Sai Jisu Karisito na Kena E Uasivi Duadua Se Bera Tiko Mai
Na reki e solia tu o Jisu Karisito sa dau tu ga vei iko.
Vakasamataka mada e dua na gauna o nanuma kina ni sa na cava na vuravura. Sega, vakabibi! O sa lako curuma beka e dua na ka dredre o nanuma kina ni o na sega ni lako curuma rawa?
Sa vinaka, o sega beka ni nanuma ni sa oti na vuravura. Ia e vaka beka na nomu vuravura sa vakakina? Oqo e rawa ni dua ga na ka mai na sega ni rawata e dua na veitarogi bibi, ki na toki ni nomu itokani vinaka duadua, se takali vakasauri e dua na nomu daulomani.
Veitalia na ivakarau o sotava kina na veidredre sa oti, raici iko ena gauna oqo: o a bula mai kina! Ka vinaka cake, era vakananuma vei keda na parofita kei na iapositolo ni rawa ni da cakava e levu cake na ka mai na noda bula voli ga mai na dredre ena gauna oqo kei na veisiga ni mataka. E rawa ni da kunea na reki ena kedra maliwa.
“Na Kena e Uasivi Duadua E Se Bera Tiko Mai”
A vakararawataki vakalevu cake na iVakabula mai na kena eda rawa ni raitayaloyalotaka e Kecisemani kei na kauveilatai. Na kena colati na mosi, tauvimate, kei na ivalavala ca ni vuravura taucoko (raica na Alama 7:11–13) ena dredre, meda kaya mada ga! Ia o Koya a vorata kece.
E vakavuvulitaka o Elder Patrick Kearon ena Kuoramu ni iApositolo Le Tinikarua, “Io, eda vakasamataka vakatitobu na veivakararawataki kei na veika tawadodonu a vakayacori vua na noda Dauveivueti me baleta na noda ivalavala ca, ka vakavuna oqori na vakanananu yalomatua. Ia ena so na gauna eda dau tao tu kina—ena were, ena kauveilatai, ena loma ni ibulubulu qaravatu. Eda sega ni toso cake ki na reki ni sa tadola na ibulubulu, na vakadrukai ni mate, kei na qaqa i Karisito!”
Ena vuku i Jisu Karisito, e sega ni dodonu me da tao tu ga ena noda vakararawataki. E rawa ni da toso ki liu ka vakanamata sara mada ga ki na veisiga ni mataka ena reki kei na vakabauta.
O koya gona, me vaka ni dredre cake na bula mai na kena eda nanuma ni da na rawa ni vorata rawa, nanuma tiko na ka a vakavulica ena dua na gauna lekaleka sa oti o Peresitedi Russell M. Nelson: “Se bera tiko mai na kena e uasivi duadua!” Sa dua na yalayala totoka ka veivakadeitaki! E kila tu o Peresitedi Nelson e levu sara na ka me baleta na mosi kei na vutu ni yalo e raica tu o vuravura ena veisiga. Ia e se rawa tikoga ni kaya ni “se bera tiko mai na kena e uasivi duadua!”
Ena veisau vakacava na nomu rai kevaka o kila dina ni se bera tiko mai na kena e uasivi duadua? Ena veisautaka vakacava na ivakarau ni nomu sotava na bolebole ni bula?
Maroroi Karisito Tiko ena iYaloyalo
E dua na soqo mai muri sa sureti keda o Peresitedi Nelson meda vakanamata kina ena reki sai koya na iKarua ni Lako Mai i Jisu Karisito.
Ni bera ni o vakaraitaka ni “ena kani yatedra na tamata” (Luke 21:26) kei na veivakarusai sa tau vei ira na tamata ca e sega ni vaka ni “se bera tiko mai na kena e uasivi duadua,” meda vakamatatataka mada e dua na ka: sai koya na iKarua ni Lako Mai i Jisu Karisito. Eda sa calata tiko na inaki kevaka eda kauti Koya tani mai na iyaloyalo. Sai Koya “na ka uasivi duadua” ka se bera tiko mai—sai Koya na vu ni noda reki! Me vaka e kaya o Peresitedi Nelson, “Se bera tiko mai na kena e uasivi duadua … baleta ni na lako tale mai na iVakabula!”
Raici ira mada na Nifaiti, me kena ivakaraitaki. E dina ga ni ra a tiko ena dua na vanua duidui sara, ena gauna a mate kina na iVakabula, era a sotava eso na leqa rerevaki ni iKarua ni Lako Mai: mate, veivakarusai, tavuki ni vanua. Era lutu ki wasawasa na veikoro lelevu taucoko (raica na 3 Nifai 8).
Ia ni oti na tiko yavavala kece oqori, era sa kila o ira era vakabauta na iVakabula ni veika rerevaki sa ivakatakilakila ni mate ni iVakabula. Ena gauna sara ga era veivosakitaki Jisu Karisito tiko kina kei na ivakatakilakila era sa raica, a rairai vei ira na iVakabula (raica na 3 Nifai 11:1–11).
Raitayaloyalotaka mada na levu ni reki era a vakila na Nifaiti! Ni oti na veivakarusai veivakaleqai vakaoqori, a qaravi ira ka vakabulai ira na iVakabula. Ni oti kece na rere kei na taqaya, era sa reki na Nifaiti ka vakacaucautaka na Kalou ni ra sa sota rawa kei na nodra iVakabula (raica na 3 Nifai 11:14–17).
Ena sega beka ni sikovi iko vakayago na iVakabula ena bula oqo me vakataki ira na Nifaiti. Ia e rawa ni o kilai Koya ena nomu wilika na ivolanikalou, vakaivotavota ena sakaramede, maroroya na veiyalayalati, kei na vuqa tale. E rawa ni vukei iko o Koya mo vakila na reki ena gauna oqo kei na veisiga ni mataka, se cava ga na kemu ituvaki.
Ni Da Wawa Tiko …
Na iKarua ni Lako Mai ni iVakabula ena rawa ni yaco ena nomu bula, se ena sega beka. Se cava ga e yaco, sa tiko na reki vei Jisu Karisito ena gauna mada ga oqo.
E vakavuvulitaka o Peresitedi Nelson na dina veivakauqeti oqo ka veivuke ni da waraka na nona lesu tale mai na iVakabula: “Kemuni na taciqu kei na ganequ lomani, e vuqa sara na veika totoka sa tu mai liu. Ena veisiga ka lako mai, eda na raica na vei ivakaraitaki cecere duadua ni kaukauwa ni iVakabula ka se bera ni raica vakadua ko vuravura. Ena maliwa ni gauna oqo kei na Nona lesutale mai ‘ena kaukauwa kei na lagilagi cecere,’ ena vakatikora o Koya vei ira na yalodina na ivotavota e tawa wili rawa, na veivakalougatataki, kei na cakamana.”
Ena dua tale na kena itukutukuni, e rawa ni da kunea na vakacegu kei na reki vei Karisito ena gauna sara ga oqo, me yacova na Nona lesu mai, ka tawamudu. Sai Jisu Karisito na rarama ena mua ni qara kecega. Sai Koya na reki ena dredre ni tamata yadua. Sai Koya na vakacegu mai na rere. Sai Koya na nomu iVakabula. Ni o vakanamata Vua, sa tu vei iko eke, ena gauna oqo, kei na veigauna kecega na vakacegu kei na reki.