ទីសម្គាល់នៃការយាងមកជាលើកទីពីរ ៖ គ្មានហេតុដែលត្រូវខ្លាចឡើយ
រឿងធ្ងន់ធ្ងរមួយចំនួនត្រូវបានព្យាករមុនពេលព្រះអង្គសង្គ្រោះយាងមកម្តងទៀត ។ ប៉ុន្តែប្អូនមានហេតុផលល្អៗដើម្បីមិនភ័យខ្លាច ។
He Comes Again to Rule and Reign [ ទ្រង់យាងមកម្តងទៀតដើម្បីគ្រប់គ្រង និងសោយរាជ្យ ] ដោយ ម៉ារី អ័រ សៅអើរ
ព្រះអង្គសង្គ្រោះរបស់យើង ព្រះយេស៊ូវគ្រីស្ទនឹងយាងមកម្ដងទៀត ។ ទ្រង់បានបង្រៀនពីសេចក្ដីពិតនេះយ៉ាងច្បាស់ ( សូមមើល ម៉ាថាយ ២៤ ) ។ មនុស្សជាច្រើននឹងចង់ដឹងថាការណ៍នេះនឹងកើតឡើងនៅពេលណា ប៉ុន្ដែព្រះយេស៊ូវបានមានបន្ទូល « ឯត្រង់ថ្ងៃ និងពេលកំណត់ នោះគ្មានអ្នកណាដឹងទេ ទោះទាំងពួកទេវតាដែលនៅលើស្ថានសួគ៌ក៏មិនដឹងដែរ ជ្រាបតែព្រះវរបិតានៃខ្ញុំប៉ុណ្ណោះ » ( ម៉ាថាយ ២៤:៣៦ ) ។
ទោះជាយ៉ាងនេះក្ដី ព្រះអម្ចាស់ បានបើកសម្ដែងទីសម្គាល់ដទៃៗទៀត ដែលនឹងកើតឡើង ពីមុនការយាងមកជាលើកទីពីររបស់ទ្រង់ ។ ការណ៍ទាំងនេះជាច្រើនគឺជារឿងដ៏រំភើប និងអស្ចារ្យ ដូចជាការស្ដារឡើងវិញនៃដំណឹងល្អ ការលេចចេញមកនៃព្រះគម្ពីរមរមន និងការប្រមូលផ្ដុំអ៊ីស្រាអែល ។
ប៉ុន្ដែបន្ទាប់មកមាននូវ … ទីសម្គាល់ដទៃទៀត ។ ឧទាហរណ៍ ៖
-
ទីសម្គាល់នៅលើមេឃ ( រួមទាំងព្រះអាទិត្យ ព្រះច័ន្ទ និងផ្កាយ ) និងនៅលើផែនដី ( រួមទាំងភ្លើងឆេះ ព្យុះសង្ឃរា ខ្យល់ព្យុះ និងកំសួលផ្សែង ) ។
ទាំងអស់នោះអាចស្តាប់ទៅគួរឲ្យភ័យខ្លាច ។ តាមពិត ព្រះអង្គសង្គ្រោះបានមានបន្ទូលថានៅថ្ងៃចុងក្រោយមនុស្សជាច្រើននឹងស្រយុតចិត្ដដោយភាពភ័យខ្លាច ។
ឥឡូវនេះ ប្រហែលជាប្អូនមើលទៅលើបញ្ហានៅជុំវិញពិភពលោក ព្រមទាំងការសាកល្បងផ្ទាល់ខ្លួនដែលប្អូនប្រឈមមុខ ហើយមានអារម្មណ៍លើសលប់ និងថប់បារម្ភ ។ ប្អូនប្រហែលឆ្ងល់ថាតើប្អូនគួរទន្ទឹងចាំអ្វី បើការណ៍ទាំងឡាយកាន់តែគួរឲ្យខ្លាចនិងកាន់តែពិបាកទៅៗ នៅពេលដែលការយាងមកជាលើកទីពីរជិតមកដល់ដូច្នេះ ។
