Lomaocaoca, na Yalotabu, kei na iVolanikalou

Droini mai vei Katelyn Budge

Au sa veitosoyaki vakalevu ena noqu bula. Ena vica na yabaki sa oti, keitou a toki ki Dubai ena dua na gauna lekaleka. Niu talaucaka na noqu kato, na iotioti ni ka e tiko e ra oya na noqu ivolanikalou. Au a nanuma sara meu wilika. Au a cakava, ka sa dua na ka duatani baleta niu sega soti ni dau taleitaka meu muria na veivakauqeti. Ia au a wiliwili sara mai na itekitekivu, kau nanuma niu a wilika e lima se ono na wase.

E muri, au a kerei meu vosa e vale ni lotu. Au a vakauqeti meu vosa me baleta na bibi ni vulici ni ivolanikalou. Au a vola na noqu vosa ka vakasamataka, “Isa, sa dodonu sara ga meu wilika vakalevu cake na ivolanikalou.” Sa yaco talega me dua na ka ni veisisivi vei au kei tamaqu. A yaco tiko ena Alama o koya, kau a vinakata meu toboki koya. A tekivu meu wilika na noqu ivolanikalou ena veisiga—so na gauna me 10 se 15 na wase!

A tekivu meu raica ka sotava e levu sara na veika vakayalo. Ni o wilika tiko e levu na ka vaka oqori, ena solia vei iko na galala ki na ivakatakila yadua. Au a vakarautaka dina tiko na gauna vua na Turaga.

A tekivu meu vola e dua na ivolaniveisiga vakayalo. Ena dua na itukutuku, au a vola kina, “Au a wilika tiko na 3 Nifai me baleta na nona lako sobu mai o Jisu Karisito kivei ira na tamata kei na veika totoka kece a cakava o Koya. Au a vakila niu sa voleka sara vua na Tamada Vakalomalagi kei Jisu Karisito nikua.”

Au kurabuitaka sara ga na levu ni veika au a sotava, vakabibi niu a vakasaqarai rau tiko. Au a kaya, “Isa, sa vosa dina tiko vakalevu vei au na Kalou.”

A vukei au sara ga na vulici ni ivolanikalou, vakabibi ena lomaocaoca ni noqu vakasama niu sa rui veitokiyaki vakalevu. Na ivolanikalou era sa vosa i Karisito. E dau vosa vei keda o Koya mai vei ira. Mai na Nona vosa, sa rawa kina vei au meu toro voleka Vua.