Lako Mai, Mo Muri Au
Vunau kei na Veiyalayalati 95; 103; 107
iYau Vunitaki
Vakekeli ena ivolanikalou E yaga sara.
E Vakananumi Keda ena Yalololoma na Turaga ena iVakaro Eda Vakawalena.
Ena Vunau kei na Veiyalayalati 95, a rarawataki ira vakalailai na Yalododonu na Turaga. A vakaroti ira taumada o Koya me ra tara e dua na valetabu (raica na Vunau kei na Veiyalayalati 88:119)—ia ni oti e lima na vula, era se bera ni cakava e dua na ka.
E vaka me sega ni vakasamataki rawa oqori nikua. Na tara valetabu sa dua na vakanamata levu vei keda! Ia a se sega ni vakatakila na Turaga e levu na ka me baleta na valetabu ena 1833. Era sega ni kila vakavinaka sara na Yalododonu na kedra bibi.
Sa qai cava a cakava na Turaga? A vakamacalataka vakamatailalai na vuna e vinakata kina o Koya me ra tara e dua na valetabu (raica na Vunau kei na Veiyalayalati 95:8–17). A vakamatatataka na veika a tukuna taumada, ni solia tiko na vakasama vovou ka vakadeitaka tiko na kena bibi.
Na iValavala Ca e Kauta Mai na Veicudruvi, ia e se Yalataka Tikoga na Turaga na Veivakalougatataki.
Ena 1834, era a vakataroga tiko na Yalododonu na vuna a vakatara kina na Turaga me ra vakararawataki ira na nodra meca ka vakasavi ira tani mai na nodra qele. Mai vua na Parofita o Josefa Simici, a solia kina na Turaga e rua na kena isau.
iMatai, a kaya na Turaga ni so na gauna e dau vakatara o Koya me ra kitaka na ka ca “me ra vakatawana na ivakarau ni nodra ivalavala cala” (Vunau kei na Veiyalayalati 103:3). A kaya vakaoqo o Alama: “Ia sa laiva me ra vakayacora [na ka ca] … me dodonu kina na lewa ena qai tauca vei ira ena nona cudru” (Alama 14:11).
Na vuna tale kadua e solia na Turaga vei ira na Yalododonu me baleta na nodra leqa e rairai dredre toka meda rogoca: “Me ra cudruvi mada kina … ko ira era sa vakatokai ira ena yacaqu me dua na gauna lekaleka baleta ni ra a sega ni vakarogoca vakavinaka sara na ivakavuvuli kei na ivakaro kau a solia vei ira” (Vunau kei na Veiyalayalati 103:4).
E sega ni kena ibalebale oya ni sa vakadonuya na Kalou na nodra ivalavala ca kei na veika e sega ni vakalawa na nodra meca. A sega ni “vakauqeti” ira na dauvakacaca me ra kabai ira na Yalododonu; A laivi ira me ra vakayagataka na nodra galala ni digidigi ka sega ni takoso me tarovi ira.
Ia e se yalataka tikoga na Turaga ni kevaka era na talairawarawa na Yalododonu, “ena sega sara ni mudu na nodra rawai tiko” (Vunau kei na Veiyalayalati 103:7).
Na Cava na Vuna e Vakayacani Kina vei Melikiseteki na Matabete?
Ko na rairai vakataroga beka se cava e vakayacani kina vei Melikiseteki na matabete cecere. A vakamacalataka na Turaga mai vua na Parofita o Josefa Simici:
“Ni se bera na gauna i [Melikiseteki] a dau vakatokai tu me Matabete Tabu, me vaka na iVakarau ni Luve ni Kalou. Ia ena vuku ni kena rokovi se vakarokorokotaki na yacai Koya sa Cecere Sara, me levei na kena dau cavuti wasoma na yacana, era sa mani vakatokayacataka kina na lewenilotu ena gauna makawa, na matabete vei Melikiseteki, se na Matabete i Melikiseteki” (Vunau kei na Veiyalayalati 107:3–4).
Vakasamataka mada na levu ni gauna eda cavuta kina na “Matabete i Melikiseteki” ena veisoqoni ni Lotu kei na veivosaki sega ni tukuni. Qai vakasamataka mada kevaka, me isosomi ni “Melikiseteki,” eda sa cavuta tiko “na Luve ni Kalou” ena veigauna kece. Sa na tekivu me vaka me sega ni veidokai. A vinakata na Turaga me tarova oqori.