ប៉ុន្ដែនេះ មិនមែន ជារបៀបដែលព្រះយេស៊ូវគ្រីស្ទនឹងឲ្យប្អូន—សិស្សម្នាក់ក្នុងចំណោមសិស្សរបស់ទ្រង់—រំពឹងទុកចំពោះការយាងមកវិញរបស់ទ្រង់ឡើយ ។
សារលិខិតរបស់ព្រះអង្គសង្គ្រោះទៅកាន់ពួកសិស្សរបស់ទ្រង់
ទោះបីជាមាននូវភាពច្របូកច្របល់ និងភាពចលាចលនៃថ្ងៃចុងក្រោយនេះក្ដី ព្រះអង្គសង្រ្គោះបានមានបន្ទូលទៅកាន់ពួកសិស្សទ្រង់ « ចូរកុំឲ្យមានចិត្ដថប់បារម្ភឡើយ » ។ ហេតុអ្វី ? ព្រោះ « ដ្បិតកាលណាការណ៍ទាំងនេះនឹងកើតឡើង នោះអ្នករាល់គ្នានឹងបានដឹងថា សេចក្ដីសន្យាទាំងប៉ុន្មាន ដែលបានធ្វើដល់អ្នកនោះនឹងត្រូវបានសម្រេចហើយ » ( គោលលទ្ធិ និងសេចក្ដីសញ្ញា ៤៥:៣៥ ) ។
ព្រះយេស៊ូវគ្រីស្ទបានមានបន្ទូលប្រាប់យើងថា « កុំឲ្យខ្លាចឡើយ » ( គោលលទ្ធិ និងសេចក្ដីសញ្ញា ៥០:៤១ ) និង « ចូរសង្ឃឹមឡើយ » ( គោលលទ្ធិ និងសេចក្ដីសញ្ញា ៦១:៣៦ ) ។ ដូចនេះ ជំនួសឲ្យការផ្ដោតលើគ្រោះមហន្ដរាយដែលនឹងមកដល់ វាជាការល្អបំផុតក្នុងការបង្វែរការផ្ដោតយកចិត្តទុកដាក់របស់យើង ។
ទាំងនេះគឺជារបៀបសំខាន់បីយ៉ាងដែលអ្នកអាច « កុំខ្លាច » ដោយទន្ទឹងចាំការយាងមកជាលើកទីពីរដែលពេញដោយសិរីរុងរឿង ហើយនិយាយជាមួយនឹងយ៉ូហានជាអ្នកទទួលវិវរណៈថា « ព្រះអម្ចាស់យេស៊ូវអើយ សូមយាងមក » ( វិវរណៈ ២២:២០ ) ។
១. មើលទៅព្យាការី
ព្រះអង្គសង្គ្រោះបានព្រមានថានឹងមានព្រះគ្រីស្ទក្លែងក្លាយ និងព្យាការីក្លែងក្លាយជាច្រើនមុនពេលការយាងមកដល់របស់ទ្រង់ ដែលនឹងបោកបញ្ឆោតមនុស្សជាច្រើន ។ នៅជុំវិញយើង មានសំឡេងខ្លាំង ច្របូកច្របល់ និងអវិជ្ជមានដែលព្យាយាមនាំយើងទៅកាន់ផ្លូវខុស ។ នៅថ្ងៃចុងក្រោយ សាតាំងនឹង « ញាំញីនៅក្នុងចិត្តទាំងឡាយនៃកូនចៅមនុស្ស ហើយចាក់រុកឲ្យពួកគេមានកំហឹងទាស់នឹងអ្វីដែលជាល្អវិញ » ( នីហ្វៃទី២ ២៨:២០ ) ។ សូម្បីតែពួកអ្នកដែលបានរើសតាំងក៏នឹងត្រូវបានទាញចេញពីសេចក្ដីពិតដែរ ។
