ca se vinaka.