Njoo, Unifuate
Mafundisho na Maagano 71; 77; 82
Hazina Zilizofichika
Ona kile kilicho chini kidogo ya uso katika maandiko.
Bwana atawafadhaisha maadui zetu katika wakati Wake mwenyewe.
Bwana atawafadhaisha maadui zetu hatimaye.
“Kumfadhaisha” mtu humaanisha kumkanganya, kumshangaza, kumshinda, kumwaibisha, kumtisha, au kuwakatisha tamaa.
Hivyo wakati Bwana alipomwambia Joseph Smith kwamba “mtu yeyote akipaza sauti yake dhidi yenu atafadhaishwa katika wakati wangu mwenyewe” (Mafundisho na Maagano 71:10; msisitizo umeongezwa), Alikuwa akiahidi kwamba wale wanaopinga injili siku moja watapata matokeo hasi ya chaguzi zao.
“Katika wakati wangu mwenyewe” inamaanisha kwamba Bwana ana ratiba Yake mwenyewe. Tunapaswa kukubali kwamba watu wengi hawatawajibika kwa matendo yao mara moja—na hiyo ni SAWA. Tunapaswa kutumaini mapenzi ya Bwana na wakati Wake.
Tunapaswa kusimama kwa ajili ya ukweli, bila shaka. Lakini tunapofanya hivyo, tunapaswa kuheshimu imani za wengine na haki yao ya kuchagua kutoikubali injili.
Usijali kuhusu watu ambao wamefanya misheni yao kukosoa na kubomoa Kanisa, ambao wako radhi kudanganya na kuwakilisha vibaya imani zetu. Liache hilo kwa Bwana. Yeye atawafadhaisha na kuwapa nafasi ya kujifunza na kubadilika—hatimaye.
Kama vile sisi, wanyama ni viumbe wa milele wanaotunzwa na Baba wa Mbinguni.
Marafiki zetu wanyama waliumbwa na Baba wa Mbinguni pia.
Inaweza kuonekana kama maelezo madogo madogo, lakini kuna kitu cha ajabu kilichofunuliwa katika Mafundisho na Maagano 77: Wanyama wana nafsi pia!
Hiki ni kitu ambacho watu wengi daima wamekuwa wakikiamini—kinaonekana kuwa kweli—hata kama Biblia na Kitabu cha Mormoni havikuweka wazi wazi. Sasa Bwana aliitangaza kwa maneno yasiyo na shaka.
Kama vile watu, “wanyama” na “vitu vitambaavyo” na “ndege wa angani” viliumbwa kiroho kwanza. Miili yao ya kiroho, kama vile yetu, inafanana na miili yao ya kimwili. Na wao, kama sisi, watafurahia “furaha ya milele”—furaha na shangwe katika miili yao iliyofufuka. (Ona Mafundisho na Maagano 77:2–3.)
Tunajua Baba wa Mbinguni aliumba wanyama, alitupa usimamizi juu yao, na anataka sisi tuwatendee kwa ukarimu. Kama vile sisi, wao ni viumbe wa milele ambao wanatunzwa na Baba wa Mbinguni.
Fanya matumizi mazuri ya baraka ulizopokea.
Wazo kwamba kwa nguvu kubwa huja jukumu kubwa halikuanza na mashujaa wakuu. Mwokozi alionyesha hisia sawa na hiyo wakati Yeye alipomwambia Nabii Joseph Smith: “Kwani yule aliyepewa vingi kwake huyo vitatakiwa vingi” (Mafundisho na Maagano 82:3).
Vipaji vyetu, vipawa vyetu na baraka zetu huja kutoka kwa Bwana. Ni wazo baya kuzichukulia kwa dharau. Kama Bwana amekubariki na akili angavu na kiu ya maarifa, lakini bado unapoteza muda wako wa shule na kudondoka kwenye alama ndogo, basi umetumia vibaya zawadi yako. Hilo huenda hata kwa mtu mwenye nguvu ambaye hutumia uwezo wake kuwakandamiza wengine, au mtu aliyebarikiwa na ucheshi ambaye huutumia kuwashushia hadhi wengine (wengi wetu tunahitaji kufanyia kazi hilo).
Bwana anatutaka tufanye vyema tuwezavyo—na hiyo inalinganishwa na uwezo wetu wenyewe, sio wa mtu mwingine yeyote. Kulingana na ujuzi gani tunaouzungumzia, “ubora” wako unaweza kuwa bora au mbaya zaidi kuliko “ubora zaidi” wa mtu mwingine. Na hiyo ni sawa! Kuwa mwenye shukrani kwa ajili ya nguvu zako na unyenyekevu kuhusu udhaifu wako, na acha Bwana akusaidie kufikia uwezekano wako.