ប៉ុន្តែព្រះអម្ចាស់បានប្រទានជំនួយដ៏ធំដល់យើង ។ ទ្រង់បានហៅព្យាការីដើម្បីប្រទានពរ និងដឹកនាំយើង ។ គណៈប្រធានទីមួយ និងកូរ៉ុមនៃពួកសាវកដប់ពីរនាក់នឹងមិន ហើយមិនអាចនាំយើងឲ្យទៅផ្លូវខុសឡើយ ។ ព្រះអង្គសង្គ្រោះបានមានបន្ទូលថា « ទោះជាដោយសំឡេងរបស់យើងផ្ទាល់ ឬក៏ដោយសំឡេងនៃពួកអ្នកបម្រើរបស់យើងក្ដី គឺដូចតែគ្នា » ( គោលលទ្ធិ និងសេចក្តីសញ្ញា ១:៣៨ ) ។ អ្នកអាចទូលសូមព្រះវរបិតាសួគ៌សម្រាប់ការមានព្រះវិញ្ញាណបរិសុទ្ធដើម្បីបញ្ជាក់ពីសេចក្ដីពិតដែលពួកលោកបង្រៀន ដូចជាការបង្រៀនថ្មីៗរបស់ប្រធាន រ័សុល អិម ណិលសុន ៖ « អ្វីដែលល្អបំផុតនឹងមកដល់ក្នុងពេលខាងមុខ … ព្រោះព្រះអង្គសង្គ្រោះនឹងយាងមកម្ដងទៀត ! » ហើយ ៖ « ទ្រង់កំពុងរៀបចំដើម្បីយាងមកម្ដងទៀត ។ សូមឲ្យយើងបានរៀបចំដើម្បីទទួលទ្រង់ដូចគ្នានេះផងដែរ » ។
ហើយនៅពេលដែលប្អូនធ្វើតាមការបង្រៀនរបស់ពួកលោក « ដោយសេចក្ដីអត់ធន់ និងសេចក្តីជំនឿគ្រប់យ៉ាង » ( គោលលទ្ធិ និងសេចក្ដីសញ្ញា ២១:៥ ) ប្អូនអាចមើលឃើញពីរបៀបដែលពួកលោកប្រទានពរដល់ជីវិតរបស់ប្អូន ។
អែលឌើរ អាឡែន ឌី ហែនី នៃពួកចិតសិបនាក់បានមានប្រសាសន៍ ៖ « កាលខ្ញុំនៅក្មេង [ ការ ] ព្យាករទាំងនោះអំពីថ្ងៃចុងក្រោយបានធ្វើឲ្យខ្ញុំភ័យខ្លាច ហើយបណ្ដាលឲ្យខ្ញុំអធិស្ឋានថា សូមឲ្យការយាងមកជាលើកទីពីរនឹងមិនកើតឡើងក្នុងជីវិតរបស់ខ្ញុំទេ ។ … ប៉ុន្ដែឥឡូវនេះ ខ្ញុំអធិស្ឋានសូមផ្ទុយពីមុនទៅវិញ ។ …
« … យើងមិនត្រូវខ្លាចឡើយ ។ គោលលទ្ធិ និងគោលការណ៍ដែលយើងត្រូវធ្វើតាមដើម្បីរស់រានមានជីវិតខាងវិញ្ញាណ ហើយស៊ូទ្រាំខាងសាច់ឈាមនោះ គឺមាននៅក្នុងប្រសាសន៍របស់ព្យាការីដែលនៅរស់ » ។
នៅពេលប្អូនធ្វើតាមការណែនាំរបស់ព្យាការី និងសាវក ភាពភ័យខ្លាចរបស់ប្អូននឹងត្រូវជំនួសដោយសេចក្ដីជំនឿ សេចក្ដីសង្ឃឹម និងសេចក្ដីអំណរ ។
២. ឈរនៅទីបរិសុទ្ធ ។
ព្រះអង្គសង្គ្រោះបានមានបន្ទូលថា ចំពេលមានគ្រោះមហន្តរាយនៃថ្ងៃចុងក្រោយ « ពួកសិស្សរបស់យើងនឹងឈរនៅក្នុងទីបរិសុទ្ធទាំងឡាយ ហើយនឹងពុំត្រូវបានរើឡើយ » ( គោលលទ្ធិ និងសេចក្ដីសញ្ញា ៤៥:៣២ ) ។ កន្លែងបរិសុទ្ធទាំងនេះរួមមានផ្ទះរបស់យើង សាលាប្រជុំ និងព្រះវិហារបរិសុទ្ធ ។
ទាក់ទងនឹងព្រះវិហារបរិសុទ្ធ ប្រធានណិលសុនបានបង្រៀនថា « ការធានាដ៏មានសុវត្ថិភាពបំផុតរបស់យើង គឺបន្តមានភាពស័ក្ដិសមដើម្បីបានចូលក្នុងដំណាក់ដ៏បរិសុទ្ធរបស់ទ្រង់ » ។ ហើយ « ការបង្កើនពេលវេលានៅក្នុងព្រះវិហារបរិសុទ្ធនឹងជួយយើងរៀបចំសម្រាប់ការយាងមកជាលើកទីពីរ » ។
Eventide [ ថ្ងៃចុងក្រោយ ] ដោយ យ៉ុងស៊ុង គីម
៣. រៀបចំពិភពលោក
តួនាទីមួយដែលសាសនាចក្រនៃព្រះយេស៊ូវគ្រីស្ទដើរតួក្នុងថ្ងៃចុងក្រោយ គឺដើម្បីជួយរៀបចំពិភពលោកសម្រាប់ការយាងមករបស់ទ្រង់ ។ ហើយប្អូនអាចជួយដោយការចូលរួមក្នុងកិច្ចការរបស់ទ្រង់ ។
ប្អូនអាចចែកចាយដំណឹងល្អជាមួយមនុស្សដទៃ ហើយជួយនាំយកពន្លឺ និងសេចក្ដីពិតរបស់ព្រះទៅកាន់អស់អ្នក « ដែលលាក់ពីសេចក្ដីពិត ពីព្រោះពួកគេមិនដឹងជាទៅរកសេចក្ដីពិតឯណាទេ » ( គោលលទ្ធិ និងសេចក្ដីសញ្ញា ១២៣:១២ ) ។
អ្នកក៏អាចធ្វើពិធីបុណ្យជ្រមុជទឹកនៅក្នុងព្រះវិហារសម្រាប់អ្នកដែលនៅផ្នែកម្ខាងទៀតនៃវាំងននដែលបានរស់នៅ និង « បានស្លាប់ទៅដោយគ្មានចំណេះដឹងអំពី [ ដំ ] ណឹងល្អនេះ គឺជាពួកអ្នកដែលនឹងទទួលដំណឹងល្អ » ( គោលលទ្ធិ និងសេចក្ដីសញ្ញា ១៣៧:៧ ) ។
ដោយមានភាពអវិជ្ជមានជាច្រើននៅក្នុងពិភពលោក ប្អូនអាចធ្វើជាពន្លឺទៅកាន់អ្នកដទៃ ហើយជួយនាំយកការព្យាបាលមកកាន់ពិភពលោក ។ ប្អូនអាចជួយរៀបចំមនុស្សដែលព្រះអង្គសង្គ្រោះអាចយាងមកជួប ជាអ្នកដែលត្រៀមរួចរាល់ក្នុងការទទួលទ្រង់ ។
នោះគឺជាការទទួលខុសត្រូវដ៏ ធំ ជាអ្វីដែលអស្ចារ្យ ក្នុងការទន្ទឹងរង់ចាំ ទ្រង់ ។